Mȧyɔs ma aŋsom 18 - Ȧŋlemrȧnɛ Ȧfu

¹ Kədarəŋ ka mȧtȧy ame Pɔlȧŋ ɔ wur ro Athɛns, kɔ der ro Kɔrinth.

² kɔ bəp uYuda ulɔm, ȧŋes ŋɔŋ ŋə yi Akuyla, ɔwe a kom ro Pɔntɔs, yi ɔrani kɔŋ Prisila; pə tha won hɛ maŋ wur ro Itali, pəkasifɛ Klɔdiɔs ɔ po yamari aŋYuda bɛ tə kəwur ro Rom. Kɔ der ro rɔŋaŋ.

³ Ɔwa ma ɔ ba ratol din yi ŋaŋ-e, ɔ yianɛ ro ŋaŋ, kaŋ bulɔ. Ratol ra ŋaŋ rə yi tə kəbɛmpa ɛseth ya totha.

⁴ kɔ fɔfȧnɛ aŋYuda yi aŋKrik, ɔ thɔnthɔ ŋa ka ȧŋseth agbanɛ asabath o sabath.

⁵ Ma Sailas-əŋ yi Timɔthi-əŋ aŋ bek kəwur ro Masidonia-e, ȧrim rə gbukthi Pɔlȧŋ tə kəsɔŋ məseri ka aŋYuda kəpa Yisɔsȧŋ kɔnɔ yi ɔKrayst.

⁶ Ɔwa maŋ kasi kɔ-e, aŋ kȧl təp tə kəfɔf ɔləs-e, ɔ wɔnwɔn ɛlopra yɔŋ, ɔ pa ro ŋaŋ, Mȧtir ma nu mə rensa ka tabomp ta nu. Minɛŋ i yi ugbəraŋ. Kətəp ka-ake i ti kɔnɛ ka tȧbona təlɔm.

⁷ kɔ wur ri ɔ wɔŋ ka ȧŋseth ŋa ulaŋgba ulɔm, ȧŋes ŋɔŋ ŋə yi Taytɔs Yɔstɔs, wuni ɔwe bȧtho Kuru. Ȧŋseth ŋɔŋ aŋ gbɛpətənɛ ȧŋseth agbanɛ.

⁸ Krispɔsȧŋ, ɔgbəka ka ȧŋseth agbanɛ, ɔ lanɛ ka ɔMarki yi kabɔr kɔŋ bɛ, ɔwa aŋKɔrinth agbȧthi ma aŋ təl-e, aŋ lanɛ, ka a baftays ŋa.

⁹ Ka ɔMarki ɔ pa ka Pɔl tȧtȧk rə mənəŋk, Te nesa, kɛrɛ fɔf. Te taŋk.

¹⁰ I yi yi munɔŋ, ɔwa wuni o wuni ɔ gbəli hɛ yɔ mu ɔbaŋ, ȧtesoma-e i ba afəm agbȧthi ka kȧpet ake.

¹¹ kɔ yirȧ ri kəren kin yof tamthərukin, ɔ thəksa ȧrim ra Kuru kətɔŋ ka ŋaŋ.

¹² Ma Kalio ɔ yi ɔgbəka ka ro Akaya, aŋYuda aŋ tura Pɔlȧŋ rə ȧmerȧ ŋin, ka a kȧrȧ kɔ ro bare,

¹³ aŋ pa, Ɔlaŋgba ɔwe ɔ thɔnthɔ aŋfəm tə kəbatho Kuru ka məpeskɛ ma ȧŋthɔ.

¹⁴ Ma Pɔlȧŋ ɔ yema fɔf-e, Kalio ɔ pa ka aŋYuda, Bepi pə yi tɛntɛnɛ tȧy təkənə tȧŋ, thalɔm məyɔs mələs maŋ-e, na aYuda, pə tə yi naŋ ɔlompi mi tə kəsua nu ɛləns.

