2 TUNUNG RU BANSA' ISRAIL 27 - Tanou Moonsoi Timugon

Raja' Jotam, raja' ru Jiuda

¹ Raja' Jotam nasauk ra raja' paat ra io makaumur ruo ngoopor am limo ngambilor, am namarinta io giu' ra Jirusalim buoi mopor am onom ngambilor. Ina' nano i Jirusa anak ri Jadok.

² Binaal ru Raja' Jotam atan ondo' kasagain ru Tuhan, koson ra Raja' Ujia ama' nali, kaa' io kalo koson ra ama' nali ondo' makatula ra nonolob ra kaminyan giu' ra Baloi ru Tuhan. Kabalu' pana raginio, mamagun nano narayus ayuk makatula.

³ Nambaal Raja' Jotam ra Kulobon Garabang Ralayo Baloi ru Tuhan, am namuna' io ra timbok ru bandar giu' ra tampilon Jirusalim ondo' sabiton ra Opil.

⁴ Giu' ra kagunungan ru Jiuda, nambaal Raja' Jotam ra bandar-bandar, am giu' ra kataunan-kataunan nambaal io ra kubu am manara.

⁵ Nangayou Raja' Jotam ra raja' ru pagun Amon am saujor nano, am nangala risilo. Raja' Jotam pana nampajajal boo ra ulun ru Amon mambayar ra cukai buoi talu ngambilor, moonong bilor suang no 3,400 ngakilogram pirok, 1,000 ngatan gandum am 1,000 ngatan barli.

⁶ Giminaai ikang ru Raja' Jotam sabap ra gumagaya' io ra Tuhan, i Aki Kapuuno' nano.

⁷ Baal-baal ra bokon ondo' nasauk paat ra pamarintaan nano, koson ra pangayawan am puun ru pamarintaan nano, ngaangai' tinulisan giu' ra ralalom ru kitab Sejarah Raja'-Raja' Israil am Jiuda.

⁸ Raja' Jotam makaumur ruo ngoopor am limo ngambilor paat ra io nasauk ra raja', am namarinta io giu' ra Jirusalim buoi mopor am onom ngambilor.

⁹ Raja' Jotam minatoi am linobong giu' ra Bandar Daut. Anak ungkuyon nano i Agas, minalit riso koson ra raja'.