Jâ 21 - Kebu go dore go herua 1978

Jésu gel gusi cin anjama ga jurgum

¹ Kardené sam, Jésu gel gusi cin anjama dang com, kiddin ga ké wo kebu tagu do ké ba ta Taberiat. Sela, ddi gel gusi cindegé main kain.

² Simon Piér kang Tomas (go ké ba tei Mugena), kang Nataniél (go Kana do Galali), Ka Sébedé karndi, kang anjama ga Jésu kai ga pena sua wo kenang nagé.

³ Simon Piér yégé wa: ’Enung ’ya ’uré. Ké yei wa: Ni kau, ni orang nain bu’. Ké ’yé, ké nai duro kuburo. A duro soindo lé na, ké ’ima gusa pena ’eno.

⁴ Kiddin ga teba wa andong na, Jésu ’erga ’eré kebu gung, ama ga anjama sela ca na kondi ’eno.

⁵ Kardené Jésu ’engergé wa: Marné, keng ’yom gusa ga? Ké jogu yei wa: Ni ’ima henga pena ’eno.

⁶ Ddi yégé wa: Ga bega lau a kuburo kuabi go barua, main kain na, kenga ’yom gusa. Ké bé lau main Jésu ba yegeng lé kain kerab. Kardené ké bbalang ca seré lau lé ’eno ca gusa ninwa goi.

⁷ Anjama go Jésu kederei ba ’yei yei Piér wa: Na Bagulong. Kiddin ga Piér ba jé na Bagulong na, ddi si badigé gai gusi (cawa ddi nyiré badigé gai dugo) kardené ddi ba cin kang.

⁸ Anjama kané lé ’yéni kebu gungang kuburo, ké sergu lau wonang gusa, ka suguddong dang gung ’eno, bbal main oré guaddang aru pena kain.

⁹ Kiddin ga ké ba naga kebu gung na, ké sol gusa go paié dang debé ca tua dang wo bu’.

¹⁰ Jésu yégé wa: Ga ’nyimgeng dang gusa go pena go keng ba ’imgai.

¹¹ Simon Piér nai duro kuburo, ddi sergu lau lé wonang gusa go gemdong kebu gung. Ké ddogin gusa lé main aru pena dang to bai ca subu kain. Gusa lé combu main kain kua na, lau dogé lé sagang ’eno.

¹² Jésu yégé wa: Ga ’erageng dang, dda na di do. Cawa ga anjama ba sol ca na Bagulong na, kema pena a duroigé wo ’eno go ’engeri wa: Jia wang ga?

¹³ Jésu yé gusugé, ddi ai wo, ddi bigé, ddi bigé gusa main kain bu’.

¹⁴ Kua na Jésu gelé goi go gusi go cai subu cin anjama gai, kiddin ga ddi ba belang cindi a duro ga maré.

Jésu kang Piér

¹⁵ Kiddin ga ké ba di do ka na, Jésu ’enger Simon Piér wa: Simon, Jâ kurondi, kederein ’yonga nain, ddi kané ga? Ddi jogu yei wa: ’I Bagulong, ji sol ca kedereng ’yeinya ’yo. Jésu jogu yei wa: Ji maga gamgé gang karndigé.

¹⁶ Kardené ddi jogu ’engeri go cai sua com: Simon, Jâ kurondi, kederein ’yonga yo ga? Ddi jogu yei wa: ’I Bagulong, ji sol ca kedereng ’yeinya ’yo. Jésu jogu yei wa: Ji maga gamgé gang.

¹⁷ Kardené ddi jogu ’engeri go cai subu com: Simon, Jâ kurondi, kederein ’yonga ’yo ga? Piér kederei homi nain bbani ’eno ca ’enger go Jésu ba ’engeri cai subu wa: Kederein ’yong ga? Ddi jogu yé wa: Bagulong, ji sol henga mam, ji sol ca kedereng ’yeinya ’yo. Jésu jogu yei wa: Ji maga gamgé gang.

¹⁸ ’Enung wa yoinya cindi waldong wang: Kiddin ga jiang karmai na, ji banga saddé bbalé goin toin, ji ’yé kiddin ga kederein ba dar oré kené, ama kiddin ga jia belé hal na, jia tar kalndin, kema go ddang da saddin, ka golin ’yeinyang kiddin ga kederein dara ’oré kené ’eno.

¹⁹ Jésu yégé kual lé kua ca gelgé maré go Piér koi go ddi da ma, na maré go boi Kumu hormo. Kardené Jésu yei wa: Ji kubang.

Jésu kang anjama go kederei ba ’yei

²⁰ Piér belé cindi, ddi sol anjama go Jésu kederei ba ’yeiang ’eré kardi, na ddi go ddengé gusi gusu Jésu kiddin ga ké ba jom kebu do, ddi ’engeri wa: Bagulong, na wanga go aiin gangeldin ga?

²¹ Piér soli, ddi ’enger Jésu wa: Bagulong, kema lé, ka la wa dang nai ga?

²² Jésu jogu yei wa: ’Enung nia dara ca ddi jima bera jogang guang ba kau, dulain ’eno, ji kubang.

²³ Kual lé aju gusu kamdi, na anjama la go maré ’eno. Ama Jésu yei Piér wa: Piér, ca ddia ma ’eno na, na kain ’eno, ama ddi yei wa: ’Enung nia dara ca ddi jima bera jogang guang ba kau, dulain ’eno.

²⁴ Anjama go yo kual lé na, ddia pasé kual lé bu’, na sol ca kual goi na cindi.

Kual toi do karé

²⁵ Jésu lé gié go ddang combu. Ké nia pasa kual go gié goi lé koi mam na, ’enung ’erema ca delinya mam ni go bbalé ’yo cidab do ké ba paso lé ’eno.