གཉིས་པ་པ་ཏྲུས། 2 - Tshangla New Testament (BSI)ལུང་བསྟན་པ་དང་ སློབ་དཔོན་རྫུས་མ༌བ། 1 དག་པ་ཀབ་ཉི་ ཨིས་རེལ་ག་ སོ་ངོ་བ་ཀ་པོང་ཀ་བུ་ ལུང་བསྟན་པ་རྫུས་མ་བ་ ཆོ་ཝ་པུརུས་ཀིན་ཨ་ཉི་ ན་ཧ་པོང་ཀ་བུ་ ལུང་བསྟན་པ་རྫུས་མ་ཨོ་ཕེ། རོག་ཏེ་བ་ཀི་ ཙང་ཀེན་ཨ་ཉི་ མེ་པ་ཕི་ལེ་རིག་ཁཱན་ ཉི་མང་གི་ཝ་ག་ཆཱས་བ་ ཡེ་ཉི་བི༌ལེ། རོག་ཏེ་བ་ སྡིག་པ་གེ་ཤོག་ཁཱན་ རོག་ཏེ་བ་ཀ་ གཙོ་བོ་མ་ཞུ་ལཱན་ རང་ཏེན་གི་ རང་རང་ཏེན་ག་ མེ་པ་ཕི༌ལེ། 2 སོ་ངོ་མང་པུ་ཐུར་གི་ རོག་ཏེ་བ་ཀེ་ དཔེ་གོད་ཉི་ ངི་ནང་ཁུ་སི་སི་ཨ་ཝ་ག་ ལམ་གེ་དང༌མེ། ཉི་རོག་ཏེ་བ་ཀི་ ཨོ་ཉེན་ཨ་ཝ་ཨ་དེན་གེ་ སོ་ངོ་བ་ཀི་ ལམ་དེན་པ་ག་ཀོར་གེ་ ཁ་ཏང༌མེ། 3 རོག་ཏེ་བ་ཀི་ འདོད་པུ་ཆི་ལུ་ ཨ་ཝ་ཨ་དེན་གེ་ རོག་ཏེ་བ་ཀ་ ཕཱན་མེ་ག་དེན་གེ་ གཏམ་མང་པུ་ཐུར་ཅོད་ཐཱན་ ན་ཧ་བ་ཅོམ༌པེ། དག་པ་ཀབ་ཉི་ གོ་མ་གེ་རང་ རོག་ཏེ་བ་ཀ་ ཁྲིམས་ཀེ་བེ་དག་ཉི་ དཀོན་མཆོག་གི་ ཙམ་ཉི་ཆུ་མ༌ཅ། ཉི་རོག་ཏེ་བ་ཀ་ ཁྲིམས་ཀེ་ཁཱན་ དཀོན་མཆོག་ཤོ་ ཧ་ལ་རང་གཟིམ་མུ་མཱན༌ཅ། 4 སྡིག་པ་ཨ་ཁཱན་ ཞིང་ཁམས་ག་འཐེན་པ་བ་ཆང་ དཀོན་མཆོག་གི་ ཐུབ་མ་ཐ་ལཱན་ དམྱལ་བ་ག་ཏཱན་ ཀུན་ཏི་ཝ༌ཅ། ཉི་ཁྲིམས་ཅཱད་པེ་ ནོང་སག་པུ་ག་དེན་གེ་ རོག་ཏེ་བ་ཐིག་ཐཱན་ མེར་བུ་ནང་ཀ་ཐ་ཝ༌ཅ། 5 དང་པོ་ག་སོ་ངོ་བ་ཀི་ སྡིག་པ་ཨ་ལ་ཀབ་ཉི་ དཀོན་མཆོག་གི་ རོག་ཏེ་བ་བུ་ ཁྲིམས་མ་ཀེ་བ་མ་ཐ་ལཱན་ འཛམ་གླིང་ག་ ཆོས་སེམས་མ་ཁཱན་ སོ་ངོ་བ་ཀ་ཐུང་ཀ་ ངམ་སུ་རོད་པ་ ཨོ་ཕེ་བི་ཝ༌ལ། དག་པ་ཀབ་ཉི་ ནོ་ཨ་ཤོ་ དྲང་པུ་ག་ཀོར་གེ་ སོ་ངོ་བ་ཀ་ ཡེག་ཁཱན་གི་ཝ་ཨ་དེན་གེ་ རོ་ཀ་སྐྱབས་ཨ་ཝ༌ལ། རོག་ཀབ་ཉི་ཏབ་ཐུར་ བཱརའ་སོ་ངོ་ཟུམ་ཆོ་ཝ༌ལ། 6 དཀོན་མཆོག་གི་ ཁྲོམ་ས་དོམ་དང་ག་མོ་ར་ མི་གི་ཞུམཔ་ཉི་ ཐུ་ལུ་ཅོད་གེམ་ཐཱན་ ཆོས་སེམས་མ་ཁཱན་ སོ་ངོ་བ་ཀ་ཐུང་ཀ་ ཧང་ཇུང་མ་གི་ལ་སྨོ་ ཨོ་ཉ་ག་དཔེ་ལུས་པ༌ལ། 7 དག་པ་ཀབ་ཉི་ ལོད་ཤོ་ སོ་ངོ་དྲང་པུ་ཆོ་ཝ་ཨ་དེན་གེ་ དཀོན་མཆོག་གི་ རོ་ཀ་སྐྱབས་ཨ་ཉི་གནང་མ༌ལ། ཉི་རོག་ ངན་པ་སོ་ངོ་བ་ཀི་ བཀྲ་མ་ཤིག་པ་ཨ་ཁཱན་ག་གོད་ཉི་ དབུགས་འགམ་པ་ཆོ་ཝ༌ལ། 8 ཨོ་ཉ་སོ་ངོ་དྲང་པུ་ཁེ་པ་ རོག་ཏེ་བ་ཀ་པོང་ཀ་ ཆོན་ཅ་ཨ་ཉི་ ནོང་དྲང་རང་ ཨོ་ཉ་སོ་ངོ་བ་ཀི་ཨ་ཁཱན་ ལའི་ངན་པ་བ་ རོ་ཀ་མིང་གི་ཐོང་ཉི་ ཉི་ན་གི་ཐ་ཉི་ ཨ་ལ་ཀབ་ཉི་ རོག་དབུགས་འགམ་པ་ཆོ་ཝ༌ལ། 9 ཨོ་ཐེན་ཨ་ཉི་ ཆོས་སེམས་ཨ་ཁཱན་སོ་ངོ་བ་ ནང་དོག་ཅ་ཨ་ཉི་ ཨོ་ཉ་གེ་ སྐྱབས་ཨ་ལེ་ག་ གཙོ་བོ་གི་མཁྱེན༌ཅ། ཉི་ཁྲིམས་ཅཱད་པེ་ག་ ནོང་སག་པུ་ག་དེན་གེ་ སོ་ངོ་ངན་པ་བ་ཀ་ ཁྲིམས་ཀེ་ཉི་ ཐ་ལེ་ག་བུ་ གཙོ་བོ་གི་མཁྱེན༌ཅ། 10 ཉི་ཨུ་ཐུ་ཤོ་ ཙོ་རང་ རང་ཏེན་ག་ལུས་པུ་གི་ ངན་པ་བག་ཆགས་ ཨ་ཝ་ག་དང་ཏུ་ཉི་ ཨ་ཁཱན་བ་དང་ དཀོན་མཆོག་ག་ དབང་ཚད་ཕརའ་ཁ་ མ་ཆོ་ཁཱན་བ་ཀ་དེན་གེ་ དེན་པ་གི༌ལ། ཨོ་ཐ་སོ་ངོ་ཤོ་ ཡོང་མ་ཁེ་ཁཱན་དང་ ཁམ་ཙོང་ཁཱན་གི་ཝ་ཨ་དེན་གེ་ གཟི་བརྗིད་ཅན་བ་ཀ་ སྐུར་པ་ཞུ་ལེ་ག་ ཡོང་ཁེ་ལུ་མཱན༌ཅ། 11 ཨོ་ཐ་སོ་ངོ་བ་ཀེ་ ཞིང་ཁམས་ག་འཐེན་པ་བ་ ཁེ་ཀོ་ཆི་ལུ་དང་ ཤུག་ཅཱན་ཆོ་ནེ་བུ་ གཟི་བརྗིད་ཅན་བ་ཀ་ཀོར་གེ་ གཙོ་བོ་ག་སྐུན་མདུན་ག་ སྐུར་པ་ཞུ་ལུ་མཱན༌ཅ། 12 དག་པ་ཀབ་ཉི་ ཨོ་ཐ་སོ་ངོ་བ་ཤོ་ ཙུང་ཐཱན་ཤེ་ལེ་དེན་གེ་ ཀེ་ཁཱན་སེམས་ཅན་བ་ད་བུ་ མི་ལེ་མ་སེ་ཁཱན་གི་ཝ༌ལ། ཧང་ཡ་དག་ནེ་ལ་ རོག་ཏེ་བ་ཀི་ ཧང་མི་ཝ་ཐུར་ཨ་ན། ཉི་རོག་ཏེ་བ་ཀི་ ཧ་མ་གོ་ཁཱན་བ་ཀ་ཀོར་གེ་ ཁ་ཏང་ཉི་ སྐུར་པ་ཞུ་ན། ཉི་ཨོ་ཉ་མི་ལེ་མ་སེ་ཁཱན་ སེམས་ཅན་བ་ད་བུ་ཨ་ཉི་ རོག་ཏེ་བ་བུ་ ཇཝ་ཆུ༌མེ། 13 རོག་ཏེ་བ་ཀི་ བཱརའ་ག་ ནོད་པ་ཀེ་བ་ཨ་དེན་གེ་ རོག་ཏེ་བ་ ནོད་པ་ཀེ༌བེ། རོག་ཏེ་བ་ཀི་ ངམ་བར་ཀ་ ལའི་ངན་པ་བ་ཨ་ཉི་ སྤྲོ་བ་ཙི་ལེ་ག་ ཤོ་ནང་ཕེན༌ཅ། རོག་ཏེ་བ་ཤོ་ ན་ཧ་པོང་ཀ་ ངི་ནང་ཁུ་ལེ་རིག་ཁཱན་དང་ ལོ་ཙོང་མེ་རིག་ཁཱན་གི༌ལ། རོག་ཏེ་བ་ཀི་ ན་ཧ་བ་ཀབ་ཉི་ ཏབ་ཐུར་ཟཱན་ཅ་ཨ་ཉི་ རོག་ཏེ་བ་ཀི་ གནམ་མེད་ས་མེད་ ཀཱན་ཇིག་ཉི་ སྤྲོ་བ་ཙིན༌ཅ། 14 རོག་ཏེ་བ་ཀི་ ཧ་ལ་ཨ་ནེ་བུ་ གཉེན་གྲོགས་གེ་ཕིས་ཀ་ ལུས་འབྲེལ་ཨ་ལེ་ག་ སེམས་ཨན༌ཅ། ཉི་རོག་ཏེ་བ་ཀི་ སྡིག་པ་ཨ་ལེ་ག་ ཧ་ལ་རང་ ཐུབ་ཐ་ལུ་མཱན༌ཅ། ཤུག་མ་ཁཱན་བ་ རོག་ཏེ་བ་ཀ་ ཁ་ཤོང་ནང་ཀ་ ཚུད་པེ་རིག༌ཅ། འདོད་པུ་ཆི་ལུ་ཨ་ལེ་ག་ ཤེག་པ་ཀབ་ཉི་ རོག་ཏེ་བ་ མཁས་ཏྲ་ཨུན༌ཅ། དག་པ་ཀབ་ཉི་ རོག་ཏེ་བ་ཤོ་ སྨོན་ལམ་ཕོག་ཁཱན་ སོ་ངོ་གི༌ལ། 15 རོག་ཏེ་བ་ཀི་ ལམ་ཐྲང་པུ་ཁེ་པ་ ཐུབ་ཐ་ཝ་ཨ་དེན་གེ་ ལམ་ངཱད་པ༌ཅ། རོག་ཏེ་བ་ཤོ་ ལའི་ངན་པ་ཨ་ཉི་ ཏི་རུ་ཉོང་པེ་གོད་ཁཱན་ བ་ཨོར་ག་ཟ་ བ་ལམ་ག་ལམ་གེ་ དང་མ་རི་ཝ༌ཅ། 16 དག་པ་ཀབ་ཉི་ རོ་ཀ་བོང་བ་གི་ སོ་ངོ་ག་ཀཱན་ཨ་ཉི་ བཱརག་ཉི་ ལུང་བསྟན་པ་ ཉོས་པེ་ནོར་བ༌ལ། 17 ཨོ་ཐ་སོ་ངོ་བ་ཤོ་ སང་ཁཱན་ཕོག་ཅི་རི་ད་བུ་དང་ རི་དི་གི་ཕག་ཉི་བུ་ཁཱན་ མུག་པ་ད་བུ་གི༌ལ། དཀོན་མཆོག་གི་ རོག་ཏེ་བ་ཐ་ལེ་དེན་གེ་ ཐམས་ཅན་གེ་མེར་བུ་ ནག་དུང་དུང་ནང་ཀ་ ཅམ་པ༌ལ། 18 རོག་ཏེ་བ་ཀི་ རང་ཏེན་ག་ཀོར་གེ་ ཁམ་ཙོང་ཉི་ ཇུང་ཁུངས་མ་ཁཱན་ ཆཱས་ཆི་ལུ་ཆི་ལུ་ ཨ་ཝ་བ་ཨན༌ཅ། ཉི་ངན་པ་གེ་གཱན་ཐར་ཉི་ མང་པུ་མ་དི་ཁཱན་བ་ རོག་ཏེ་བ་ཀི་ བཀྲ་མ་ཤིག་པ་ཨ་ལེ་རིག་ཉི་ ལོག་ཉི་རང་ སྡིག་པ་ནང་ཀ་ཙུག༌ཅ། 19 རོག་ཏེ་བ་ཀི་ བཱརའ་ག་ཏཱན་ རང་དབང་རང་ཚད་ བི་ལེ་དག་ཉི་ ན་ཟཱན༌ཅ། དག་པ་ཀབ་ཉི་ རོག་ཏེ་བ་ཏེན་ མེ་པ་ཕི་ཁཱན་ སྡིག་པ་ག་ཟ་པ་ རི་ཝ༌ཅ། ཧང་ཡ་དག་ནེ་ལ་ སོ་ངོ་ཤོ་ ཧང་གི་དབང་པ་ཐུར་ ཨུ་ཉུ་ག་ཟ་པ་གི༌ལ། 20 སོ་ངོ་བ་ཀི་ ཨ་ཧ་གཙོ་བོ་དང་ སྐྱབས་མགོན་ ཡི་ཤུ་ཁིརིས་ག་ ཡོན་ཏན་ཉོང་ཉི་ ཨོ་ཐ་འཛམ་གླིང་ག་ ངན་པ་ག་དབང་གེ་ གཱན་ཐར་ཐཱན་ ལོག་ཉི་རང་ ཨོ་ཉ་ནང་ཀ་ཚུད་ཉི་ ངན་པ་གི་དབང་ནེ་ལ་ ཨོ་ཉ་སོ་ངོ་བ་ གོ་མ་གེ་ལག་ཉི་ མ་ལེག་པ་རིན༌ཅ། 21 ཨོ་ཉ་སོ་ངོ་བ་ཀི་ དྲང་པུ་ག་ལམ་ཁེ་པ་ སེན་ཐཱན་ རོག་ཏེ་བ་ཀ་ཏཱན་གནང་ཁཱན་ དམ་པའི་བཀའ་གེ་ གིར་ཉི་དི་ཝ་གེ་ཏ་ གོ་མ་གེ་རང་ རོག་ཏེ་བ་ཀི་ དྲང་པུ་ག་ལམ་ཁེ་པ་ མ་སེ་ཝ་ཆོ་ནེ་ལ་ དྲག་པེ་ཆོ༌ཝ། 22 སོ་ངོ་བ་ཀི་ ཡེག་ཁཱན་ཁེ་པ་ དེན་པ་གི་ལ་དག་ཉི་ རོག་ཏེ་བ་ཀི་གེན༌ཅ། ཁུ་གི་ཕོརོས་ཉི་ ཐ་ཁཱན་ག་ཏཱན་ ལོག་ཉི་རང་དིན༌ཅ། ཉི་ཟིག་ཉི་ཐ་ཁཱན་ ཕག་པ་གི་ ལོག་ཉི་རང་ཞིང་ནང་ཀ་ ཨུར་པེ་ག་དིན་ཅ་དག༌ཉི༎ |