¹⁵ Kɛrɛ bepi pə yi ɛyif ta təfɔf yi mes, yi ta ȧŋthɔ a nu-e, naŋ gbeŋ kəlɛnɛ yi nu, i yema hɛ yi uthoŋkas ta mȧtȧy mati.

¹⁶ kɔ bȧl ŋa kəwur ro bare.

¹⁷ Ka ŋa bɛ aŋ bət Sɔsthɛnes, ɔwe yi rȧbomp ka ȧŋseth agbanɛ, aŋ sapəth kɔ rodi ka kawaŋ ka kəthoŋkas. Kɛrɛ Kaliyoŋ, tɔŋ tə yi hɛ ri ka mȧtȧy ame.

¹⁸ Kərarəŋ kati ma Pɔl ɔ po won ri mərey məfisa-e, ɔ lemnɛ aŋwɔnt, kɔ bȧkȧ rə abil tə kəkɔ ro Siria, ka Prisila yi Akuyla aŋ paya kɔ. Ɔ po fonɛ rȧbomp rɔŋ ro Sɛnkriya, kotȧy-e ɔ po ba ri agbiŋ.

¹⁹ Maŋ der ro Ɛfisɔs-e, kɔ tey aŋkos ŋɔŋ ri, kɛrɛ kɔn kɔnɔnɛ ɔ wɔŋ ka ȧŋseth agbanɛ, ɔ fɔfȧnɛ aŋYuda.

²⁰ Maŋ nɛmthɛnɛ kɔ tə kəyira ras-e, ɔ selɔ hɛ,

²¹ kɛrɛ ma ɔ lemnɛ ŋa ɔ pa, I ti kȧl der sɔ ro rɔnu bepi Kurɔŋ ɔ selɔ. Kɔ bȧkȧ rə abil kəwur ro Ɛfisɔs.

²² Ma ɔ bek ro Sisaria-e, ɔ kɔ ro Yerusalɛm, kɔ kori aŋchɔch, kədarəŋ kati ɔ kɔ ro Antiɔk.

²³ Ma ɔ ba ri alɔkɔ agbut-e, ɔ wur ri, ɔ kɔth kɔth ka tathɔf ta ro Kaletia yi ro Frikia kȧmȧ ɔ bȧksər aŋkarande bɛ.

²⁴ Ka uYuda ulɔm ɔ der ro Ɛfisɔs, ȧŋes ŋɔŋ ŋə yi Apɔlɔs; a kom kɔ ro Alɛksandria, wuni tȧrȧ fɔf wɔŋ, ɔwa ɔ ba afɔsɔ ka mȧgbal məsəm.

²⁵ A po thəksa kɔ ta aroŋ da ɔMarki; ɔwa ma ɔ yi ɔfey rə amera-e, ɔ fɔf, ɔwa ɔ thəksa asɔbɛ mȧtȧy ma ɔMarki, kɛrɛ ɔ tȧrȧ gbo ȧŋbaftisəm ŋa Yɔn.

²⁶ kɔ təp kəfɔf yi kəmintha ka ȧŋseth agbanɛ. Kɛrɛ ma Prisila yi Akuyla aŋ təlȧ kɔ-e, aŋ kȧrȧ kɔ ro seth ka ŋaŋ, aŋ yɛrkia kɔ aroŋ da Kuru finɔ.

²⁷ Ma ɔ yema fəsi ro Akaya-e, aŋwɔnt aŋ gbalər aŋkarande kȧmȧ aŋ malanɛ kɔ finɔ; ɔwa ma ɔ bek ɔ mar ŋa ɔgbȧthi aŋa po lanɛ salata ȧŋboŋa,

²⁸ ȧtesoma-e ɔ tham aŋYuda yi afɔsɔ abana gbafəth, kɔ tɔri ka mȧgbal kəpa Yisɔsȧŋ kɔnɔ yi ɔKrayst.