2 TUNUNG RU BANSA' ISRAIL 28 - Tanou Moonsoi Timugon

Raja' Agas, raja' ru Jiuda

¹ Raja' Agas nasauk ra raja' paat io makaumur ruo ngoopor ngambilor, am namarinta io giu' ra Jirusalim buoi mopor am onom ngambilor. Kalo timinilu io ra binaal moonsoi ru kinamatuaan nali, Raja' Daut. Binaal nai boo ru Raja' Agas atan ondo' kalo iniou ru Tuhan,

² am minaya' ra ralan kaayagan ru raja'-raja' Israil. Nambaal Raja' Agas ra sinungkalalaing Baal intor ra logam.

³ Nonolob io ra kaminyan giu' ra Limayak Ginom, am poyo nampataak ra anak-anak ungkuyon nano galama' koson ra taak simbalui ondo' solobon ra sinungkalalaing. Minaya' io ra binaal malaat ru bansa' ondo' pinagiru' ru Tuhan paat ra ulun ru Israil siminubol ra pagun no.

⁴ Giu' ra intok sambaan ra sinungkalalaing, giu' ra bulur-bulur am giu' ra saau ru moonong puun tataun magana', nampataak Raja' Agas ra taak simbalui am nonolob ra kaminyan.

Mangayou ra Siria am Israil

^5-6 Sabap ra makatula Raja' Agas, Tuhan, i Aki Kapuuno' nano nompoloso ra raja' ru Siria nangala riso am nagibit ra masuang mamagun ru Jiuda minongoi ra Damsyik koson ra ulun rinakop. Nompoloso niayuk Tuhan ra raja' ru Israil, iono Raja' Pika anak ri Rimalia, nangala ra Raja' Agas am namatoi ra 120,000 ngaulun saujor ru Jiuda ondo' mangapanggol, ralalom ru songorou. Tuhan, i Aki Kapuuno' ru kinamatuaan nilo, nompoloso ra baal raginio nasauk sabap ra mamagun ru Jiuda nangiruan noyo Riso.

⁷ Sangulun ra saujor ru Israil ondo' ininggalanan ri Jikri namatoi ri Maasiya, anak ungkuyon ru Raja' Agas, am i Ajrikam tingganai ru istana, am niayuk i Ilkana, pagawai maatang ru raja'.

⁸ Kabalu' pana mamagun ru Jiuda nogondo' bansa' risilo, mamagun ru Israil namparakop ra 200,000 ngaulun ruandu' am lalaing, am inibit ilo giu' ra Samaria nababaya' ra masuang kaga' kuliamos ginaau.

Nabi Odid

⁹ Sangulun nabi ru Tuhan ininggalanan ri Odid minayan giu' ra bandar Samaria. Nakauma' io ra saujor ru Israil ondo' siminaguli' nagibit ra ulun rinakop intor ra Jiuda. Paat ra saujor-saujor sumubol ra bandar, kon ri Odid risilo, “Tuhan, i Aki Kapuuno' ru kinamatuaan min, siminangit ra mamagun ru Jiuda. Ginio boo ra nompoloso io ramuyun nangala risilo. Kaa' nokorongog Io noyo ra mapara' laat min namatoi risilo.

¹⁰ Raino akau pana namparakop ra mamagun ru Jirusalim am Jiuda, am masaga' mampasauk risilo ra uliponon min. Kalo kia nakapandai kau ra akau galama' pana makatula noyo ra Tuhan, i Aki Kapuuno' min?

¹¹ Rongogo' noyo, ulun rinakop ti pabukat min. Palabuso' ilo! Amon ru kalo, Tuhan sumangit ramuyun am mangukum ramuyun.”

¹² Apat ngaulun tingganai ru Pamarintaan Ralayo, iono i Ajaria anak ri Joganan, Birikia anak ri Misilimot, i Jigijkia anak ri Salum, am i Amasa anak ri Gadlai, niayuk minanggal ra binaal ru saujor no.

¹³ Konilo, “Pai' ibito' ulun rinakop no ragiti. Makatula takano ra Tuhan, am tula takau sama' noyo gayo koson ukumin. Raino nambaal kau ra rondo' ondo' mamparuang ayuk ra kasalaan takau.”

