Esambu 25 - La Bible en Otetela (Bible K'Ekila) 1991

Dombelo dia Nkundja Elombwelo, Editnanyelu, la Elamelu

¹ Latuyalaka li, dimi latediaka utema ami le ye!

² We Unyashungu ami, dimi latekamaka le ye, tetawoki dimi mbutshama sonyi!

³ Tetawoki wane tshe weli la elungamelu le ye, mbutshama sonyi. Wane watudiakaka elembe, wutshami sonyi!

⁴ Unimbitshiya esese aye, we Latuyalaka! Umbetsha mbuka yaye.

⁵ Onombolaki lu mete kaye, umbetshaki, Ne dia we keli Unyashungu a panda kami. Dimi latukulungamelaka yanyi tshe.

⁶ Latuyalaka li, uhoki ketshi kaye la ngandji kaye ka shikaa! Ne dia yo yatuyalaka le ye umaka nshi yʼedjedja.

⁷ Tuhoki kolo yaki la mi lu nshi ya dikenda, kuyanga munga yami. Umbuhoki uku eli ngandji kaye ka shikaa, Ne dia ololo aye, we Latuyalaka!

⁸ Latuyalaka eko ololo ndu uluwanyi, Diako mbatundenyaka antu wa kolo mbuka.

⁹ Ndi atolombolaka akanga a ndjakitshakitsha lu akambu wʼololo, Atulimbitshiyaka akanga a ndjakitshakitsha mbuka kandi.

¹⁰ Tuwuka tshe ta Latuyalaka teli ngandji ka shikaa la kolamelu Le wane tshe watulamaka daka diandi la elembe andi.

¹¹ Latuyalaka li, ne dia lukumbu laye, Unyimanyiya kolo kami, ne dia to keko wuki!

¹² Untu akona atukaka Latuyalaka woma? Latuyalaka ayuwulimbitshiya mbuka kayundosonola.

¹³ Utema andi ayuyalaka ki; Tukanula tandi wayukita kete.

¹⁴ Ekesanelu ka Latuyalaka keko le wane watuwukaka woma. Ndi ayuwaetshaka daka diandi.

¹⁵ Dimi latediyaka ashu ami tena tshe utsha le Latuyalaka, Ne dia ndi ayunya akaka ami uma lʼotei.

¹⁶ Usikiso uya le mi, umbuki ketshi, Ne dia dimi lambukalema, lambusuyama.

¹⁷ Toshoko tʼutema ami tambotekoya: Uminya uma lʼatei wʼasui ami.

¹⁸ Endi shoko yami la sui diami, Unyimanyia kolo yami tshe.

¹⁹ Enda atunyi ami, vo waya efula, Vo watumpetshaka luhetshu la mamba.

²⁰ Ulamaki utema ami, unshimbeli. Tetawoki dimi mbutshama sonyi Lamʼatumekamaka le ye.

²¹ Ololo la uluwanyi wanamaki Lamʼatumukulungamelaka.

²² We Unyashungu ushimbeli Isariyele Uma lʼehenyohenyo awo tshe.