Ap 7 - Porciones del Nuevo Testamento en el idioma Letuama

144,000 rakamarã Israel kaꞌiakarãre Tuᵽarãre ĩarĩrĩrãñu

¹ Torãjĩrã ate botarakamarã ángelrãkare ñiaraᵽe. Ĩꞌrĩka jãꞌãtiᵽẽꞌrõtoᵽi, aᵽika wayeruᵽitikaᵽi, aᵽika wejerĩrĩkaᵽi. Suᵽabaatirã aᵽika aᵽeᵽẽꞌrõto wejerĩrĩkaᵽi narĩkataraᵽe. Narĩkamayu rõꞌõᵽi riaboꞌirã, yaᵽuboꞌirã, kaꞌiarã wĩrõa baeika nabaetiyirũjeraᵽe.

² Torãjĩrã aᵽika ángelre jãꞌãtikaᵽi iꞌtamaka ñiaraᵽe, Tuᵽarã, õñia imajiᵽarimaji wãmea oꞌojĩꞌarũkia rikatirã. Suᵽabaatirã aᵽerã ángelrãka riaᵽakiaka, kaꞌia baꞌiaja Tuᵽarãre baarũjekarã ᵽõꞌirã etatirã jãjirokaᵽi ikuᵽaka kẽrãᵽe:

³ —Yaᵽua, riaka, kaꞌia mija bitataꞌsi, ma Tuᵽarãre yaᵽaika uᵽakaja baarimaja kũꞌarã kiwãmea yija oꞌojĩꞌayeꞌe ruᵽu. Suᵽa nare yija baarãka beꞌerõꞌõ, samija bitataᵽatabe,==

^4-8 Torãjĩrã mae, —Nimauᵽatiji Israelkarã Tuᵽarã wãmea yija oꞌojĩꞌarũkirã 144,000 rakamarã nime,==sãrĩkoᵽakãꞌã ñaꞌmitiraᵽe. Ikuᵽaka wãmeirã nimaraᵽe ĩꞌᵽoũꞌᵽuarãeꞌearirakatata: Judá wãsa tatakarã doce mil rakamarã nimaraᵽe. Aᵽetataoka iꞌsiarakamarã oyiaja nimaraᵽe, ikuᵽaka wãmeirã: Rubén, Gad, Aser, Neftalí, Manasés, Simeón, Leví, Isacar, Zabulón, José, Benjamín. Ĩꞌrãtata uᵽakaja doce mil rakamarã nimaraᵽe.

Rĩkimarãja saya boia jããirã Tuᵽarãre jiyiᵽuᵽayeebaraka imaraᵽarã

⁹ Iꞌsia beꞌerõꞌõ Tuᵽarã ruᵽarikũmu wãjitãji, Oveja weiwaꞌyua uᵽaka imaki wãjitãji rĩkimarãja ᵽoꞌimajare rĩkamaᵽakãꞌã ñiaraᵽe. Ĩꞌrãkaꞌikarãmarĩrã, ĩꞌrãwejekarãmarĩrã, ᵽoꞌimaja ritaja oka jairã, ritaja ᵽoꞌimajatata uᵽatiji marãkãꞌã baatirã majoaᵽataberijĩñurã. Suᵽabaatirã nimauᵽatiji saya boia jããtirã neꞌejĩjoa ĩoika rikabaraka imarã nimaraᵽe.

^10-11 Toᵽi mae jĩjimaka imawaꞌri jãjirokaᵽi ikuᵽaka narãᵽe: —Jãꞌmebaraka Tuᵽarãre ruᵽarijayurõꞌõrã ruᵽaki, suᵽabaatirã Oveja weiwaꞌyua uᵽaka imaki ĩꞌᵽarãwãꞌtaja jiamarĩareka mare tããrimaja nime,==Ᵽoꞌimajare ãñukãꞌãja, Tuᵽarã ruᵽarikũmu wãꞌtarã botarakamarã maikoribeyu uᵽaka imarãre imaraᵽe. Suᵽabaatirã veinticuatro rakamarã ᵽakiarimarãre ima ᵽẽterõꞌõᵽi, naruᵽurõꞌõᵽioka ritaja nimauᵽatiji ángelrãkare rĩkajiyeraᵽe. Suᵽabaatirã nimauᵽatiji namoꞌiᵽãñawaꞌraᵽe kiruᵽarikũmu wãjitãji Tuᵽarãre jiyiᵽuᵽayeebaraka.

