དང་པ་ཀོ་རིན་ཐི། 12 - Tshangla New Testament (BSI)ཐུགས་ཉིད་ག་སེ་རབ༌བ། 1 ཉི་ཨོམ་ ཡུང་ཟི་བ་ ཐུགས་ཉིད་ག་སེ་རབ་བ་ཀ་ཀོར་གེ་ ན་ཤི་སེན་ཆེན་དག་ཉི་ ཇི་གི་མིན༌ཅ། 2 ན་ཤི་སེན་ཅ་ ན་ཧ་བ་ དཀོན་མཆོག་ག་ དད་པ་མ་ཨ་ཁཱན་ཨ་ཉི་ ཆོ་ལེ་གང་ཀ་ ན་ཧ་བ་ ལམ་མང་གི་ཝ་གེ་རིག་ཉི་ ནོ་ཝང་ཆོག་པེ་མ་སེ་ཁཱན་ སྐུ་ག་གསོལ་ཝ་ཏ་པེ་བི་ཝ་ཆོ༌ཝ། 3 ཨོ་ཉི་ཨ་དེན་གེ་ ཇི་གི་ན་ཧ་ཡེག་ཅ་ དཀོན་མཆོག་ག་ ཐུགས་ཉིད་ག་ཐུང་ཀེ་ཨ་ཉི་ ཆཱས་ཨ་ཁཱན་ཐུར་གི་རང་ ཡི་ཤུ་ག་ཁ་རབ་མ་ཕི༌ལ། ཉི་ཡི་ཤུ་ཁེ་པ་ གཙོ་བོ་གི་ལ་ཨ་ཉི་བུ་ དམ་པའི་ཐུགས་ཉིད་ག་ ཐུང་ཀེ་ཨ་ཉི་ཤ་ ཡེག་པེ་རེ༌བེ། 4 ཉི་ཨོམ་ སེ་རབ་མ་འདྲ་ཝ་མང་པུ་ཐུར༌ཅ། དག་པ་ཀབ་ཉི་ ཐུགས་ཉིད་ཤོ་ ཐུར་ཤ༌ཅ། 5 ཉི་ཕྱག་ཞུ་ལེ་ག་བུ་ མ་འདྲ་ཝ་མང་པུ་ཐུར༌ཅ། དག་པ་ཀབ་ཉི་ གཙོ་བོ་ཐུར་ཤ༌ཅ། 6 ལའི་མ་འདྲ་ཝ་མང་པུ་ཐུར༌ཅ། དག་པ་ཀབ་ཉི་ དཀོན་མཆོག་ཐུར་གི་ ཨོ་ཉ་ལའི་ ཐམས་ཅན་རང་ སོ་ངོ་ཐམས་ཅན་ག་ཐུང་ཀེ་ཨ་ཉི་ མཛད་གནང༌ཅ། 7 ཉི་ཨོམ་ ཐུགས་ཉིད་ག་སེ་རབ་ཤོ་ ཐམས་ཅན་ག་ ཕཱན་ཏོག་པེ་དེན་གེ་ སོ་ངོ་ཐུར་དང་ཐུར་ག་ གནང་ཅ་གི༌ལ། 8 སོ་ངོ་ཐུར་ག་ ཐུགས་ཉིད་གི་ རིག་པ་ག་ཆཱས་ཨ་ལེ་ག་ སེ་རབ་གནང༌ཅ། ཉི་ཨོམ་ཐུར་ག་ ཨོ་ཉ་ཐུགས་ཉིད་གི་རང་ ཡོན་ཏན་ག་ཆཱས་ཨ་ལེ་ག་ སེ་རབ་གནང༌ཅ། 9 བཱརའ་སོ་ངོ་ག་ ཨོ་ཉ་ཐུགས་ཉིད་གི་ དད་པ་ག་སེ་རབ་གནང༌ཅ། ཉི་ཨོམ་ཆང་ ཨོ་ཉ་ཐུགས་ཉིད་ཐུར་གི་རང་ བཱརའ་སོ་ངོ་ཐུར་ག་ མར་ཁཱན་བ་དྲག་པེ་ག་ སེ་རབ་གནང༌ཅ། 10 བཱརའ་སོ་ངོ་ཐུར་ག་ རྫུ་འཕྲུལ་གེན་མེ་ག་ སྟོབས་དབང་དང་ ཨོམ་ཐུར་ག་ ལུང་བསྟན་མེ་ག་སེ་རབ་ ཉི་བཱརའ་སོ་ངོ་ག་ རྣམ་ཤེས་བ་ པག་པེ་ག་སེ་རབ་དང་ ཨོམ་ཐུར་ག་ ཧ་མ་གོ་ཁཱན་ལོ་ཨ་ལེ་ག་སེ་རབ་ ཉི་བཱརའ་སོ་ངོ་ག་ ཧ་མ་གོ་ཁཱན་ལོ་ག་ དེན་ཐ་ཁྲེ་བེ་ག་ སེ་རབ་གནང༌ཅ། 11 ཨོ་ཐ་བ་ ཐམས་ཅན་རང་ ཐུགས་ཉིད་ཐུར་དང་ ཨོ་ཉ་ཐུགས་ཉིད་གི་རང་ མཛད་ཅ་གི༌ལ། ཉི་རོ་ཀ་ཐུགས་བཞེད་དང་ཏུ་ཉི་ སོ་ངོ་ཐུར་དང་ཐུར་ག་ རོ་ཀི་ཨོ་ཉ་སེ་རབ་གནང༌ཅ། 12 སོ་ངོ་ག་ལུས་པུ་ཤོ་ དབང་པོ་མང་པུ་ཐུར་གི་ ཅོད་པ༌ཅ། དག་པ་ཀབ་ཉི་ དབང་པོ་མང་པུ་ཐུར་ཆོ་ནེ་བུ་ ཐམས་ཅན་དོབ་ཉི་ ལུས་པུ་ཐུར་ཤ་ཅོད༌ཅ། ཁིརིས་ག་སྐུ་གཟུགས་བུ་ ཨུ་ཉུ་པུརུས་ཀིན་རང་གི༌ལ། 13 ཧང་ཡ་དག་ནེ་ལ་ ཨའི་ཐམས་ཅན་རང་ ཐུགས་ཉིད་ཐུར་གི་ ལུས་པུ་ཐུར་ག་ནང་ཀ་ཏཱན་ ཁྲུས་གསོར་ཕི་ཝ༌ཅ། ཡ་ཧུ་དི་པ་གི་ནེ་བུ་ གིརིག་གི་ནེ་བུ་ ཉི་ཟ་པ་གི་ནེ་བུ་ ཟ་པ་མང་གི་ནེ་བུ་ ཨའི་ཐམས་ཅན་ག་ ཐུགས་ཉིད་ཐུར་ ཇ་མེ་ག་གནང་མ༌ཅ། 14 ཉི་ཨོམ་ ལུས་པུ་ཤོ་ དབང་པོ་ཐུར་གི་མང་གི་ཝ་ དབང་པོ་མང་པུ་ཐུར་གི་ཨ་ཉི་ ཅོད་པ༌ཅ། 15 བི་གི་ཇང་ ག་དང་མང་གི་ཝ་ཨ་དེན་གེ་ ཇང་ལུས་པུ་ག་དྲེ་ཀ་ མཱན་ཅ་དག་ཉི་ ཡེག་ནེ་ལ་ ཨོ་ཉ་བི་ ལུས་པུ་ག་དྲེ་ཀེ་ ཐུར་མང་གི་ཝ་ རི་ལུ་མཱན༌ཅ། 16 ན་གི་ ཇང་མིང་མང་གི་ཝ་ཨ་དེན་གེ་ ཇང་ལུས་པུ་ག་དྲེ་ཀ་ མཱན་ཅ་དག་ཉི་ ཡེག་ནེ་ལ་ ཨོ་ཉ་ན་ ལུས་པུ་ག་དྲེ་ཀེ་ ཐུར་མང་གི་ཝ་ རི་ལུ་མཱན༌ཅ། 17 ལུས་པུ་ཐམས་ཅན་རང་ མིང་གིན་ཐཱན་ཨ་ནེ་ལ་ ཨོ་གེ་ཉཱན་པེ་ཆོ་ཝ་ཡ། ལུས་པུ་ཐམས་ཅན་རང་ ན་གིན་ཐཱན་ཨ་ནེ་ལ་ ཤེར་ཨོ་གེ་ན་མེ་ཆོ་ཝ་ཡ། 18 དག་པ་ཀབ་ཉི་ ལུས་པུ་ག་ནང་ཀ་ཆོ་ཁཱན་ དབང་པོ་ཐམས་ཅན་རང་ དཀོན་མཆོག་གི་ རོ་ཀ་ཐུགས་བཞེད་དང་ཏུ་ཉི་བཀོད་ཁཱན་ རང་རང་ས་བཱརང་ཀ་ ཙུག་ཉི་གནང་མ༌ལ། 19 དབང་པོ་ཐམས་ཅན་རང་ ཐུར་གི་ཝ་ཆོ་ནེ་ལ་ ལུས་པུ་ཨོ་ག་ ཨོ་ཕེ་ཆོ་ཝ་ཡ། 20 ཧང་ཏེན་ཅ་གི་ལ་སྨོ་ ཨུ་ཉུ་པུརུས་ཀིན་ཨ་ཉི་རང་ དབང་པོ་མང་པུ་ཐུར༌ཅ། དག་པ་ཀབ་ཉི་ ལུས་པུ་ཤོ་ ཐུར་ཤ༌ཅ། 21 མིང་གི་ག་དང་ག་ ཇི་གི་ནཱན་མ་ཚཱས་པ་དག་ཉི་ ཡེག་པེ་མར༌བ། ཉི་ཨུ་ཉུ་པུརུས་ཀིན་ཨ་ཉི་རང་ ཤ་རང་གི་བི་ག་ཏཱན་ ཇི་གི་ནཱན་མ་ཚཱས་པ་དག་ཉི་ ཡེག་པེ་མར༌བ། 22 ལག་ཏང་ ཁག་ཆི་ལུ་མ་ལ་དག་ཉི་མི་ཁཱན་ ལུས་པུ་ག་ དབང་པོ་བ་ཆང་མ་ནེ་ལ་ ལའི་ཧང་རང་མ་ན་ཝ་རི༌ལེ། 23 ཉི་ཁག་མ་ཆི་ལ་དག་ཉི་མི་ཁཱན་ དབང་པོ་བ་ ཨ་ཤི་ གནམ་མེད་ས་མེད་ ལེག་པུ་ཨ་ཉི་ བདག་འཛིན་ཨན༌ཅ། ཉི་གེན་མེ་མ་ན་ཁཱན་ དབང་པོ་བ་ ཨ་ཤི་བུག་ཉི་ཐཱན༌ཅ། 24 གེན་མེ་ན་ཁཱན་ དབང་པོ་བ་ ཤུག་བདག་འཛིན་ ཨ་ལེ་ཁེ་ཝ་མཱན༌ཅ། དག་པ་ཀབ་ཉི་ དཀོན་མཆོག་གི་ དབང་པོ་ཐམས་ཅན་རང་ ཏབ་ཐུར་དོབ་ཐཱན་ ལུས་པུ་བཀོད་པ་ཀབ་ཉི་ ཁག་མ་ཆི་ཁཱན་བ་ ཁག་ཆི་ལུ་ཅོད་ཉི་གནང་མ༌ལ། 25 ཨོ་ཐེན་བཀོད་པེ་དེན་ཐ་ཤོ་ ལུས་པུ་ག་ནང་ཀ་ཆོ་ཁཱན་ དབང་པོ་བ་ མ་ཆ་མ་མ་རི་ལཱན་ མ་འདྲ་ཝ་ཆོ་ཁཱན་ དབང་པོ་བ་ཐམས་ཅན་གི་ ཐུར་དང་ཐུར་ག་དེན་གེ་ དོ་ལུ་ཨ་ཉི་ བདག་འཛིན་ཨན་ཆེན་དག་པ་གི་གི༌ལ། 26 དབང་པོ་ཐུར་ག་ནོད་ནེ་ལ་ བཱརའ་དབང་པོ་ ཐམས་ཅན་རང་ ནང་དོག༌པེ། ཉི་དབང་པོ་ཐུར་གི་ བསྟོད་པ་ཉོང་ནེ་ལ་ བཱརའ་དབང་པོ་ ཐམས་ཅན་རང་ རོག་ཀབ་ཉི་ཏབ་ཐུར་ ཤོ་ནང་ཕེ༌ལེ། 27 ཉི་ཨོམ་ ན་ཧ་བ་ཤོ་ ཁིརིས་ག་སྐུ་གཟུགས་གི༌ལ། ཉི་ན་ཧ་བ་ ཐམས་ཅན་རང་ རོ་ཀ་སྐུ་གཟུགས་ག་ དབང་པོ་བ་ཀ་དྲེ་ཀེ་ ཐུར་གི༌ལ། 28 ཆོས་ཚོགས་ནང་ཀ་ དཀོན་མཆོག་གི་ གོ་རང་ སྐུ་ཚབ་བ་ཀེ་ཉི་གནང་མ༌ལ། ཉི་ལུང་བསྟན་པ་བ་ ཀེ་ཉི་གནང་མ༌ལ། ཉི་སློབ་དཔོན་བ་ ཀེ་ཉི་གནང་མ༌ལ། ཉི་རྫུ་འཕྲུལ་ག་ལའི་ཨ་ཁཱན་བ་དང་ དྲག་པེ་ག་སེ་རབ་ཉོང་ཁཱན་བ་ ཉི་བཱརའ་ག་རུམ་ཁཱན་བ་དང་ བཱརའ་སོ་ངོ་བ་ཀ་ལའི་ཀེ་ཁཱན་བ་ ཉི་ཧ་མ་གོ་ཁཱན་ལོ་ཨ་ཁཱན་བ་ ཀེ་ཉི་གནང་མ༌ལ། 29 ཧང་ ཐམས་ཅན་རང་ སྐུ་ཚབ་གི་ལ་སྨོ། ཧང་ ཐམས་ཅན་རང་ ལུང་བསྟན་པ་གི་ལ་སྨོ། ཧང་ ཐམས་ཅན་རང་ སློབ་དཔོན་གི་ལ་སྨོ། ཧང་ ཐམས་ཅན་གི་རང་ རྫུ་འཕྲུལ་གེན་མེ་རེ་བེ་སྨོ། 30 ཧང་ ཐམས་ཅན་ག་ ན་ཚ་དྲག་པེ་ག་སེ་རབ་ཅ་སྨོ། ཧང་ ཐམས་ཅན་གི་ ཧ་མ་གོ་ཁཱན་ལོ་ཨ་ལེ་རེ་ཅ་སྨོ། ཧང་ ཐམས་ཅན་གི་ ཧ་མ་གོ་ཁཱན་ལོ་ག་དེན་ཐ་ ཁྲེ་བེ་རེ་ཅ་སྨོ། མར༌བ། 31 དག་པ་ཀབ་ཉི་ སེ་རབ་ཆི་ལུ་བ་ཉོང་པེ་ག་ སེམས་ཨ་ལེ་ཁེ༌ལེ། ཉི་ཐམས་ཅན་གེ་ལེག་པུ་ཁེ་པ་ ཇི་གི་ན་ཧ་གེན༌མེ༎ |