¹⁴ Ginio ra saujor nampataak ra ulun rinakop am kuliamos ginaau no ra mamagun am tingganai-tingganai nilo.

¹⁵ Apat ngaulun tingganai no pinili' koson mangani' ra bayang intor ra kuliamos ginaau ra ulun rinakop ondo' kolondo' bayang. Ilo niayuk inanian ra bayang am kasut, akanon am inumon. Pilat-pilat nilo tinapisan ra umau jaitun. Ulun ondo' malawo kaga' mugar pinasakoi ra rasawat ru kaladai, am ngaangai' ulun rinakop no inibit saguli' ra wilayah Jiuda, giu' ra bandar Jiriko, iono bandar ru puun kurma. Kopongo raginio ulun ru Israil minuli' saguli' ra Samaria.

Nakiindangan Raja' Agas intor ra Asyur

^16-17 Ulun ru Idom tumalimpuun poyo mamulunsar ra Jiuda am namparakop ra masuang ulun. Ginio ra nakiindangan Raja' Agas intor ra Raja' Tiglat-Pilisir, raja' ru pagun Asyur.

¹⁸ Liliwa' raginio ulun ru Palistin tatanga' mamulunsar ra bandar-bandar giu' ra libung ru lonson toojo ru bulur giu' ra tampilon kalasaan am giu' ra tampilon rabugus ru Jiuda. Ginaau nilo bandar Bit-Simis, Ayalon am Gidirot, am niayuk bandar Sokgo, Timna am Gomjo am niayuk ngaangai' pekan giu' ra liliut ru bandar-bandar no, am ayan ilo ra giu' no.

¹⁹ Sabap Raja' Agas panguasa' intor ra Jiuda no nangiruan ra Tuhan am kalo namarinta ra mamagun ra matanda', Tuhan pana namparatong ra kapaganan giu' ra Jiuda.

²⁰ Raja' ru Asyur minatong sala' ka koson mangindangan ra Raja' Agas, kaa' koson mantipagon riso.

²¹ Ginio ra Raja' Agas nangalap ra mas intor ra Baloi ru Tuhan, istana am baloi ru ngaangai' tingganai ru mamagun, am pinataak ngaangai' ra raja' ru Asyur, kaa' pirot ru Raja' Agas no kolondo' toojo onong.

Tula-tula ru Raja' Agas

²² Ralalom ru baal ondo' mapagon kaga' no, Raja' Agas giminaai piboo makatula ra Tuhan.

²³ Nampataak io ra taak simbalui ra dewa-dewa ru ulun Siria ondo' nangala riso. Kon ru Raja' Agas, “Dewa-dewa ru ulun Siria nangindangan ra raja'-raja' ru Siria. Amon mampataak aku ra taak simbalui ra dewa-dewa raginio, aku niayuk indanganon.” Binaal raginio namparatong ra karaat riso am mamagun nano.

²⁴ Suai raginio, inalap ru Raja' Agas ngaangai' kuliamos ru Baloi ru Tuhan am inumok no. Inangaban no Baloi ru Tuhan, am nambaal ra altar-altar giu' ra titikop ru Jirusalim.

²⁵ Nambaal io ra intok-intok sambaan ra sinungkalalaing giu' ra moonong bandar am pekan giu' ra Jiuda; monolob ulun ra kaminyan ra dewa ru bansa' ra bokon giu' ra rasawat ru altar-altar no. Koon raginio noyo io nangkinibit ra Tuhan, i Aki Kapuuno' ru kinamatuaan nano siminangit riso.

²⁶ Ngaangai' ru binaal nano ra bokon paat ra pamarintaan nano, intor ra talimpuun polos ra pupus, tinulisan ra ralalom ru kitab Sejarah Raja'-Raja' Jiuda am Israil.

²⁷ Raja' Agas minatoi am linobong giu' ra Jirusalim, kaa' sala' ka giu' ra kalabangan ru raja'. Anak ungkuyon nano i Gijkia minalit riso koson ra raja'.