2 TUNUNG RU BANSA' ISRAIL 33 - Tanou Moonsoi Timugon

Raja' Manasi, raja' ru Jiuda

¹ Raja' Manasi makaumur mopor am ruo ngambilor paat ra io nasauk ra raja' ru Jiuda, am namarinta io giu' ra Jirusalim buoi limo ngoopor am limo ngambilor.

² Raja' Manasi makatula ra Tuhan, sabap minaya' ra binaal malaat ondo' binaal ru bansa'-bansa' ondo' pinagiru' ru Tuhan paat ra ulun Nano nangayan ra pagun no ragili.

³ Raja' Manasi nambaal saguli' ra intok-intok sambaan ra sinungkalalaing ondo' pinuso ru ama' nali Raja' Gijkia. Binaal ru Raja' Manasi altar koson sumamba ra Baal am nambaal ra sinungkalalaing Dewi Asyira. Io niayuk sumamba ra butitin-butitin.

⁴ Binaal ru Raja' Manasi altar-altar tayar ru dewa-dewa giu' ra ralalom Baloi ru Tuhan, intok ondo' inaru' ru Tuhan koson intok sambayangan Riso ra sabubuoi no.

⁵ Binaal niayuk ru Raja' Manasi altar-altar giu' ra karuruo liliut Baloi ru Tuhan koson sumamba ra butitin-butitin.

⁶ Pinataak no anak-anak ungkuyon nano giu' ra Limayak Ginom koson ra taak simbalui ondo' solobon. Nangimaya' io ra kapandayan mangilong am sihir, nampiau io ra ulun-ulun mangilong am babalian. Raja' Manasi makatula' toojo ra Tuhan am napasingkual ra sangit Nano.

⁷ Pinabanta' no rondo' sinungkalalaing giu' ra ralalom Baloi ru Tuhan, alika intok raginio noyo minindagu Tuhan ra Raja' Daut am Raja' Salomo anak ungkuyon nano koon ragitio, “Baloi Kuti ra Jirusalim ti, ondo' pinili' Ku noyo intor ra mopor am ruo wilayah ru bansa', iono intok ondo' inaru' Kuno ra intok sambayangan Raki' ra sabubuoi no.

⁸ Amon ru ulun Kuno Israil gumagaya' ra ngaangai' susuban Kuno am niayuk sumugut ra ngaangai' Ukum ondo' pinataak risilo ri Musa, ulipon Kuno, am Aku pana kalo mompoloso risilo pagiruon intor ra tana' ondo' tinaakan Ku ra kinamatuaan nilai.”

⁹ Raja' Manasi nangkinibit ra mamagun ru Jiuda makatula poyo intor ra bansa'-bansa' ondo' pinagiru' ru Tuhan intor ra pagun no paat ra ulun Nano siminubol ra pagun no.

Raja' Manasi timinalikur intor ra tula

¹⁰ Kabalu' pana Tuhan nampakara' ra Raja' Manasi am mamagun nano, kaa' marara' ilo mampalio ra pampakaraan no.

¹¹ Ginio ra nompoloso Tuhan ra panglima-panglima ru saujor ru pagun ru Asyur namulunsar ra Jiuda. Rinakop nilo Raja' Manasi ra kaitan, binangkil io, am inibit io ra Babil.

¹² Ralalom ru kaimbalaan nano Raja' Manasi mininggana' guang, am siminaguli' ra Tuhan, i Aki Kapuuno' nano, am nakiasi' ra nakiindangan Riso.

¹³ Iniou ri Aki Kapuuno' pakiasian ru Raja' Manasi am nangiou riso siminaguli' ra Jirusalim am niayuk namarinta poyo. Binaal ri Aki Kapuuno' no nampaintopot ra Raja' Manasi ra Tuhan no i Aki Kapuuno'.

¹⁴ Kopongo raginio kinasawat ru Raja' Manasi timbok ra liwar giu' ra tampilon sirangon ru Bandar Daut, intor ra limayak mamaar ra Taur ru Timug Gigon, am narampus ra ralayo saboi ra Kulobon Garabang Papait am intok ra ralalom ru bandar ondo' ininggalanan ra Opil. Io niayuk nampakandoi ra sangulun pagawai ru saujor koson maningganai ra rondo' pulalai ru saujor giu' ra moonong bandar mokoondo' ra kubu giu' ra Jiuda.

¹⁵ Raja' Manasi nangimpai ra sinungkalalaing dewa bansa' ra bokon am niayuk sinungkalalaing ondo' pinabanta' giu' ra Baloi ru Tuhan. Linunsai no altar-altar ru dewa ondo' pinabigor giu' ra bulur intok ru Baloi ru Tuhan, am giu' ra intok ra bokon giu' ra Jirusalim. Inibit no ngaangai' kuliamos no giu' ra liwar ru bandar, am ngaangai' no pinatiran.

¹⁶ Pinuna' ru Raja' Manasi altar intok sambayangan ra Tuhan, am nampataak ra taak simbalui koson makibarakat ra Tuhan am taak simbalui koson paringkuanangan ra giu' no. Sinusub no ngaangai' mamagun ru Jiuda maa' raginio sumambayang ra Tuhan, i Aki Kapuuno' ru Israil.

¹⁷ Kabalu' pana mamagun lakat poyo mampataak ra taak simbalui giu' ra intok-intok sambaan ra bokon, kaa' taak no tayar ru Tuhan.

Pupus ru pamarintaan ru Raja' Manasi

¹⁸ Ngaangai' binaal ru Raja' Manasi, pakiasian nano ri Aki Kapuuno' nano, am tanou-tanou ru nabi ondo' pinasaboi riso ralalom inggalan ru Tuhan, i Aki Kapuuno' ru Israil, tinulisan giu' ra ralalom ru kitab Sejarah Raja'-Raja' Israil.

¹⁹ Pakiasian ru raja' am taaman ri Aki Kapuuno' ra pakiasian no, tula ru raja' ra io kalo poyo timinalikur intor ra tula, binaal nano ondo' malaat, intok sambaan ra sinungkalalaing am tatandu'-tatandu' ru Dewi Asyira ondo' binaal nano, am niayuk sinungkalalaing ondo' sinamba nano, tinulisan giu' ra ralalom ru kitab Sejarah Nabi-Nabi.

²⁰ Raja' Manasi minatoi am linobong giu' ra istana; anak ungkuyon nano i Amon minalit riso koson ra raja'.

Raja' Amon, raja' ru Jiuda

²¹ Raja' Amon makaumur ruo ngoopor am ruo ngambilor paat ra io nasauk ra raja' ru Jiuda, am namarinta io giu' ra Jirusalim buoi ruo ngambilor.

²² Koson ra ama' nali Raja' Manasi, Raja' Amon niayuk makatula ra Tuhan am siminamba ra sinungkalalaing ondo' sinamba ru ama' nali.

²³ Kaa' Raja' Amon kalo minggana' guang koson ra ama' nali am kalo siminaguli' ra Tuhan, mulu' poyo ra makatula io poyo intor ra ama' nali.

²⁴ Pagawai-pagawai ru Raja' Amon naguguum minanggal riso am namatoi riso giu' ra istana.

²⁵ Kopongo raginio mamagun ru Jiuda poyo namatoi ra pagawai-pagawai no am nampalantik ri Josia, anak ungkuyon ru Raja' Amon nasauk ra raja'.