GIÉ GO PAJERONG GA GIÉ KOGÉ 28 - Kebu go dore go herua 1978

Paul a ca kema go Malta

¹ Kiddin ga ni ba minyé labia na, ni sol ca ké té kema lé Malta.

² Kalang ga ca kema go Malta lé léni ddarua bbani ’eno. Ké goidéni nain bu’. Kiddin ga kang ba hongu na, kal léni, ké jagéni tua, ni yobu.

³ Kiddin ga Paul wa nyimé haiyong ca bogé cin tua na, kumbulo go pena andegang a duro haiyong lé ca tua ’elua gua temdé kobi.

⁴ Kiddin ga kalang ga gulong ba sol kumbulo temdé Paul kobi main kain na, ké yé gusugé wa: Cindi kema lé kua na kema go deddé kiddin, ddi mingu gusi cin kurai go gumu go ddoaga, ama Kumu go geddang ddai ca kondia Jomang cindi ’eno.

⁵ Ama Paul wijé kumbulo lé cin tua, henga ga isini pena lai ’eno.

⁶ Ga pena ’erem ca kobia sai, kau kondia da aserong a kiddin lé padda ma, ké soli sam, ama kiddin ga ké sela henga ga isini pena lai ’eno na, ké cogel kebegé yé wa: Kema la kumu go pena.

⁷ Kema go gumu go ca kema lé go ké tei Publus yagé goia ’yoabang kiddin lé, ddi ’yeni gusi bua, ddi léni terga wolé subu dang gusu mowa bu’.

⁸ Publus bai woi ca gasulong cawa ddianga hoamya do dur, dang bbesé go kebar bu’. Paul ’yé soloi, ddi ol cai, ddi si kobi cai, ddi wai labia.

⁹ Kardené kalang ga hoamya ga ddang a ca kema lé mam ’yé gusi, ké wai labia bu’.

¹⁰ Ké bini hormo bbani ’eno, kiddin ga ni ba nai kuburo na, ké béni henga bbalni ca orang tumu.

Paul ’yé Rom

¹¹ Kiddin ga ni ba lé kederé subu na, ni nai duro kuburo go Alésandré go ké ba tei kumu go mogené, ddi ji ca kema lé bera terboi ka.

¹² Ni ’yé ca gulong go gumu go Sirakus, ni lé kené wolé subu.

¹³ A kiddin lé na, ni dal kebu gung ca oré Régio, waindo na, kal yaga a kuaba go goiyong, duro wolé sua ni ’yé Pusol.

¹⁴ A duro gulong go gumu lé na, ni wai karmeni, ké olni ca nia jima la wolé jurgum dang nagé, kardené ni ’yé Rom.

¹⁵ Kiddin ga karmeni ga a Rom ba jé kual go nia wa oré na, ké ’erga ca yaleni to gasgo do Apus dang kiddin ga Kuliyong Subu wo kené ca kergé, kiddin ga Paul ba solgé na, ddi lé Kumu désé nain, ddaindi jali bu’.

¹⁶ Kiddin ga ni ba ’yé Rom na, ké ddé Paul kondia jima kaindi dang asengar go magei.

Paul dor kual go Kumu koi a Rom

¹⁷ Kiddin ga ni lé wolé subu kené na, Paul té gemdong ga Juib kagé a Rom tai gulong. Kiddin ga ké ba yau na, ddi yégé wa: Karmeng, ’enung la henga ga isini pena dang kalang gana ’eno bua, ca hada do moinderana togé ’eno bu’, ama ké ’yomung a Jorsalem bung kuaba ga Rom.

¹⁸ Kiddin ga ké ’enger kual guang toi na, ké dar ca ka buagang dang, cawa ké wa kual cang bbalé deddeng ’eno.

¹⁹ Ama kiddin ga ga Juib kain kual lé cong na, ’enung sai yégé ca ’enung ora tumu go ddo ca, ama ’enungang kual go isini go so ca kalang gang ’eno.

²⁰ Na ca ma ’enung tegeng ca yogeng kual lé kua, ké saddung dang kunja lé kua ca ddi go kalang ga Israél ba si tugoié gogé cai.

²¹ Ké yei wa: Ni waia maktub pena kuaba kalang ga Judé ca kual goin ’eno bua, kerméni pena sang a kuani ’erang ca so kual go isini cain tumoini ’eno bu’.

²² Ama ni dar ca jo kual go ji ’erem dé, cawa ni sol ca kalang sai dang kual kiddin gani gani mam ca kual go ji wa yogé kalang gain.

²³ Ké boi Paul wolé go pena. A duro wolé lé na, ké jiga combu ca waii a kiddin ga ddi ba jom kené. Joguddu bera borndo na, Paul dorgé kual ca Leu do Kumu toi, ddi gelgé kual go Jésu koi dang duro, dang so go Mois koi bua, dang kual go ga cogelé kebu go Kumu koi kogé bu’.

²⁴ Ga pena jé kual go ddi ba yégé, ama ga pena kain bo cindi cong.

²⁵ Kiddin ga ké ba main kual duroigé na, ké sai ca oré, ama Paul yégé kual pena, ddi yégé wa: Habé ga Kumu kai ya kual go cindi kiddin ga ké yégé moinderegeng kual a kebu go cogelé kebu go Kumu koi Esai, ddi yégé wa:

²⁶ Ji ’era gusu kalang lé, ji yagé wa: Keng jé ddar, ama keng sela to ’eno, Keng sol ddar, ama keng sela to ’eno bu’,

²⁷ Cawa ’eremé go kalang lé kogé bela todero, Ké si bbulo gésemégé bua, Ké lebedé cindegé bu’, Ca ka solang cindegé ’eno bua, Ca ’eremé goga solé kual lé toi ’eno bu’. Kumu yé wa: Ka belang gusung ’eno ca ’enunga da bigé labia.

²⁸ Paul jogu yégé ddang com: Keng sol ca Kumu gi minyé goi gusu kalang ga toigé ddang, ké ddain da jé kual lé. [

²⁹ Kiddin ga Paul ba yégé kual lé na, ga Juib sai ’yang mainyé go gusugé combu.]

³⁰ Paul jom ddegelé sua duro kulu go ddi ba bidei kalang ga ba yé ca solei na, ddi ’yégé gusi mam.

³¹ Ddi dorgé kual go ca Leu do Kumu toi bua, ddi gelgé kual go Bagulong Jésu Krist koi basé muro, kema pena narai ’eno.