Ap 13 - Porciones del Nuevo Testamento en el idioma Letuama

Ĩꞌrĩka werika maikoribeyu uᵽaka ĩoiki riaᵽakiakakaki

^1-2 Iꞌsia beꞌerõꞌõ ĩꞌrĩka werikaᵽakiaki maikoribeyukare riaᵽakiakaᵽi marĩraꞌaraᵽe. Ĩꞌᵽotẽñarirakao kiruᵽukoꞌa, suᵽabaatirã ĩꞌᵽaᵽitarakabi kiwaka buꞌya tuaeka kimaraᵽe. Suᵽabaatirã jiamarĩa Tuᵽarãreka jaika kiruᵽukoꞌarakakaja oꞌojĩꞌaekaki kimaraᵽe. Yaiuᵽaka ĩoiki imakoꞌomakaja oso ũꞌᵽua uᵽaka joꞌbaka ũꞌᵽuiki kimaraᵽe. Suᵽabaatirã león rijokoᵽe uᵽaka simaraᵽe kirijokoᵽea. Kajuyaiᵽakiaka uᵽaka ĩoiki kiõñua kire jaꞌataekaki kimaraᵽe. Suᵽa imarĩ, “Yiruᵽarikũmuarã ĩᵽi uᵽaka miruᵽabe. Tẽrĩritaka ñima uᵽaka mire ñimarũjeyu. Suᵽabaatirã ritaja wejeareka imarã ᵽoꞌimajare yijãꞌmeika uᵽaka nare mijãꞌmebe”, kajuyaiᵽakiaka uᵽaka ĩoikire kire ãrãᵽe.

³ Ĩꞌrõ kiruᵽukoꞌarã matãrĩberijĩkarõꞌõjĩrã joꞌbaka kãmimirãka yayaeka imaraᵽaka. Suᵽa simakoꞌomakaja, “¿Dako baaerã kireyaberitiyaeka jee?”, ãrĩbaraka rĩkimarãja ritatojo wejeareka kire yiꞌririjayurãre imaraᵽe.

⁴ Suᵽabaatirã, kajuyaiᵽakiaka uᵽaka ĩoikire jiyiᵽuᵽayeebaraka ᵽoꞌimajare imaraᵽe, werikaᵽakiakire kijãꞌmerũkia kijaꞌatamaka. Werikaᵽakiakire jiyiᵽuᵽayeebaraka ikuᵽaka narãᵽe: —Maki aᵽika ĩꞌĩ rõꞌõjĩrã imaki imabeyuka, suᵽa imarĩ ᵽitãꞌmuareka marã kire tẽrĩwãrũberijĩrã,==narãᵽe.

^5-6 “Yiꞌi ĩꞌrĩkaja ñime tẽrĩwaꞌribaji imatiyaiki. Maki aᵽika ñima uᵽaka imabeyuka. Tuᵽarãre ima uᵽaka imaki yiꞌi”, baꞌiaja kẽrãᵽe, “Iꞌsuᵽaka jaibekaja mimabe”, Tuᵽarãre kire ãrĩbeᵽakãꞌã. Suᵽa imarĩ, “Tuᵽarã, kika imarã, waᵽamarĩrã nime kimarõꞌõ oka waᵽamarĩa sime”, ãrĩbaraka maekarakakuri wejejẽꞌrã aᵽejẽꞌrã ñeꞌmetãjirõꞌõjĩrã ᵽoꞌimajare baꞌiaja jairuᵽutabaraka kimaraᵽe.

⁷ Tuᵽarãre ãꞌmitiriᵽẽairãre oka kitẽrãᵽe. Suᵽabaatirã ritatojo wejeareka imabayurãre jãꞌmerimaji kijaraᵽe, “Jẽnoꞌo, baꞌiaja nare mibaaꞌsi”, Tuᵽarãre kire ãrĩbeyukaji simamaka.

⁸ Ritatojo wejeareka imaraᵽarã uᵽatiᵽañakaja kire jiyiᵽuᵽayeeirã oyiaja jaraᵽarã. Oveja weiwaꞌyua uᵽaka imaki, najããekakire kirikaraᵽaᵽũñurã nawãmea oꞌoberikarã nimaraᵽe. Ika wejea Tuᵽarãre ᵽoꞌijiaerã baaeka ruᵽubaji, “Ĩrã nimarãñu yire yiꞌriwaꞌri õñia imajiᵽarũkirã”, ãrĩwaꞌri kiᵽaᵽera ᵽũñurã nawãmea Jesúre oꞌotikarã nime.

