ምስላታት 26 - መፅሓፍ ቅዱስ

¹ ከምቲ በረድ ብፅብሓት፥ ዝናም ድማ ብቐውዒ ዘየድሊ፥ ከምኡውን ንሰነፍ ኽብረት ኣይግብኦን።

² ከምታ እትነፍር ጭሩን፥ እትበርር ለዃዅቶን ዘይትዓልበካ፥ ከምኡ ኸዓ ምኽንያት ዘይብሉ መርገም ኣይበፅሕን።

³ ሓለንጊ ንፈረስ፥ ልጓም ንኣድጊ፥ በትሪ ኸዓ ንዝባን ዓሻ እዩ።

⁴ ንስኻ ድማ ንእኡ ኸይትመስልስ፥ ንሰነፍ ከም ዕሽነቱ ኣይትመልሰሉ።

⁵ ንባዕሉ ዝለበመ ኸይመስሎ፥ ንዓሻ ኸም ስንፍናኡ መልሰሉ።

⁶ ብኢድ ሰነፍ መልእኽቲ ዝሰድድ፥ ባዕሉ ኣእጋሩ ይቘርፅ፤ መከራውን ይሰቲ።

⁷ ኣፍ ዓሻ ዝዛረቦ ምስላ፥ ጠልጠል ከም ዝበለ እግሪ መፃጕዕ እዩ።

⁸ ንሰነፍ ክብረት ምሃብ፥ ከምቲ ኣብ ወንጭፍ ዝኣሰርካዮ እምኒ እዩ።

⁹ ምስላ ኣብ ኣፍ ሰነፋት፥ ከምቲ ኣብ ኢድ ሰካር ዝኣተወ እሾዅ እዩ።

¹⁰ እቲ ምስ ሰነፍን፥ ምስ ሓላፊ መንገድን ዝወዓዓል፥ ከምቲ ንዝረኸቦ ዝወግእ ወርዋሪ ፍላፃ እዩ።

¹¹ ከልቢ ናብ ትፋኡ ኸም ዝምለስ፥ ሰነፍ ከምኡ ንስንፍናኡ ይደጋግሞ።

¹² “ኣነ ጥበበኛ እየ” ዝብል ሰብዶ ርኢኻ ትፈልጥ? ካብኡ ንሰነፍ ተስፋ ኣለዎ።

¹³ እቲ ሃካይ “ኣብ መንገዲ ኣንበሳ ኣሎ፤ አረ ኣብ ኣደባባይውን ኣንበሳ ኣሎ” ይብል።

¹⁴ ከምቲ ማዕፆ ኣብ ወንድ ወንዶኡ ዝዘውር፥ ሃካይውን ከምኡ ኣብ ዓራቱ ይገላበጥ።

¹⁵ ሃካይ ንኢዱ ናብ ፃሕሊ የእትዎ፤ ናብ ኣፉ ምምላስ ግና ድኻም ይኾኖ።

¹⁶ ሃካይ፥ ብምስትውዓል ክምልሱ ኻብ ዝኽእሉ፥ ሸውዓተ ሰባት ዝበለፀ፥ ኣእምሮ ዘለዎ ይመስሎ።

¹⁷ እቲ ናብ ዘይነገሩ ዝኣቱ ሓላፊ መንገዲ፥ ከምቲ ንጭራ ኸልቢ ዝሕዝ ሰብ እዩ።

^18-19 እቲ ንብፃዩ ኣታሊሉስ፥ “ክፃወት እየ ዝገበርክዎ” ዝብል ሰብ፥ ከምቲ ናብ ሞት ዘብፅሕ ትንታግን ፍላፃን፥ እናወርወረ ዝፃወት ዕቡድ ሰብን እዩ።

²⁰ ዕንፀይቲ እንተ ተወድአ፥ ሓዊ ይጠፍእ፤ መጣቘሲ እንተ ዘየሎ ኸዓ ባእሲ የቋርፅ።

²¹ ሕመት ንጓህሪ ጋሃፅ ከም ዘብል፥ ዕንፀይትውን ንሓዊ ሃልሃል ከም ዘብል፥ ናግራም ሰብኣይ ከዓ ኸምኡ ባእሲ የሳውር።

²² ዘረባ ሓማዪ ኸም ጥዑም ምግቢ እዩ፤ ናብ ውሽጢ መዓናጡ ድማ ይኣቱ።

²³ ክፍኣት ብልቡ ሓቢኡ፥ ፍቕሪ ዝዛረብ ከንፈር፥ ብዝዕገት ብሩር ከም ዝተለበጠ፥ ኣቕሓ መሬት እዩ።

²⁴ ፀላኢ ብኸንፈሩ የምስል፤ ብልቡ ግና ተንኰል የንብር።

²⁵ ብልዙብ ቃል እንተ ተዛረበካ ኣይትእመኖ፤ ኣብ ልቡ ሸውዓተ ርኽሰት ኣለዎሞ።

²⁶ ፅልኡ ብተንኰል እንተ ሓብአ እኳ፥ ክፍኣቱ ኣብ ጉባኤ ይግለፅ።

²⁷ ጕድጓድ ዝዅዕት ኣብኣ ይወድቕ፤ እምኒ ዘንከባልል ድማ ናብ ባዕሉ ይግልበጦ።

²⁸ ሓሳዊት መልሓስ ንዘቝሰለቶም ትፀልኦም፤ ጠባሪት መልሓስውን ጥፍኣት ተምፅእ።