གཉིས་པ་པ་ཏྲུས། 1 - Tshangla New Testament (BSI)

¹ ཨོ་ཐ་ཡི་གུ་ཤོ་ ཡི་ཤུ་ཁིརིས་ག་ སྐུ་ཚབ་དང་ གཡོག་པ་ སི་མོན་པ་ཏྲུས་གེ་གི༌ལ། དྲང་པུ་ཆོ་ཁཱན་ ཨ་ཧ་དཀོན་མཆོག་དང་ སྐྱབས་མགོན་ ཡི་ཤུ་ཁིརིས་གི་ ཨ་ཧ་དད་པ་ད་བུ་རང་ ན་ཧ་དད་པ་བུ་ ཁག་ཆི་ལུ་ཅོད་ཉི་གནང་ཁཱན་ སོ་ངོ་བ་ཀ་ཏཱན་ ཇི་གི་ ཨོ་ཐ་ཡི་གུ་ འབྲི་ཅ་གི༌ལ།

² དཀོན་མཆོག་དང་ ཨ་ཧ་གཙོ་བོ་ཡི་ཤུ་ག་ ཡོན་ཏན་ག་ཐུང་ཀེ་ཨ་ཉི་ ན་ཤི་ཐུགས་རྗེ་དང་ སྐྱིད་པུ་ཇོབ་ཇོབ་ཨ་ཉི་ཉོང་ཅེན༎

དཀོན་མཆོག་གི་ ར་ཁཱན་དང་སི་ཁཱན།

³ ཨ་ཤི་ རོ་ཀ་ཀོར་གེ་ མང་པུ་སེན་ཅ་ཨ་ཉི་ ཨ་ཧ་ཚེ་ག་ དཀོན་མཆོག་ག་ ཆ་གནས་ཐ་ཉི་ ཆོ་ལེ་དེན་གེ་ཚཱས་ཁཱན་ ཐམས་ཅན་རང་ རོ་ཀ་སྟོབས་དབང་ག་ཐུང་ཀེ་ཨ་ཉི་ ཨ་ཧ་གནང་མ༌ཅ། རོ་ཀ་གཟི་བརྗིད་དང་ལེག་པུ་ ཨ་ཧ་གནང་མེ་དེན་གེ་ རོ་ཀི་ ཨ་ཧ་བ་ར་ཝ་གི༌ལ།

⁴ ཨོ་ཐེན་ཨ་ཉི་ རོ་ཀི་དབུ་མནའ་བཞེས་ཁཱན་ ཡིད་ཆི་ཝ་ག་ སེ་རབ་ཆི་ལུ་ཁེ་པ་ རོ་ཀི་ ཨ་ཧ་གནང་མ༌ཅ། ཧང་ཡ་དག་ནེ་ལ་ ཨོ་ཐ་འཛམ་གླིང་ག་ ངན་པ་བག་ཆགས་གི་ ཨ་ལེ་རིག་ཁཱན་ ངན་པ་ལའི་གེ་ ན་ཧ་བ་གཱན་ཐར་ཉི་ དཀོན་མཆོག་ད་བུ་རང་ རིན་ཆེན་དག་པ་གི་གི༌ལ།

⁵ ཨོ་ཉི་ཨ་དེན་གེ་ ན་ཤི་ ན་ཧ་དད་པ་ག་ཐུང་ཀ་ ལེག་པུ་པོན་མེ་མིག་པ་ཕི་ཉི་ ཙ་དྲེག༌ཅོ། ཉི་ན་ཤི་ཨ་ཁཱན་ལའི་ ལེག་པུ་ག་ཐུང་ཀ་ ཡོན་ཏན་པོན་མེ་ གོད༌ཅོ།

⁶ ཡོན་ཏན་ག་ཐུང་ཀ་ སྒྲིགས་ཁྲིམས་དང་ སྒྲིགས་ཁྲིམས་ག་ཐུང་ཀ་ ཙ་དྲེག་པེ་གོད༌ཅོ། ཉི་ཙ་དྲེག་པ་ཐུང་ཀ་ དཀོན་མཆོག་ད་བུ་ རི་ལེ་གོད༌ཅོ།

