MAKTUB DO PAUL TOI CA TIT 3 - Kebu go dore go herua 1978

Ga Krist kai oré gogé

¹ Ji yagé kalang mam ca ké mer kalang ga ddo ca, dang ga dono, dda ké ja kual gogé bua, dda ké nyana gusugé ca lo gié go ddari goni goni mam bu’.

² Ddo ké yo kual go isini ca kema pena ’eno bua, ké bojé ’eno bu’, ama dda ké jala kalang ddaindigé bua, ké la olemang kalang mam waindo waindo bu’.

³ Cawa tumu na, na kalang ga mamiyong bua, na kalang ga térin bua, na kalang ga kaiyong cong bua, na goiyong gang tabelang do gusuna toi bua, dang gusu mowa go delinya kua goni goni mam bu’. Na jom duro wané bua, dang piné go gusuna bua, dang doré go gusuna bu’.

⁴ Ama kiddin ga Kumu go minyana ba gelina olum doi dang kederé ’yo gai ca kalang mam na,

⁵ ddi minyana ca gié guana go lo go geddang ’eno, ama ddi minyana ca olum doi, ddi pelna bua, ddi wanageng wo go herua dang Habé ga Kumu kai bu’.

⁶ Cawa Kumu bena Habé gai nain ca Jésu Krist go ba minyana.

⁷ Na ca wai doi ma, na belegeng kalang ga geddang tumu Kumu, na waigeng jomé goang cindena go bera kuddum go na wa tugoiei.

⁸ Kual lé kua na kual go geddang. ’Enung dar ca ji gumai yo cainé nain, ca kalang ga ba bu cindi ca Kumu na, ké ’era oré go geddang duro gié go ddari, kua na kual go ddari goang jégené ca kalang.

⁹ Kual go ’engeré to moin go din din, dang kual go mainyé go mam, dang bojé go so kalang coaderang ca so go Kumu koi na, ji kainyai cong ca na henga ga kalin ga basé jégené.

¹⁰ Kema go so kalang coaderang na, ji bi solé cain pena, do sua na, ji kainyi cong.

¹¹ Ji sol kema go main kain lé na, ddi kaiyonga ’enda, isinwa doi kaidé kual cai ka’.

Géjé go karu

¹² Kiddin ga ’enunga gi ni Artemas kau Tisik na, ji bia gusin kala ’erang waiang a Nikapolis. Cawa ’enung ’erem ca joma ba bera kebu kal dé.

¹³ Ji bia gusin gulang bagiyong Jénés, kang Apolos, ji begang henga ga bbalegé oré terga, ca ddo henga pena wiégé ’eno.

¹⁴ Na gad kalang gana na, ké gel gusugé gié go lo go ddari go geddang, ca ké jimang dono ca waié henga ga ké wa darégé, main kain na, ké go wia ’eno, ka jomang jégené bu’.

¹⁵ Ké ga wo kang nang mam na, ka lein labia. Lagé kajanderndena ga bo cindi labia mam bu’. Dda wai do Kumu toi jimang nageng mam.