Mateu 7 - La Bible en Otetela (Bible K'Ekila) 1991

Dia Dialelu Dia Akambu wa Antu

¹ Tanyalaki akambu wʼantu, vo watukala akambu anyu.

² Ne dia wayala akambu anyu uku walanyu akambu awo. Wayunyedikela diango uku awaedikelanyu.

³ Ukundi enaye fumvufumvu lu su dia unyaye, keli we hakani dia wima utamba weli lu su diaye?

⁴ Ukundi eyaye mvutela unyaye wati: Ela nkutundja fumvufumvu lu su diaye, lamʼeli wima utamba lu su diaye weme?

⁵ We kanga lukesu, ntundu utayatundijisha wima utamba uma lu su diaye. Ku kuyenyi ololo dia ntundja fumvufumvu yeli lu su dia unyaye.

⁶ Tanyushaki fo engo kʼekila. Tanyukaki mboko yanyu yʼakeso la ntundu ka sumbu, ne dia yo yatukuyikamela la tshina dia sanga yayo, ndu yatukuyukadimo ku yo ndijunyatshatsha.

Dia Nomba Yediko ya Ntshanela

⁷ Nyolombe ku wayunyusha. Nyuyangi ku nyayena. Nyokokole, ku wayunyudihula.

⁸ Untu tshe latolombaka, atulungulaka. Untu latuyangaka, atenaka. Untu latokokolaka, wayudihula.

⁹ Untu akona lʼatei anyu, ukuki onʼandi olomba ukama wa ma, ku ndi mbusha dive?

¹⁰ Kana ndi mbolomba lusi, ku ndi mbusha ului?

¹¹ Okone, naka nyu antu wa kolo, mbeyaka mbisha anʼanyu eshasha wʼololo, Shenyu leli lʼulungu haleki mbisha antu wolomba diango diʼololo uka?

¹² Okone nyutsheli antu akambu tshe uku alanganyu vo nyutshela. Diui so dieko utundu wʼelembe la aui wa amvutshi.

Mbuka Hyendi

¹³ Nyoto lu suku dia tshitshe, ne dia suku dieli wuki, la mbuka keli wuki utsha lʼelanyelu, antu efula watotoka loko.

¹⁴ Ne dia suku dieli tshitshe, la mbuka keli tshitshe utsha lu lumu, antu atoi mbatukienaka.

¹⁵ Nyewo amvutshi wa kashi watuyakaka le nyu, wolotshi dikuhu dia ekoko, keli lʼetema awo weli ndjaundu ya ngala.

¹⁶ Nyayalimbitela uma lu elua awo. Undi antu watumbaka elua wa tomwemwe uma lu ekodi wʼatende, kana elua wa fingu uma lu ahangula koi?

¹⁷ Okone utamba tshe wʼololo atotokaka elua wʼololo. Keli utamba wa kolo atotokaka elua wa kolo.

¹⁸ Utamba wʼololo heyi nto elua wa kolo, kana utamba wa kolo nto elua wʼololo.

¹⁹ Utamba tshe wahato elua wʼololo, ayokotama, ayukandjema lu dja.

²⁰ Okone nyu nyayalimbitela uma lʼelua awo.

²¹ Aha untu tshe latumbetaka ati: Khumadiondjo, Khumadiondjo, kayoto lu diulelu dia lʼulungu. Keli paka one latutshaka lulangu la Papa leli lʼulungu.

²² Lushi loso, antu efula wayumvutela vati: Khumadiondjo, Khumadiondjo, shu kumvutaka akambu wahatayi lu lukumbu laye, shu kuntundjaka edienge lu lukumbu laye, shu kuntshaka akambu wa mamba efula lu lukumbu laye?

²³ Ku dimi layahunwela ndi: Dimi halanyeyi nduku yema. Nyumanganeli, nyu atshi wa kolo.

Atshina Ahendi

²⁴ Okone untu tshe latukaka aui ami ane, ndu latatshaka, ayufana la kanga yimba, lakahiki luudu landi ladiku dia dive.

²⁵ Mvula yakalo, dula diakayi, pepe yakapepe, yakakomama lu luudu lako. Keli lo kunyuko, ne dia lo lakahikama ladiku dia dive.

²⁶ Ku untu tshe latukaka aui ami ane, lahatatshaka, ayufana la kanga enginya, lakahiki luudu landi ladiku dia lokongo.

²⁷ Mvula yakalo, dula diakayi, pepe yakapepe, yakakomama lu luudu lako, ku lo lakanyuko. Enyukwelu kalo kaki wuki.

²⁸ Lamʼakashili Jesu mvuta aui aso, elui a waki wʼantu wakambi dia wetshelu andi,

²⁹ ne dia ndi akawaetsha uku kanga aui, aha uku afundji awo.