Mateu 19 - La Bible en Otetela (Bible K'Ekila) 1991

Jesu Ambumo Uma la Ngalili, Ambuya la Judiya

¹ Lamʼakashili Jesu mvuta aui aso, ndi akamo uma la Ngalili, akayi lu beke dia Judiya, la wedi wa Jorodana.

² Elui a waki wʼantu wakuyeli, ku ndi akakonoya leko.

Dikambu Dia Ndjaka Diwala

³ Afarise wakayi le Jesu, wakuhimbi, wakawumbula vati: Aha ekila dia pami nkimo wadendi lu akambu tshe?

⁴ Ndi akâkaluya diui ati: Nyu nyatali nyati: One lakatungi lʼetatelu, akatungi umi la wadi?

⁵ Ndu mbakandiati ati: Aha dia dikambu ne mbayutshika untu shi la nyangu, mbayundumamana la wadendi, ku vo ahendi wayuyala untu otoi?

⁶ Okone vo kema antu ahendi ntu, wambuyala untu otoi. Untu tamamitulaki kene kakamamanya Unyashungu.

⁷ Vo wakawumbula vati: Okoko wana wakati Mose dia mbisha umuntu mukandia wʼediakelu ka diwala, la mbukimo?

⁸ Ndi akawatela ati: Ne dia lunyu lʼetema anyu, mbaketawo Mose nyu nkimo wadienyu, keli uma lʼetatelu, kundjala osoku.

⁹ Dimi lambunyutela nti: Untu tshe layukimo wadendi, naka aha lu dikambu dia luseka, ku ndi ntshuka ukina, ndi ambunana. Lamʼayutshuka pami umuntu lukimwewo osoku, ndi ambunana.

¹⁰ Ambeki andi wakawutela vati: Naka dikambu dia umi la wadi dieko osoku, keti hasungana ntshukana.

¹¹ Keli ndi akawatela ati: Antu tshe haweyi nungula diui ne, paka wane wambushama wulu wa dilungula.

¹² Elenga emotshi weko, wakuto osoku uma lʼetema wʼanyengewo. Elenga ekina weko, wakatungwama le antu. Elenga ekina weko, wakayatungula ne dia diulelu dia lʼulungu. One leya nungula diui ne, adilunguli.

Jesu Ambulungula Tokendiakendia

¹³ Wakayi la tokendiakendia le Jesu, vati: Ayuwahe anya andi ndu alombele. Ku ambeki andi wakahangwela antu.

¹⁴ Keli Jesu akati ati: Nyete tokendiakendia wayi le mi, tanyasikeki, ne dia diulelu dia lʼulungu dieli dia antu uku vo.

¹⁵ Ku ndi akawahe anya andi, akamo leko.

Dikambu Dia Ukundji Wulu; Waho wa Ndjaseka

¹⁶ Nyulungi, untu akayi le Jesu, akati ati: Umbetsha, dikambu diʼololo diakona diayumutsha dia ndjala la lumu la pundju?

¹⁷ Ndi akawutela ati: Okoko wana wamumbulaye dia dikambu dieli ololo? Otoi eko, leli ololo. Keli naka we kalanga mboto lu lumu, ukitanyiaki elembe.

¹⁸ Ndi akawumbula ati: Elembe akona? Jesu akati ati: Tudiakaki Tunanaki. Tuvaki. Tumamanyiaki

¹⁹ Olemia sho la nyo. Ulangi unyaye uku ayalangaye

²⁰ Olongo a pami oso akawutela ati: Akambu aso tshe mbatumutshaka, dikambu diakona diambutshikala?

²¹ Ku Jesu akawutela ati: Naka we nangaka ndjala ololo tshe, utshu, utusundja dieli la ye tshe. Udisha akanga a wula, ku we ayuyala la diango lʼulungu. Kuyi, kuyundijeli.

²² Keli lamʼakuki olongo a pami diui so, ndi akatshu la lunyangu, ne dia ndi aki la diango efula.

²³ Jesu akatela ambeki andi ati: Mete kanyutelami ndi: Eotwelo ka kanga ongonyi lu diulelu dia lʼulungu eko wulu.

²⁴ Uambunyutela ntu ndi: Eotwelo ka kamelo lu ushu a tedi, ambuleka eotwelo ka kanga ongonyi lu diulelu dia Unyashungu dikambu dia tshitshe.

²⁵ Lamʼakuki ambeki diui so, vo wakambi efula, wakati vati: Akona ayeya nshimbamela?

²⁶ Jesu akawaende tee, akati ati: Antu haweyi ntsha dikambu so, keli Unyashungu mbeyaka ntsha akambu tshe.

²⁷ Ku Petero akûkaluya diui ati: Endia, shu tambutshika diango tshe, tambukuyela. Kayutukundja na?

²⁸ Jesu akawatela ati: Mete kanyutelami ndi: Lu lushi layuyala andja wʼuyuyu, lamʼayudjase Onʼa untu lu kati ka diulelu ka lutumbu landi, ndu nyu nyayudjase lu kati ya diulelu dikumi la hyendi, nyayulumbuya wedja dikumi la ehendi wa Isariyele.

²⁹ Untu tshe lambutshika mvudu, kana anangu, kana akadiyendi, kana shi, kana nyangu, kana ana, kana kete, ne dia lukumbu lami, ayulungula diango lukama lukama; ayukita lumu la pundju.

³⁰ Keli efula weli la ntundu, wayuyala lʼokongo; la efula weli lʼokongo, wayuyala la ntundu.