⁷ ཆོས་སེམས་ཐུང་ཀ་ ཡུང་ཟི་བ་ཀ་ བྱམས་པར་ཀེ་ཤོ། ཉི་བྱམས་པར་ཐུང་ཀ་ སྙིང་རྗེ་ཀེ་ཤོ།

⁸ ཨོ་ཐེན་ཨ་ཉི་ ན་ཧ་བ་ ཧབ་ཏུར་མང་པུ་ཟོག་པ་ཐུར་ ཨོམ་ཏུར་མང་པུ་ཨ་ཉི་ ཨ་ཧ་གཙོ་བོ་ཡི་ཤུ་ཁིརིས་ག་དེན་གེ་ ས་ར་སེ་རེ་ཨ་ཉི་ ལའི་ཨ་ལེ་རེ་བ་ག་དང་ ཆོ་ལེ་རེ་བ་ག་ཡོན་ཏན་ ན་ཤི་ཉོང༌པེ།

⁹ དག་པ་ཀབ་ཉི་ ཨོ་ཐ་བ་མ་ཁཱན་ སོ་ངོ་བ་ཤོ་ མིང་ལམ་རིང་མུ་ག་ ཐོང་མེ་མར་ཁཱན་བ་དང་ མིང་ཀ་ན་བ་གི༌ལ། ཉི་རོག་ཏེ་བ་ཤོ་ གོ་མ་ག་སྡིག་པ་གེ་ དག་ཉི་གནང་ཁཱན་ སོ་ངོ་བ་གི་ལ་དག་ཉི་ རོག་ཏེ་བ་ཀི་ ཡིད་ཀ་མི་ཝ་ཨོ་ཕེ།

¹⁰ ཨོ་ཉི་ཨ་དེན་གེ་ ཇ་ག་ཡུང་ཟི་བ་ ན་ཧ་བ་ཤོ་ ཏེན་ཏེན་རང་ དཀོན་མཆོག་གི་རཱན་ཐཱན་ སི་ཝ་གི་ལ་དག་ཉི་ ཁུངས་ཀེ་བེ་དེན་གེ་ ཙ་དྲེག་ཉི་ལའི་ཨའི། ཧང་ཡ་དག་ནེ་ལ་ ན་ཤི་ཨོ་ཐེན་ཨ་ནེ་ལ་ ན་ཧ་བ་ ཧ་ལ་རང་ རོ་ཁེ་མ་དི༌ལ།

¹¹ ཨོ་ཐེན་ཨ་ཉི་ ན་ཧ་བ་ ཨ་ཧ་གཙོ་བོ་དང་ སྐྱབས་མགོན་ ཡི་ཤུ་ཁིརིས་ག་ མ་འགྱུར་བརྟན་པ་ རྒྱལ་སྲིད་ནང་ཀ་ནུ་ཕེ་ག་དེན་གེ་ འབྱོན་པར་ལེགས་སོ་ ཆི་ལུ་ཉོང༌པེ༎

གསུང་རབ་གེ་ཤོ་ཁཱན་དང་ཏུ་ཉི་ཨའི།

¹² ཨོ་ཐ་ཀོར་གེ་ ན་ཤི་ གོ་མ་གེ་རང་སེ་ཉི་ ན་ཤི་ཉོང་ཁཱན་དེན་པ་ག་ སྒྲིང་སྒྲིང་ཨ་ཉི་ ཐིང་མ༌ཅ། ཨོ་ཉེ་རང་གི་ནེ་བུ་ ཨོ་ཐ་ཀོར་གེ་ ཇི་གི་ ན་ཧ་ལོག་ཉི་རང་ཡེག་པེ་ག་ འཆར་གཞི་ཙ་མ༌ཅ།

¹³ གི་ལ་ ཇང་མ་ཤི་ཝ་སག་པུ་ ཨོ་ཐ་ཀོར་གེ་ ཇི་གི་ ན་ཧ་ལོག་ཉི་ ལོག་ཉི་རང་ ཡེག་པེ་ཁེ་ལེ་དག་ཉི་ ཇི་གི་མིན༌ཅ།

¹⁴ ཉི་ཨ་ཧ་གཙོ་བོ་ཡི་ཤུ་ཁིརིས་གི་ ཇ་ག་ཏཱན་ དང་སང་ཀིན་ཨ་ཉི་ གསུངས་མ་དང་ཏུ་ཉི་ ཇང་ཤོ་ དོ་ཟོ་རང་ ཨོ་ཐ་བ་ཐུབ་ཐ་ཉི་ དི་ལེ་ཁེ༌ལེ།

