Santiago 1 - Porciones del Nuevo Testamento en el idioma Letuama

Judíorãka Jesucristore yiꞌyurãroꞌsi ᵽaᵽera oꞌotirã Santiagore ᵽũataeka

¹ Yaje mija ime yijeyomarã. Tuᵽarã, suᵽabaatirã maĩᵽamaki Jesucristore yaᵽaika uᵽakaja baarijayuka Santiago ñime ika ᵽaᵽera mijaroꞌsi ᵽũataiki. Baꞌiaja jũawaꞌri ᵽibikarã, aᵽetomaja watoᵽekarã ĩꞌᵽoũꞌᵽuarãeꞌearirakatata judíorãka imarãroꞌsi ika yoꞌoyu.

Kire majẽñemaka õrĩwãrũrika Tuᵽarãte mare jaꞌatayu

² Mija ãꞌmitiᵽe yijeyomarã. Baꞌiaja jũarijayurã imakoꞌomakaja, “Jia jĩjimaka oyiaja yijaroꞌsi simarãñu”, ãrĩᵽuᵽajoairã mija imabe.

^3-4 Suᵽa imarĩ baꞌiaja mijaroꞌsi simakoꞌomakaja jiibaji Tuᵽarãte ãꞌmitiriᵽẽairã mija imarijayu. Iꞌsuᵽakajaoka, “Kire mayiꞌrijaꞌataberiyeꞌe”, ãrĩwãrũirã mija ime. Wayuᵽiꞌribekaja kire yiꞌriwaꞌri samija rakajeᵽããrãñu. Jiibaji Tuᵽarãte yaᵽaika uᵽakaja mija jaᵽakãꞌã dakoa mijaroꞌsi jariwaꞌribesarãka.

⁵ Suᵽa imarĩ baꞌiaja mija jũaika ᵽoto, “Ikuᵽaka yija imarika Tuᵽarãte yaᵽayu”, mija ãrĩwãrũberiyeꞌe, kire mija jẽñebe. Iꞌsuᵽaka mija baamaka jiaᵽi mijare sakiõrĩrũjerãñu, ritaja nayaᵽaika uᵽaka ᵽoꞌimajare jeyobaarimaji imarĩ.

^6-8 Toᵽi kire jẽñebaraka, “Yijare sakiõrĩrũjebesarãñu jeꞌe aᵽeyari”, mija ãrĩᵽuᵽajoaꞌsi. Õrĩkõrĩ: Rukubaka ᵽuᵽajoabaraka imarijayurã ᵽuri ĩꞌrãroka ᵽuᵽajoabaraka imawãrũbeyurã. “Aᵽerikuri yija jẽñeika uᵽakaja yijare kĩjibesarãñu jeꞌe”, ãñurã nimamaka, dakoa nare kiõrĩrũjebesarãñu.

⁹ “Wayuoka baairã yija imakoꞌomakaja, Jesucristore ãꞌmitiyurã imarĩ, Tuᵽarã wãjitãji imatiyairã yija ime”, ãñurã ᵽuri jĩjimaka imarã.

¹⁰ Mia, rĩkimaka baꞌirĩjia rikairã wejeareka ñoaka imarũkimarĩrã nime. Tuᵽarãre takaja yiꞌriwaꞌri, “Imatiyabeyurã yija ime”, ãrĩwaꞌri jĩjimaka nime.

¹¹ Jãjia ijia yaamaka taya jĩñu, sõꞌõrika jũjiᵽatawaꞌri jiyurika sõibeyu. Mijare yibojaika uᵽaka nime rĩkimaka baꞌirĩjia rikairã. “Rĩkimabaji matõᵽoerã”, ãrĩwaꞌri sawaᵽa niñerũ moꞌarĩji reyarũkirã nime.

“Kaꞌwisika jũariᵽotojo yire yiꞌriwaꞌri sarakajeᵽããrijayurãte jia yibaarãñu”, Tuᵽarãte ãñu

¹² Kaꞌwisika jũarijayurã imakoꞌomakaja okajãjirã imarĩ, samarakajeᵽããika ĩatirã, “Jia yire nayiꞌyu”, Tuᵽarãte mareka ãrĩrãñu. Suᵽa imarĩ, “Yika imariyaᵽawaꞌri yire yiꞌyurãte õñia imajiᵽarika yijaꞌatarãñu”, Tuᵽarãte ãrĩka simamaka jia mare kibaarãñu.

¹³ Baꞌiaja mija baarijitoyeꞌe, “Tuᵽarã yire sajãꞌmeiki”, ãᵽekaja mija imabe. Tuᵽarã ᵽuri, baꞌiaja baajitobeyuka, suᵽa imarĩ, baꞌiaja mare kibaarũjebeyu.

^14-15 Maᵽuᵽakarãja baꞌiaja baarika ᵽuᵽajoatirã, “Jia yiroꞌsi simajĩñu jeꞌe”, mañu. Iꞌsuᵽaka ᵽuᵽajoawaꞌri baꞌiaja mabaarijayu. Suᵽabaatirã baꞌioyiaja mabaarãkareka, baꞌiaja imarika tiyibeyurõꞌõrã aꞌrirũkirã maime.

