Ap 9 - Porciones del Nuevo Testamento en el idioma Letuama

Koᵽea tiyibeyuakaka

¹ Torãjĩrã aᵽika tromᵽeta ᵽuᵽuraᵽaki ate. Iꞌkire saᵽuᵽuraᵽarõꞌõjite tãꞌᵽi uᵽaka ĩoika ñaꞌrãᵽaka. Iꞌki imaraᵽaki koᵽea tiyibeyua wierũkia Tuᵽarã kire ĩjikaki.

² Suᵽa imarĩ, saᵽi koᵽea kiwieraᵽe. Sakiwieraᵽaka ᵽoto, ᵽeka jãjia jũꞌrẽwaꞌri ũmakaᵽuyu uᵽaka saᵽi ᵽoraᵽaka. Ritatojo wejeᵽemarã sakoyimaka aiyare neiñamitaꞌraᵽe.

³ Iꞌsia ũmaka watoᵽekaᵽi rĩkimakaja ñimia kãrĩᵽoraᵽaka noꞌojariwaꞌririmarĩa ritatojo wejeareka simaraᵽe. Ñimia imakoꞌomakaja kũaᵽarãka uᵽaka tuteika Tuᵽarãre nare imarũjeraᵽe.

⁴ Suᵽa imarĩ, “Taya, yaᵽua, õterikia mija bitataꞌsi”, ãrĩwaꞌri Tuᵽarãre okajããeka simaraᵽe. “ ‘Tuᵽarãriki kime ĩꞌĩ’, ãñua wãmea nakũꞌarã oꞌojĩꞌaberikarãre oyiaja baꞌiaja mija baabe”, Tuᵽarãre ãrĩka simaraᵽe.

⁵ “Baꞌiaja ᵽoꞌimajare mija jũarũjebe”, Tuᵽarãre ãrĩka simakoꞌomakaja, “Ᵽoꞌimajare mija jããbe”, kẽrĩberika simaraᵽe. Suᵽa imarĩ ĩꞌrãᵽitarakamarã aiyarõꞌõjĩrã ᵽoꞌimajare tutebaraka sakimarũjeraᵽe. Iꞌsuᵽaka kijãꞌmeraᵽakaᵽi ãrĩwaꞌri nare satuteka, kãmia kũaᵽarãka tuteika yiꞌaika uᵽaka sayiꞌamaka jimarĩ baꞌiaja ᵽoꞌimajare jũaraᵽe.

⁶ Ikuᵽaka simarãka ᵽoto jimarĩ ᵽoꞌimajare reyariᵽakataꞌrikoᵽerãñu. Imakoꞌomakaja reyawãrũbesarãñurã nimarãñu.

^7-8 Ñiaraᵽakareka ñimi uᵽaka imaraᵽarã jĩñaokoroꞌsi imatika kawarurãkare ima uᵽaka nimaraᵽe. Suᵽabaatirã ᵽoꞌimaᵽema uᵽaka ᵽemakirã, orokaka baaeka buꞌya naruᵽukoꞌarã tuaekarã, ñoaka ruᵽukirã nimaraᵽe. Noᵽia ᵽuri yaioᵽia uᵽaka ĩoka imaraᵽaka.

⁹ Ĩꞌrã ñiaraᵽarã ᵽeruakaka baaeka waꞌitĩtia ĩoika jããirã nimaraᵽe. Nawiraᵽaka ᵽoto jimarĩ sokaarikoraᵽe, tũrũrũkia yiewaꞌᵽaraka rĩkimaka kawaru rĩñua okaayu uᵽaka.

¹⁰ Ĩꞌrãjaoka nimaraᵽe ñimia imakoꞌomakaja kũaᵽarãka uᵽaka ᵽĩkokirã. Iꞌsuᵽaka imaraᵽarã imarĩ ĩꞌrãᵽitarakamarã aiyarõꞌõjĩrã ᵽoꞌimajare tutebaraka nimaraᵽe.

¹¹ Suᵽabaatirã niᵽamaki ángel mirãki, koᵽea tiyibeyua ĩᵽamaki kimaraᵽe. Hebreo okaᵽi Abadón, griego okaᵽi ᵽuri Aᵽolión wãmeiki kimaraᵽe. Riatarimaji ãrĩrika simaraᵽe kiwãmea.