¹⁵ ཨོ་ཉི་ཨ་དེན་གེ་ ཇང་ཨོ་ཐ་འཛམ་གླིང་གེ་ དི་དེན་གེ་བུ་ ཇུ་ཀ་སག་པུ་རང་ ན་ཤི་ ཨོ་ཐ་བ་ ཡིད་ཀ་མ་མི་ལཱན་ སེམས་ཀ་ཐཱན་ཆེན་དག་པ་གི་ ཇི་གི་ཙ་དྲེག་ཅ་གི༌ལ།

¹⁶ ཨ་ཧ་གཙོ་བོ་ཡི་ཤུ་ཁིརིས་ག་ སྟོབས་དབང་དང་ རོག་ལོག་ཉི་ བྱོན་མེ་ག་ཀོར་གེ་ ཨ་ཤི་ ན་ཧ་གཏམ་ལེག་པུ་ཐུར་ཅོད་ཐཱན་ ཡེག་ཅ་མང་གི། ཧང་ཡ་དག་ནེ་ལ་ ཨའི་ཏེན་ག་མིང་གི་ ཨ་ཤི་ རོ་ཀ་ཤུགས་སྟོབས་ཁེ་པ་ མཇལ་བ༌ཅ།

¹⁷ ཐམས་ཅན་གེ་ཆི་ལུ་ཆོ་ཁཱན་ དཀོན་མཆོག་ག་གསུང་བྱོན་ཉི་ རོག་ཤོ་ ཇི་གི་ཕང་ཁཱན་ ཇ་ག་ཟ་གི༌ལ། ཉི་ཇང་ རོག་ཀབ་ཉི་ གནམ་མེད་ས་མེད་ ངལ་རངས་པ་ཅ་དག་གསུངས་ཉི་ ཡབ་དཀོན་མཆོག་གི་ རོ་ཀ་གུས་ཞབས་དང་ གཟི་བརྗིད་གནང་མེ་གང་ཀ་ ཨ་ཧ་བ་ རོག་ཀབ་ཉི་རང་ཆོ༌ཝ།

¹⁸ ཨུ་ཉུ་གང་ཀ་ ཨ་ཧ་བ་ ཨོ་ཉ་དམ་པའི་ཕུ་ཐུང་ཀ་ ཡི་ཤུ་ཀབ་ཉི་ཆོ༌ཝ། ཉི་ཨ་ཤི་ ཞིང་ཁམས་གེ་དོང་ དཀོན་མཆོག་ག་ གསུང་སྐད་ན་ཐ༌ཝ།

¹⁹ ཨོ་ཉི་ཨ་དེན་གེ་ ལུང་བསྟན་པ་བ་ཀི་ ལུང་བསྟན་ཁཱན་ གསུང་ག་ཀོར་གེ་ ཨ་ཧ་བ་ ལག་ཏང་ ལོ་དི་ཝ་རི་ཝ༌ཅ། ཨུ་ཐུ་ཤོ་ མེར་བུ་ནང་ཀ་ ལ་ཝང་དང་ མིང་མ་ཏེག་པ་སག་པུ་ག་དེན་གེ་ ན་ཧ་སེམས་ཀ་ འོད་ཟེར་ཤར་ཁཱན་ བོ་ཇུ་ལུ་གི་ཝ་ཨ་དེན་གེ་ ཨོ་ཐ་ཀོར་གེ་ ན་ཤི་ལེག་པུ་ཨ་ཉི་ ཉཱན་པེ་ཁེ༌ལེ།

²⁰ ཐམས་ཅན་གེ་ཁག་ཆི་ལུ་རང་ ཧང་གི་ལ་ཡ་དག་ནེ་ལ་ གསུང་རབ་ནང་ཀ་ ལུང་བསྟན་ཁཱན་བ་ ལུང་བསྟན་པ་ རོག་ཏེན་ག་ མི་ཐང་དང་ཏུ་ཉི་ ལུང་བསྟན་མ་མང་གི་དག་ཉི་ ན་ཤི་སེ་ལེ་ཁེ༌ལེ།

²¹ ཧང་ཡ་དག་ནེ་ལ་ ལུང་བསྟན་ག་ གསུང་ག་བ་ཤོ་ སོ་ངོ་གི་མི་ཝ་དང་ཏུ་ཉི་ ཤོ་ཝ་མང་གི་ཝ་ དཀོན་མཆོག་གེ་ བྱོན་ཁཱན་གསུང་ཁེ་པ་ དམ་པའི་ཐུགས་ཉིད་གི་ རིག་པ་དང་ཏུ་ཉི་ བཤད་ཅ་གི༌ལ༎