Etatelu 6 - La Bible en Otetela (Bible K'Ekila) 1991

Kolo ya Antu

¹ Lamʼakatatela antu nfulanela la kete, vo wakuti ana amantu.

² Ku ana apami a Unyashungu wakenyi vati: Ana amantu wakuti antu amena mbewo. Okone vo wakatshuki wane wakawasonola uma lʼatei awo.

³ Latuyalaka akati ati: Nyuma kami hutshikala le untu pundju, ne dia untu eko paka emunyi etu. Nshi ya lumu lʼuntu yayuyalaka deku lukama la akumi ahendi.

⁴ Akunguti wʼantu wakiko la kete. Ku lamʼakeyana ana apami wa Unyashungu la ana amantu wʼantu, vo wakuti la wo ana. Ana ako wakayala antu a waki, ndu wa lukumu lu nshi sho.

⁵ Latuyalaka akenyi ati: Kolo kʼantu kambuhama efula la kete, ndu tukanyi tshe tʼetema awo ndjalaka kolo ketu nshi tshe.

⁶ Latuyalaka akayatshumuya, akanyangi efula ne dia ndi akatungi untu la kete.

⁷ Ndi akati ati: Dimi layushila antu wakamatungi la kete, nyama, dikendakenda diayakutula, ndu fudu ya lʼulungu, ushiki. Lambuyatshumuya ne dia lakatungi.

⁸ Keli Noa aki ololo lu ashu wa Latuyalaka.

Noa Ambutsha Watu a Luudu

⁹ Nonga ya Noa nye. Noa aki ololo la uluwanyi lʼatei wʼantu wa lolonga landi. Ndi akakendakendaka la Unyashungu.

¹⁰ Noa akuti ana apami asatu: Sheme, Hama la lafeta.

¹¹ Kete yakayala kolo lu ashu a Unyashungu, yakaluli too la akambu wa ngala.

¹² Unyashungu akendi kete, ku ndi akenyi ati: Yo yambuyala kolo ketu, ne dia untu lʼuntu akalanya mbuka kandi.

¹³ Unyashungu akatela Noa ati: Ekumelu kʼengo tshe keli la lumu kambukuka lu ashu ami, ne dia vo wambuludia kete too la akambu wa ngala la dihotwanelu. Ulungi, dimi luyanga mbalanya kame la kete.

¹⁴ Kutshi watu a luudu lʼetamba wʼelshumbi. Katanya mvudu motshi lʼetei. Kukiti elungu lʼetei ndu lʼandja.

¹⁵ Kûtshi okone: utali awo kawuyali kubita kama shatu, wuki awo kubita akumi atanu, la wemema awo kubita akumi asatu.

¹⁶ Kutshiki didishi dimotshi lu watu a luudu dieli la kubita otoi lu wemema. Kutshiki suku lu eheli ka watu. Kuhimbuli mvudu shatu yahatanyi: otoi lʼesi, otoi lʼatei, la lukina ladiku.

¹⁷ Ulungi, dimi luyanga ntuma elula kʼashi la kete, dia nanya engo tshe keli la lumu lʼesi ulungu. Engo tshe keli la kete kayuvo.

¹⁸ Keli dimi layushikike daka diami le ye. We ayoto lu watu, anʼaye wʼapami, wadeye, la wadi wa anʼaye mbayoto kame la ye.

¹⁹ Uma lu wehu tshe wa diangu dieli la lumu, kotshiya pendi pendi lu watu dia dilama esenyu kame la ye. Dio kadiuyali wadi la umi, wadi la umi.

²⁰ Diango pendi pendi uma lu wuhu la wuhu diayuya uya le ye dia dilama esenyu: fudu uku wehu ayo, dungalunga uku wehu adio, ndu dikendakendaka tshe diayakutula la kete uku wehu adio.

²¹ Kose ndu wehu tshe wa mbu ya nde, kuwekitsha lasuki la ye. Vo kawuyali mbu ya nde yaye ndu yawo.

²² Noa akatshi osoku. Dikambu tshe diakawutela Unyashungu mbakandatshi.