1 Ts 1 - Porciones del Nuevo Testamento en el idioma Letuama

Tesalónicawejeakarãroꞌsi Ᵽablote ᵽaᵽera ᵽũataeka

¹ Tuᵽarãte yiꞌyurã Tesalónica wejeakarã, jia mija imabe. Yiꞌi Ᵽablo, suᵽabaatirã Silvano, Timoteoᵽitiyika ika ᵽaᵽera mijaroꞌsi yija ᵽũatayu. Maᵽaki Tuᵽarãrirã, suᵽabaatirã maĩᵽamaki Jesucristorirã mija imamaka. Jia mija imaokoroꞌsi jia Tuᵽarãte mijare baarũ.

Tesalónicakarã Jesúrika bojariroka jia ãꞌmitiriᵽẽaekarã

^2-3 Mijaka jĩjimaka imawaꞌri, “Jia mibaayu Tuᵽarã”, mijaroꞌsi kire yija ãrĩrijayu. Mijaka yija imaroyiraᵽaka ᵽoto, Jesucristore yiꞌyurã imarĩ, jia kiroꞌsi mija baaroyiraᵽaka yija õñu. Wayuĩabuꞌairã imarĩ, jia mija jeyobaabuꞌaroyiraᵽe. “Rita sime maĩᵽamaki Jesucristore ate ᵽeꞌrietarũkia”, ãñurã imarĩ, baꞌiaja jũarika mija rakajeᵽããrijariroyiraᵽe. Suᵽa imarĩ, ĩꞌrãkurimarĩa Maᵽaki Tuᵽarãte mijaroꞌsi yija jẽñeĩjirijayu.

⁴ Mija ãꞌmitiᵽe yijeyomarã, Tuᵽarãte mijare wayuĩarijayu. Suᵽa imarĩ, “Nare kiwãꞌmaeka”, yija ãrĩᵽuᵽajoayu.

⁵ Jesucristorika bojariroka mijare yija wãrõuꞌmuraᵽaka ᵽoto jairitakaᵽi marĩa mijare sayija wãrõraᵽe. Esᵽíritu Santore yijare jeyobaaraᵽakaᵽi ãrĩwaꞌri jia mijare sayija wãrõraᵽe. Iꞌsuᵽaka yija baaraᵽaka simamaka, “Rita sime ika majaroka”, ãrĩᵽuᵽajoawãrũraᵽarã imarĩ, samija yiꞌraᵽe. Suᵽabaatirãoka mija ᵽõꞌirã yija imaraᵽaka ᵽoto jia yija baaroyiraᵽaka ĩaraᵽarã mija, “Jia maimaokaroꞌsi maᵽõꞌirã netaraᵽe. Ritaitaka namajaroka maꞌmitiriroyi mirãkiyu”, ãrĩᵽuᵽajoaraᵽarã mija imamaka, “Tuᵽarãte wãꞌmaekarã nime”, mijareka yija ãñu.

⁶ Tuᵽarãrika bojariroka mija yiꞌᵽakãꞌã ĩawaꞌri, aᵽerãte baꞌiaja mijare baakoꞌomakaja, Esᵽíritu Santore jeyobaaraᵽakaᵽi ãrĩwaꞌri jĩjimaka samija ãꞌmitiraᵽe. “Ᵽablorãkaroꞌsi, Jesúroꞌsi iꞌsuᵽakaja simaeka”, ãrĩwãrũwaꞌri, jĩjimaka samija yiꞌraᵽe.

⁷ Macedonia kaꞌiareka imarã, Acaya kaꞌiarãkaoka jia mija baaroyiraᵽaka ĩaraᵽarã imarĩ, mija uᵽakaja tokarã Jesucristore ãꞌmitirijayurãte baaroyiraᵽe.

⁸ Maĩᵽamakirika bojariroka Macedonia kaꞌiakarã, Acaya kaꞌiakarã takamarĩa imaraᵽarã sãꞌmitiraᵽarã. Suᵽabaatirã, “Jesúrika bojariroka jia yiꞌyurã nime”, mijareka narĩᵽuᵽajoayu. Suᵽa imarĩ, dirokaᵽi ãrĩwaꞌri aᵽerãte rĩkimaitakaja yija bojaberijĩka sime, koᵽakaja ritaja sanaꞌmitiriwãrũtiika simamaka.

^9-10 “Jesucristorika bojariroka nare mija wãrõeka jia Tesalónicawejeakarãre yiꞌyu”, ãrĩwaꞌri yijare nabojayu. “ ‘Waᵽuju ima jẽrãka najiyiᵽuᵽayeeroyiraᵽaka jaꞌataraᵽarã nime, Tuᵽarã õñia imakite takaja jiyiᵽuᵽayeewaꞌri. Suᵽabaatirãoka Tuᵽarã Maki, Jesús maboꞌikakurirã maekaka imaki õꞌõrã etarũkika kime. Ikijioka ᵽoꞌimajare kire jããeka imakoᵽekoꞌomakaja õñia Tuᵽarãte kire jarirũjeka. Suᵽa imarĩ baꞌiaja wẽkomakareka maimaerã baakoᵽekareka Jesúre mare tããeka. Jia Tuᵽarãka maima imarĩ, Jesúre etarũkia jĩjimakaᵽi taꞌabaraka maimaweiyeꞌe’, ãᵽaraka ᵽoꞌimajare bojabaraka nime”, ãrĩwaꞌri yijare nabojayu.