Tuᵽarãtaki ᵽuri baꞌiaja mare baarũjebeyuka

¹⁶ Iꞌsuᵽaka simamaka, “Tuᵽarã yijare sajãꞌmeiki baꞌiaja yija baaokaroꞌsi”, ãrĩwaꞌri ᵽakirika mija ᵽuᵽajoaꞌsi yijeyomarã.

¹⁷ Iꞌsuᵽaka mare imarũjebeyuka imarĩ, jia Maᵽaki Tuᵽarãte mare baayu, kiyaᵽaika uᵽakaja marikatuyaokoroꞌsi. Kiᵽoꞌijiaekakaka sime, aiyaka, tãꞌᵽia, aᵽea ritaja. Sarãꞌrãrika, sayaaboaikaoka wiririjayua sime. Tuᵽarã ᵽuri oꞌabeyuka imarĩ, jia ima oyiaja mare jaꞌatajiᵽaki.

¹⁸ Suᵽa imarĩ rita imaroka mayiꞌᵽakãꞌã õñia kika maimajiᵽarũkia Tuᵽarãte mare jaꞌatatika. “Yirirã nimarũ”, mareka kẽrĩtika simamaka ritaja aᵽerã kiᵽoꞌijiaekarã ruᵽubajirã kire yiꞌriũꞌmuekarã maime.

Tuᵽarãrika bojariroka ãꞌmitiritirã sima uᵽakaja mayiꞌririjariyeꞌe

¹⁹ Yijeyomarã, mijare yibojaerã baaika mija yeꞌkariritiyaꞌsi. Tuᵽarãrika bojariroka mijare bojarãñurãre jia mija ãꞌmitiriᵽẽabe. Mija ᵽuᵽakareka imaoka ñojimarĩtaka nare bojabekaja mija imabe. Suᵽabaatirã ñojimarĩtaka nare mija boebariaꞌsi.

²⁰ Toᵽi ᵽuri waᵽuju boebayurã maimarãkareka, jiirokaᵽi maimarika Tuᵽarãte yaᵽaika uᵽaka maimabesarãñu.

²¹ Suᵽa imarĩ ritaja baꞌiaja baarika mija jaꞌatabe. “Tẽrĩriki ñime”, ãrĩkoᵽeikite ᵽuᵽajoaika uᵽaka ᵽuᵽajoabekaja mija imabe. Suᵽa imarĩ, Tuᵽarãrika bojariroka mijare kiõrĩrũjeikakaka takaja jiaᵽi mija yiꞌririjaᵽe. Iꞌsuᵽaka mija imarãkareka baꞌiaja imarika tiyibeyurõꞌõrã mija aꞌrirũkia imakoᵽeikareka Tuᵽarãte mijare tããrãñu.

^22-24 Õrĩwãrũikõrĩ jeꞌe: Ĩꞌrĩkate kiᵽema ũᵽeriaᵽi yaetirã keꞌrirãka beꞌerõꞌõ, “Ikuᵽaka ᵽuri yiᵽema imakoꞌo”, ãrĩwãrũbeyuka kime. Ñojimarĩ kiyeꞌkaririrãñu. Iꞌsuᵽaka mija imajĩñu Tuᵽarãrika bojariroka ãꞌmitiririᵽotojo samija yiꞌriberijĩkareka. Tuᵽarãrika bojariroka ãꞌmitiritirã sãñu uᵽakaja yiꞌrirũkia sime. Suᵽa mabaabesarãkareka ᵽuri, “Tuᵽarãte yiꞌyurã yija ime”, mañua, moñu uᵽakaja maᵽakiyu.

²⁵ Tuᵽarãrika bojariroka jia wãrũbaraka sayiꞌririjayukate ᵽuri, baꞌiaja baarika kire sajaꞌatarũjerijayu. Rita sime Tuᵽarãrika bojariroka. Suᵽa imarĩ sayeꞌkariribekaja, sajãꞌmeika uᵽakaja baarijayukate, ritajareka jia kire sakijeyobaarijarirãñu.

²⁶ Aᵽerimarã ᵽuri, “Tuᵽarã ñakoareka, kire jiyiᵽuᵽaka õñurã imarĩ, kiyaᵽaika uᵽakaja baarijayurã yija ime”, ãñurã. Imakoꞌomakaja baꞌiaja najairijayua jaꞌatabeyurã imarĩ, noñu uᵽakaja ᵽakirimaja nime. Iꞌsuᵽaka imarã nimamaka, “Tuᵽarãte jiyiᵽuᵽaka õñurã yija ime”, narĩkoᵽeika waᵽamarĩa sajayu.

²⁷ Maᵽaki Tuᵽarãreka ikuᵽaka nime kire jiyiᵽuᵽaka õñurã: Ᵽakiamarĩrã jarikarã wayuoka baairãte, suᵽabaatirã natĩmiaka reyataᵽaekarãteoka jia jeyobaairã, iꞌsuᵽakajaoka baꞌiaja baarimajare ima uᵽaka jaribeyurã nime.