དང་པ་པ་ཏྲུས། 5 - Tshangla New Testament (BSI)དཀོན་མཆོག་ག་ ཤི་ཤ་བ་ལེག་པཱན་གོད༌ཅོ། 1 ཇང་ཤོ་ ཆོས་ཚོགས་ག་ སོ་ངོ་ཆི་ལུ་བ་དང་ ཁིརིས་ནང་དོག་པ་ཀོར་གེ་ འཛོམས་དཔང་ཨ་ཁཱན ཉི་རོག་ ལོག་ཉི་བྱོན་མེ་གང་ཀ་ རོ་ཀ་གཟི་བརྗིད་བུ་ བོང་མེ་ཉོང་ཁཱན་ སོ་ངོ་གི་ཝ་ཨ་དེན་གེ་ ཇི་གི་ ན་ཧ་པོང་ཀ་ཆོ་ཁཱན་ འགོ་དཔོན་བ་ཀ་ཏཱན་ཡེག༌ཅ། 2 ཤི་ཤ་དི་པ་ལེག་པུ་གི་ ཨ་ཝ་པུརུས་ཀིན་ཨ་ཉི་ ན་ཤི་གོད་པེ་དེན་གེ་ཐ་ཁཱན་ དཀོན་མཆོག་ག་ སྲས་སྲས་མོ་བ་ཀ་ བདག་འཛིན་ཨན་ཅ་ཨ་ཉི་ ཨ་ལེ་མ་ལ་མ་ མང་གི་ཝ་ དཀོན་མཆོག་ག་ ཐུགས་བཞེད་ཆོ་ཝ་དང་ཏུ་ཉི་ ན་ཧ་སེམས་ཤོ་ཉི་ བདག་འཛིན་ཨ་ལེ་ཁེ༌ལེ། ཏི་རུ་ག་ བག་ཆགས་ཨ་ཉི་ མང་གི་ཝ་ ཕྱག་ཞུ་ལེ་ག་ སེམས་ཨ་ཉི་ ཨ་ལེ་ཁེ༌ལེ། 3 ན་ཧ་ཕརའ་ཁེ་ཆོ་ཁཱན་ སོ་ངོ་བ་ ཏི་བེ་མང་གི་ཝ་ རོག་ཏེ་བ་ཀ་དེན་གེ་ དཔེ་ལེག་པུ་གེན་མེ་ཁེ༌ལེ། 4 ཉི་ཤི་ཤ་དི་པ་ཆི་ལུ་ཁེ་པ་ བྱོན་མ་ཀབ་ཉི་ ཧ་ལ་རང་ཡེ་ཉི་མ་དི་ཁཱན་ གཟི་བརྗིད་ཅན་ག་སེ་རབ་ ན་ཤི་ཉོང༌པེ། 5 ཨུ་ཉུ་པུརུས་ཀིན་ཨ་ཉི་ སོ་ངོ་ཡོན་མ་བ་ཀི་བུ་ སོ་ངོ་ཆི་ལུ་བ་ཀ་ཕརའ་ཁེ་ ཆོ་ལེ་ཁེ༌ལེ། ནའི་ཐམས་ཅན་གི་ ཐུར་དང་ཐུར་ག་ ཕྱག་ཞུ་ལེ་དེན་གེ་ ཉམ་ཆུང་ཨ་ཉི་ ཆོ་ལེ་ཁེ༌ལེ། ཧང་ཡ་དག་ནེ་ལ་ གསུང་རབ་གེ་ཤོན་ཅ་ དཀོན་མཆོག་གི་ ཁམ་ཏྲ་ལ་ག་ དགྲ་ཨ་ཉི་གནང༌ཅ། དག་པ་ཀབ་ཉི་ ཉམ་ཆུང་བ་ཀ་ ཐུགས་རྗེ་གཟིགས་ཅ་དག༌ཉི། 6 ཨོ་ཉི་ཨ་དེན་གེ་ དཀོན་མཆོག་ག་ ཤུགས་སྟོབས་ཆི་ལུ་ཆོ་ཁཱན་ ཕྱག་ཕརའ་ཁ་ ཉམ་ཆུང་རི་ཉི་ཆོའི། ཧང་ཡ་དག་ནེ་ལ་ རོ་ཀ་དུས་ཙུན་ག་ རོ་ཀི་ ན་ཧ་བ་ ག་དུང་ཉི་གནང༌མེ། 7 དཀོན་མཆོག་གི་ ན་ཧ་ཀོར་གེ་ ཐུགས་བསམ་ལེག་པུ་ གནང་མ་ཨ་དེན་གེ་ ན་ཧ་སྡུག་བསྔལ་ ཐམས་ཅན་རང་ རོ་ཀ་ཕྱག་ཀ་སྤྲོད༌ཅོ། 8 ན་ཧ་བ་རིག་པ་སྒྲིམ་ཉི་ རང་ཏེན་ག་ བདག་འཛིན་ཨ་ལེ་ཁེ༌ལེ། ཐུར་ཕང་ང་མེ་དེན་གེ་ སེང་གེ་གི་ ཇིག་པ་པུརུས་ཀིན་ཨ་ཉི་ ན་ཧ་དགྲ་བྱང་ཕིཤི་ བདུད་བུ་ཀོར་བེ་གང༌ཅ། 9 ན་ཧ་བ་ དད་པ་ག་ སྒྲིང་སྒྲིང་ཨན་ཆོ་ཉི་ བདུད་ག་དགྲ་ཨ་ཉི་ཐིང་ཤོ། ཧང་ཡ་དག་ནེ་ལ་ འཛམ་གླིང་ཐམས་ཅན་ག་ཆོ་ཁཱན་ ན་ཧ་བཱརའ་ ཡུང་ཟི་བ་བུ་ ན་ཧ་བ་པུརུས་ཀིན་ཨ་ཉི་རང་ ནང་དོག་ཅ་གི་ལ་དག་ཉི་ ན་ཤི་སེན༌ཅ། 10 ན་ཧ་བ་ རེབ་ཀིན་ཐུར་ག་དེན་གེ་ ནང་དོག་ཏེན་གེ་ རོ་ཀི་ ན་ཧ་བ་ ཅོན་ད་སུ་རང་མ་ཝ་ཨ་ཉི་ སྒྲིང་སྒྲིང་ཨ་ཉི་ ཤུག་ཅཱན་ཅོད་ཉི་གནང་ཐཱན་ བརྟན་པ་ཨ་ཉི་ རྨང་ཆེ་ཁཱན་ག་ཐུང་ཀ་ ཐ་ཉི་གནང༌མེ། ཡི་ཤུ་ཁིརིས་ག་ཐུང་ཀེ་ཨ་ཉི་ དཀོན་མཆོག་གི་ ཐུགས་རྗེ་གཟིགས་ཉི་ ན་ཧ་བ་ རོ་ཀ་མ་འགྱུར་བརྟན་པ་ག་ གཟི་བརྗིད་ནང་ཀ་ཏཱན་ ར་ཉི་གནང་མ༌ཅ། 11 སྟོབས་དབང་ཐམས་ཅན་རང་ དུས་ཏ་བུ་ག་དེན་གེ་ རོ་ཀ་གི༌ལ། ཨ་མེན༎ པ་ཏྲུས་ག་ ཆཱས་མཇུག་དུས། 12 ཨོ་ཐ་ཡི་གུ་ཐུ་མུ་ཐུར་ འབྲི་བེ་ག་ སི་ལཱས་གི་ རུམ་པ་ཨ་དེན་གེ་ ཇི་གི་ ན་ཧ་ཏཱན་ཀེ་ཅ་གི༌ལ། རོག་ཤོ་ དམ་ཚིག་ཙུང་ཉི་ དཀོན་མཆོག་ག་ ཕྱག་ཞུ་ཁཱན་གི་ལ་དག་ཉི་ ཇི་གི་ཙིན༌ཅ། ཇི་གི་ ན་ཧ་འབྲི་བེ་ག་དེན་ཐ་ཤོ་ ན་ཧ་ནོ་ཝང་ ཨ་ལེ་ག་དེན་གེ་དང་ ཨུ་ཐུ་ཤོ་ དཀོན་མཆོག་ག་ཐུགས་རྗེ་ དེན་པ་གི་ལ་དག་ཉི་ ཡེག་པེ་དེན་གེ་གི༌ལ། ཨོ་ཉི་ཨ་དེན་གེ་ ན་ཧ་བ་ རོ་ཀ་ཐུགས་རྗེ་ག་ སྒྲིང་སྒྲིང་ཨ་ཉི་ཆོའི། 13-14 བེ་བི་ལོན་ག་ཆོ་ཁཱན་ ན་ཧ་ཨ་ན་ཆོས་ཚོགས་གི་ ན་ཧ་སྐུ་གཟུགས་བཟང་པོ་དག་ཉི་ ཡེག༌ལ། རོག་ཏེ་བ་བུ་ དཀོན་མཆོག་གི་ སི་ཝ་གི༌ལ། ཉི་ཇ་ག་ཟ་ མར་ཀུས་གི་བུ་ ན་ཧ་སྐུ་གཟུགས་བཟང་པོ་དག་ཉི་ ཡེག༌ལ། ཐུར་གི་ཐུར་ག་ ཡི་ཤུ་པ་ཅུབ་ཨ་ཉི་ སྐུ་གཟུགས་བཟང་པོ་དག་ཉི་ ཡེག༌ཅོ། ཉི་ཁིརིས་ག་ དད་པ་ཨ་ཁཱན་ ཐམས་ཅན་གི་ སྐྱིད་པུ་ཉོང་ཅེན༎ |