MAKTUB DO PAUL TOI CA TIT 2 - Kebu go dore go herua 1978

Gelé go geddang

¹ Ama ji na, ji ya kual go ba bbal ca gelé go geddang.

² Ji yagé bainyong ga gemdong ga hadelong, ca ké jima kalang gang hormo ga nadurong bua, ga geddang duro bo cindi bua, dang kederé ’yo bua, dang angal bu’.

³ Ji yagé kandu ga gemdong ga hadelong main kain bu’, ca ké ’era oré go main kalang ga arin carara kain, ké nyilé kalang ’eno bua, ké jomé goiyong ga sur kangndo ka ’eno bua, ké geja géjé ga ddari bu’.

⁴ Ké geja kandu ga karang ca kederégé ’ya konderdégé dang karndigé bua.

⁵ Ca ké jima arin carara bua, ca ké la gié tagé gulong ddara bua, ca ké ja kual go konderdégé kogé ddara bua, ca ddo kema pena yo kual go isini ca kual go Kumu koi ’eno bu’.

⁶ Ji geja karang ga marné ca ké ’ima gusugé main kain bu’.

⁷ Ji bang kau, ji ’ima gusin duro gié go ddari mam, ca dda kalang ’yugelain main kain bu’. Ji gelgang kederé baria dang cindin ga bedang bu’.

⁸ Ji ya kual go geddang ca ddo ké nyilein ’eno, main kain na, dasé da lé ké ga tebenang nain, cawa ké wa kual go isini gusuna ’eno.

⁹ Ji geja goiyong ca na gad ké ja kagulondigé kual gogé bua, ké muagé gusugé ca henga mam bua, ké mainyé kual ’eno bu’.

¹⁰ Ddo ké koiégé ’eno, ama dda ké gel ddaru dang geddang dogé waindo waindo, ca ké bu Kumu go minyana gelé goi hormo.

¹¹ Cawa Kumu gel wai doi ca minyé kalang mam.

¹² Wai lé gelna ca na kainya henga ga isini, dang tabelang do delinya toa cong, ca na ’ima gusunang duro geddang ca Kumu a duro delinya lé kua.

¹³ To gelna ca na jimang tugoié ca wolé go gusu mowa, kiddin ga hormo do Kumu guana go gumu dang Bagulondena Jésu Krist togé da gel waldong wang.

¹⁴ Ddi bu gusi ca ddia toarana a duro isinwa doni doni mam, ca ddi belana kalang gai ga arin carara dang tabelang ca lo gié go ddari bu’.

¹⁵ Sela, kua na henga ga jia gelgang nagé, ji gejagé bua, ji bberajagang dono doin mam bu’. Ddo kema pena a duroigé dorein kel ’eno.