¹² Iꞌsuᵽaka simaraᵽe mamarĩtaka baꞌiaja jũaũꞌmurũkia. Iꞌsia beꞌrõ ĩꞌᵽakuri baꞌiaja jũarũkia jariwaꞌriñujuraᵽaka ruᵽu.

¹³ Iꞌsuᵽaka simaraᵽaka beꞌrõ aᵽika tromᵽeta ᵽuᵽuraᵽaki. Kiᵽuᵽuraᵽakarõꞌõjĩte Tuᵽarã wãjitãji kire joeĩjiritẽrĩa orokaka baaeka botarakabi wakaika watoᵽekaᵽi sajaikoraᵽe.

¹⁴ Suᵽabaatirã tromᵽeta torã ᵽuᵽuraᵽaki ángelre ikuᵽaka sãrãᵽaka ñaꞌmitiraᵽe: —Riaᵽakiaka Éufrates wãmeiriarijerã botarakamarã jiꞌaᵽaekarã ángelrãkare mikototabe,==sãᵽakãꞌã ñaꞌmitiraᵽe.

¹⁵ Iꞌsuᵽaka sãrĩkoraᵽaka ᵽoto botarakamarã ángelrãkare kikototaraᵽe. Ritatojo wejeareka imarã ᵽoꞌimajare ñeꞌmetãji rokajĩrã najããᵽataokoroꞌsi, “Iꞌsiwejejẽꞌrãreka, iꞌki aiyareka, iꞌsirĩmireka, iꞌtojĩrã aiyajẽraka imarãka ᵽoto nare mija jããbe”, ãrĩwaꞌri kijãꞌmetikarã nimaraᵽe.

¹⁶ Nare kikototaraᵽaka beꞌrõ rĩkimarãja surararãka kawaru ᵽemarã tuyumaka ñiaraᵽe. “Doscientos millones rakamarã nime”, sãrĩkoraᵽaka ñaꞌmitiraᵽe.

¹⁷ Suᵽa imarĩ makãrãrũñuroka uᵽakaᵽi ñiamaka naroꞌsi oyiaja ᵽeruakaka baaeka jããirã nimaraᵽe. Jũꞌaᵽañaka yaꞌtarika, neiᵽañaka jĩꞌmia, suᵽabaatirã azufre uᵽaka jũꞌsiᵽoa simaraᵽe najĩrĩrikoꞌa. Iꞌsuᵽakajaoka kawaru imakoꞌomakaja yaia león ruᵽukoꞌa uᵽaka ruᵽukoꞌakirã nimaraᵽe. Narijokoᵽeaᵽi ᵽeka, ũmakaka, suᵽabaatirã dajaka jĩsia azufre ᵽoraᵽaka.

¹⁸ Iꞌsiarakabaꞌi kawaru rijokoᵽeareka ᵽoraᵽaka imarĩ, ritatojo wejeareka imarã ᵽoꞌimajare ñeꞌmetãji rokajĩrã reyaᵽataraᵽe.

¹⁹ Suᵽabaatirã ãñaruᵽukoꞌa uᵽaka ᵽĩkoika imatiirã, sarijokoᵽeaᵽi, saᵽĩkoᵽioka baꞌiaja ᵽoꞌimajare kãmibaaika simaraᵽe.

²⁰ Rĩkimarãja ᵽoꞌimaja õñia imañujurã nabaarijayua jaꞌataberaᵽarã ruᵽu. Suᵽabaatirã Satanárika ima jiyiᵽuᵽayeerimaja imarĩ, waᵽuju ima jẽrãka orokaka, ᵽlatakaka, broncekaka, ãtakaka, yaᵽuakaka baabaraka nimaroyiraᵽe sajiyiᵽuᵽayeerijayaokoroꞌsi. Yoibeyua, turibeyua, ãꞌmitiribeyua simakoꞌomakaja jiyiᵽuᵽaka sõrĩbaraka nimarijaraᵽe ruᵽu.

²¹ Suᵽabaatirã ᵽoꞌimajare jããrika, yeꞌoaᵽi aᵽerãre nabitarijayua, rõmitika nawãꞌimayua, nakareeꞌerijayuaoka jaꞌatabeyurã nimaraᵽe.