⁹ Tuᵽarãre bojaika mija õrĩwaᵽuꞌatariyaᵽayeꞌe jia samija ãꞌmitiᵽe:

¹⁰ “Yirirã imawaꞌri Cristore naꞌmitiriᵽẽamaka wẽkomaka imariwiꞌiarã ĩꞌrãrimarãre neꞌewaꞌrirãñu”, Tuᵽarãre ãñu uᵽakaja naroꞌsi simarãñu. Iꞌsuᵽakajaoka, “Aᵽerimarã najããrũkirã nime”, kẽñu uᵽakaja naroꞌsi simarãñu. Yirirã imarĩ, baꞌiaja jũakoꞌomakaja, rakajeᵽããekaja mija imabe. Suᵽabaatirã, yire mija yiꞌyua jaꞌatabekaja mija imabe.

Aᵽika weriki maikoribeyu uᵽaka ĩoiki kaꞌiakaki

¹¹ Iꞌsia beꞌrõ aᵽika weriki waᵽu koꞌtorõꞌõᵽiji kaꞌiaᵽi kiwararĩkamaka ñiaraᵽe. Oveja weiwaꞌyua waka mamaka waraika uᵽaka ĩꞌᵽabi wakaiki imakoꞌomakaja, kajuyaiᵽakiaka jaika uᵽaka kijairaᵽe.

¹² Mamarĩ imaraᵽaki werikaᵽakiaki kikãmimirãka yayaekakire jãꞌmeraᵽaka uᵽakaja kibaaraᵽe kibeꞌrõjite etaraᵽaki. Suᵽa imarĩ jiyiᵽuᵽaka ritaja ᵽoꞌimajare kire yiꞌyaokoroꞌsi mamarĩkakiroꞌsi kibaꞌiraberaᵽe.

¹³ Mamarĩkakiroꞌsi baꞌirabewaꞌri maikoribeyua uᵽaka kibaaroyiraᵽe. Ᵽoꞌimajare ĩaika wãjitãji jũꞌrẽika ĩmiᵽi kiñaꞌajiyeroyiraᵽe.

¹⁴ Mamarĩkakire jeyobaaikaᵽi baꞌirabewaꞌri ritatojo wejeareka imarã ᵽoꞌimajare kiᵽakiraᵽe. Nare kiᵽakimaka, “Tuᵽarã uᵽakaja imaki kime”, mamarĩkakireka ãrĩᵽuᵽajoairã najaraᵽe. Mamarĩkaki matãrĩberijĩka uᵽaka kãmia yayaeka mirãki jẽrãka ᵽoꞌimajare kiᵽoꞌijiarũjeraᵽe. “Baꞌitakaja ᵽoꞌimajare ᵽakibekaja mimabe”, Tuᵽarãre kire ãrĩbeᵽakãꞌã iꞌsuᵽaka kibaaraᵽe.

¹⁵ Tuᵽarãre kika jaibeyukajia simamaka, mamarĩkaki jẽrãka baaᵽoꞌijiaeka kiᵽuᵽatõrõraᵽe. Ᵽoꞌimaja uᵽaka jaika sakijarirũjeraᵽe. Suᵽa imarĩ, “Jiyiᵽuᵽaka yire õrĩbeyurã, jããrũkirãroꞌsi oyiaja nimarãñu”, sãrãᵽe.

¹⁶ Torã imaraᵽarã uᵽatireje mamarĩkaki maikoribeyuka wãmea kioꞌojĩꞌarũjeraᵽe. Ĩꞌrãrimarã naᵽitaka ritaᵽẽꞌrõtorã, aᵽerimarã nakũꞌarã kiwãmea noꞌojĩꞌaraᵽe. Imatiyarimaja, imatiyabeyurãoka, rĩkimakaja niñerũ rikairã, wayuoka baairã, naᵽuᵽayariji jia imarãreoka, aᵽerãre naᵽoyarã uᵽaka nare baꞌirabeĩjirimajareoka, ĩꞌrĩkaoka jariwaꞌririmarĩa mamarĩkaki werikaᵽakiaki wãmea kioꞌojĩꞌarũjeraᵽe.

¹⁷ Waruaririka nayaᵽakoꞌomakaja kiwãmea oꞌojĩꞌaberikarãre nayaᵽakoᵽeraᵽaka ĩjirika kijãjibaaraᵽe. Iꞌsuᵽakajaoka simaraᵽe kiwãmea oꞌojĩꞌabeyurãroꞌsi niñerũ tõᵽoerã baꞌirĩjia ĩjirika imaberaᵽaka. Kirĩrã nime ãrĩwaꞌri ĩawãrũrũkia kiwãmea, suᵽabaatirã kinúmero simaraᵽe naᵽoꞌiarã oꞌojĩꞌaeka.

¹⁸ Kiwãmea koᵽakaja simaraᵽe 666. Jia ᵽuᵽajoarika sime. Suᵽa baawaꞌri jia mija õrĩwãrũjĩñu kiwãmea.