¹² Suᵽabaatirã jiyiᵽuᵽaka Tuᵽarãre õrĩwaꞌri, ikuᵽaka jaibaraka nimaraᵽe: —Rita sime. “Jiitakiji mime”, ᵽoꞌimajare ãrĩrijarirũkika mime. Ritaja ᵽemawaꞌribaji jiitakiji mime, ritaja õñuka, “Jiitaka yijare mibaarijayu”, mire ᵽoꞌimajare ãrĩrijarirũkika mime. Ritaja ᵽoꞌimaja jiyiᵽuᵽaka mire õñurã, tẽrĩritakiji mimamaka, maki aᵽika mire ᵽemawaꞌribaji tẽrĩriki imabeyuka. Tuᵽarã, iꞌsuᵽaka oyiaja miroꞌsi simarijarirũ,==ãrĩbaraka nimaraᵽe.

¹³ Iꞌsuᵽaka narãᵽaka beꞌrõ, ĩꞌrĩka ᵽakiakire ikuᵽaka yire ãrãᵽe: —¿Marã nime saya uᵽaka ima jariroaka boia jããtirã imarã? ¿Noꞌokarã nime?==yire kẽrãᵽe.

¹⁴ Suᵽa kẽᵽakãꞌã, —Õrĩbeyuka yiꞌi. Miꞌi ᵽañaka õñuka jeꞌe, yire samibojabe,==kire ñarãᵽe. Suᵽa kire ñaᵽakãꞌã ikuᵽaka yire kibojaraᵽe: —Jiamarĩa jũarũkijẽꞌrãka seyamaka sareka baꞌiaja aᵽerãre nare baamaka rakajeᵽããwaꞌri nareyarijarika imakoꞌomakaja Jesúre yiꞌririjaꞌataberikarã nime. Suᵽa imarĩ, baꞌiaja baakoribeyurã nime Tuᵽarãre ĩamaka. Suᵽa imarĩ Oveja weiwaꞌyua uᵽaka imaki riweaᵽi najariroaka nasaya uᵽaka ima jũjetirã, jia boioyiaja jããirã uᵽaka nime.

¹⁵ Iꞌsuᵽaka simamaka ĩᵽi kiruᵽarikũmuarã ruᵽaki wãjitãji kire jiyiᵽuᵽayeebaraka nime. Suᵽabaatirã kiwiꞌiarã, ĩmi, ñamioka kiyaᵽaika uᵽakaja baarijayurã imarĩ, dakoa jũarũkimarĩrã nime, Tuᵽarãre nare ĩarĩrĩrijarirãñurã imarĩ.

¹⁶ Suᵽabaatirã kẽsirababeyurã, okoa ukurijitobeyurã, aiyaᵽekarã ijia jũarũkimarĩrã nimarãñu.

¹⁷ Iꞌsuᵽaka nimaerã Tuᵽarã ruᵽarikũmuwãjitãji imaki imarĩ, jia oveja tuerimaji uᵽaka Oveja weiwaꞌyua uᵽaka imakire nare ĩarĩrĩrãñu. Suᵽabaatirã õñio okoa imarõꞌõrã nare sasĩarĩ kiruᵽutawaꞌrirãñu. Suᵽa imarĩ, “Aᵽekurioka baꞌiaja jũarũkimarĩrã, ate orirũkimarĩrã nimarãñu”, jiitaka Tuᵽarãre nare baarãñu,==ãrĩwaꞌri yire kibojaraᵽe.