Obadiya 1 - La Bible en Otetela (Bible K'Ekila) 1991

Ekitshekitshelu ka Edome

¹ 1 Enelo ka Obadiya. Khumadiondjo Latuyalaka kata okone lu dikambu dai Edome ati: Shu takuki kumu uma le Latuyalaka, La dikendji diakatumama lʼatei a wedja ati: Nyuneli, tutolosha Edome ta.

² Nyulungi, dimi layukete tshitshe, we Edome, lʼatei a wedja. Ku we ayonywama otekoya.

³ Utaku wʼetema anyu wakanyukesi, Nyu wane watudjaseka lu weuku wʼave, Watudjaseka ladiku; Nyu wane watutaka lʼetema anyu nyati: Akona ayutuhuluya la kete?

⁴ Kuyanga mbatunyumbelaka ladiku uku pungu, Kuyanga edjaselu kanyu keko kʼatei a toto, Dimi layutunyuhuluya uma leko, Mbata Latuyalaka.

⁵ Naka evi wakayi le ye, Naka apotodi wakayi lʼutshu. Ndi wuhu wakayalanyema li! Vo kunkimo nvua lamʼambuwukutsha ehumba awo? Naka amumbi wʼelua wakayi le ye, Vo kuntshika elua emotshi?

⁶ Ndi wuhu wakawayangiayangia diango dia Esau li! Ndi wuhu wakawashula waumbelu andi wakashama li!

⁷ Antu tshe wakadji la ye sheki, Wakakutshanya lu mbuka kaye pulu ndu lʼulelu. Antu wakadjashi la ye ki wakakukesi, wakakolembia. Engenyi aye wakayekamaka, Wambukamba djunga Keli we heyi dikambu diako.

⁸ Latuyalaka kambula ati: Lushi loso, dimi haludiaka akanga a tumba uma la Edome, La akanga wa ewu uma lʼokongo wa Esau?

⁹ Temana li! apami aye wa wulu wayundama la woma, Dia antu tshe wa lʼokongo wa Esau Nshila ushiki lamʼayuwadiaka.

¹⁰ Ne dia akambu wa ngala wakayatshela onanyo Jakoba, We ayutshama sonyi, ayulanyema pundju.

¹¹ Lu lushi lakayemala la ntundu kandi, Lushi lakatole asi wedja ului andi wʼalimbi utsha lu fumbi, Lushi lakoto angendangenda lu asuku awo, Lakawoki Jerusalema uwali, Ndu we akayala uku otoi awo.

¹² Keli tendaki lushi lʼasui wʼonanyo, Tongenangenaki lu dikambu diʼasi Juda Lu lushi lawo lʼelanyelu, Kuyanga nteketa la utaku lushi lawo la pa.

¹³ Totoki lu asuku wa wudja ami Lushi lʼelanyelu kawo. Tendaki asui awo lushi lʼelanyelu kawo, Kuyanga nkitsha anya lu ekundji awo lu lushi lʼelanyelu kawo.

¹⁴ Tanyemalaki lʼasanga, Dia nshila antu awo wakahandi ushiki. Tamukimoki atshikadi awo lushi la pa.

Embiyelu ka Isariyele

¹⁵ Lushi la Latuyalaka laya suki le wedja tshe. Wuhu wakayatshi, mbayuwukutshela. Etsha aye wayukalula lʼote aye weme.

¹⁶ Uku akanyano lʼukungu ami wʼekila, Osoku mbayutetemalaka wedja tshe no. Ee, vo wayono, wayusukosuko, Wayuyala uku akiwo kundjala ntundu.

¹⁷ Keli lʼUkungu wa Siona kayuyala wane wambuhanda. Ukungu ako wayuyala ekila Khumbu ka Jakoba wayukita kete yawo.

¹⁸ Khumbu ka Jakoba wayuyala dja, La khumbu ka Josefu lumbi, Ku khumbu ka Esau adiyu. Yo yayoheta lʼatei awo, yayatshumba. Nduku untu ayutshikala lu khumbu ka Esau, Ne dia Latuyalaka kakati dikambu diako.

¹⁹ Wane weli la Nengebe, wayukita Ukungu a Esau, La wane weli la Shefela, kete yʼasi Filistiya. Vo wayukita kete ya Efarayima la kete ya Samariya. Bendjamina ayukita Ngiliyade.

²⁰ Fumbi yʼasi isariyele yeli la Hala, Wayukita Fonekiya pulu ndu la Zarefate; La fumbi yʼasi Jerusalema yeli la Sefarada, Wayukita esumba wa Nengebe.

²¹ Atshungudi wayuya lʼUkungu a Siona, Dia ndjulela Ukungu a Esau. Ku diulelu diayuyala dia Latuyalaka.