དང་པ་ཐེ་ས་ལོ་ནི་ཀི། 1 - Tshangla New Testament (BSI)1 པ་ཝལ་དང་སི་ལཱས་ ཉི་ཏི་མོ་ཐི་གེ་ ཐེ་ས་ལོ་ནི་ཀི་ག་ ཆོས་ཚོགས་ག་ཏཱན་ ཡབ་དཀོན་མཆོག་དང་ གཙོ་བོ་ཡི་ཤུ་ཁིརིས་ག་ཆོ་ཁཱན་ ཐུགས་རྗེ་དང་སྐྱིད་པུ་ ན་ཤི་ཉོང་ཅེན༎ ཐེ་ས་ལོ་ནི་ཀི༌ག་ ཆོས༌ཚོགས༌གི་ དཔེ་ལེག༌པུ་གེན༌མ༌ལ། 2 ཨ་ཤི་ ནའི་ཐམས་ཅན་ག་དེན་གེ་ དཀོན་མཆོག་ག་ ཏ་བུ་རང་བཀའ་དྲིན་བསམ༌ཅ། ཉི་ཨ་ཧ་སྨོན་ལམ་ག་ ན་ཧ་ཀོར་གེ་ཞུན༌ཅ། 3 ཉི་ན་ཧ་དད་པ་ག་ལའི་དང་ སྙིང་རྗེ་གི་ཨ་ཉི་ཨ་ཁཱན་ ལའི་ཅིད་པུ་ ཉི་གཙོ་བོ་ ཡི་ཤུ་ཁིརིས་ག་ཐུང་ཀ་ཆོ་ཁཱན་ ན་ཧ་རེ་ཆ་ ཆི་ལུ་ཆོ་ཝ་ཨ་དེན་གེ་ ཨ་ཤི་ ཨ་ཧ་དཀོན་མཆོག་དང་ ཡབ་ག་སྐུན་མདུན་ག་ ན་ཧ་ཀོར་གེ་ ཡིད་ཀ་ཨ་ཉི་རང་ཆོན༌ཅ། 4 དཀོན་མཆོག་གི་ ཕང་ཁཱན་ཡུང་ཟི་བ་ ནའི་དཀོན་མཆོག་གི་ སི་ཝ་གི་ལ་དག་ཉི་ ཨ་ཤི་སེན༌ཅ། 5 ཧང་ཡ་དག་ནེ་ལ་ ཨ་ཧ་འཐེན་ལེག་པུ་ ཨ་ཤི་ན་ཧ་པོང་ཀ་ གསུང་ག་ཤ་ཕ་ཝ་མང་གི། དག་པ་ཀབ་ཉི་ དབང་དང་ དམ་པའི་ཐུགས་ཉིད་ ཉི་དེན་པ་ག་ཐེ་རི་བ་རི་ ལོ་ཏེན་མེ་རེ་བ་ཨ་ཉི་ ཕ་ཝ་གི༌ལ། ཉི་ཨའི་ ན་ཧ་པོང་ཀ་ཆོན་ཅ་ཨ་ཉི་ ན་ཧ་དེན་གེ་ ཧང་ད་བུ་ཨ་ཉི་ ཆོ་ཝ་གི་ལ་སྨོ་ ན་ཤི་སེན༌ཅ། 6 ཉི་ནའི་ ཨའི་དང་གཙོ་བོ་ག་ དཔེ་གོད་ཁཱན་རི༌ཝ། ཧང་ཡ་དག་ནེ་ལ་ དམ་པའི་ཐུགས་ཉིད་གི་གནང་ཁཱན་ སྐྱིད་པུ་གི་ཨ་ཉི་ ན་ཤི་གནམ་མེད་ས་མེད་ དཀའ་ཝ་ཅཱད་ཉི་ གསུང་ཞུ་ཝ་གི༌ལ། 7 ཨོ་ཉི་ཨ་དེན་གེ་ ས་ཆ་མ་ཀེ་དོ་ནི་ཡ་དང་ ཨ་ཁའི་ཡ་ག་ དད་པ་ཨ་ཁཱན་ ཐམས་ཅན་ག་དེན་གེ་ ནའི་དཔེ་གེན་ཁཱན་རི་ཝ༌ཅ། 8 ཉི་ན་ཧ་བ་ཀེ་ཨ་ཉི་ གཙོ་བོ་ག་གསུང་བཤད་ཉི་ མ་ཀེ་དོ་ནི་ཡ་དང་ ཨ་ཁའི་ཡ་ཐུར་ག་ཤ་ ཆ་པ་མང་གི་ཝ་ ས་ཆ་ཐམས་ཅན་ག་ཆ་པ༌ཅ། ན་ཤི་ དཀོན་མཆོག་ག་ཏཱན་ དད་པ་ཀེ་ཁཱན་ཀོར་གེ་ ཐམས་ཅན་གི་སེ་ཝ༌ཅ། ཨོ་ཉ་ཀོར་གེ་ ཨ་ཤི་ཧང་རང་ ཡེག་པེ་མ་ཁེ༌ལ། 9-10 ཧང་ཡ་དག་ནེ་ལ་ ཨའི་ན་ཧ་པོང་ཀ་ ཨུན་ཅ་ཨ་ཉི་ ན་ཤི་ ཨའི་ཧང་ཏེན་ཞུ་ཝ་གི་ལ་སྨོ་ ཉི་དེན་པ་དང་ མ་གཤགས་ཁཱན་ དཀོན་མཆོག་ག་ ཕྱག་ཞུ་ལེ་དེན་གེ་ ཉི་དཀོན་མཆོག་གི་ གཤགས་པ་གེ་ བཞེངས་ཉི་གནང་ཁཱན་ རོ་ཀ་སྲས་ཡི་ཤུ་ ཞིང་ཁམས་གེ་དོང་ ལོག་ཉི་མ་བྱོན་མ་སག་པུ་ ནོང་མེ་དེན་གེ་ ན་ཤི་ ཧང་ཏེན་སྐུ་བ་ཀ་ གསོལ་ཝ་ཏ་པེ་ཐུབ་ཐ་ཉི་ དཀོན་མཆོག་ག་ཏཱན་ ལོག་པ་གི་ལ་སྨོ་ ཨོ་ཉ་ཀོར་གེ་ རོག་ཏེ་བ་ཀི་རང་ཆཱས་ཨ་ན། ཨ་ཧ་ཐུང་ཀ་ཨུ་ཁཱན་ དཀོན་མཆོག་ག་ ཁྲིམས་གེ་ ཡི་ཤུ་གི་ ཨའི་སྐྱབས་ཨ་ཉི་གནང༌ཅ༎ |