Enyelo 22 - La Bible en Otetela (Bible K'Ekila) 1991

Ndjali ka Lumu; la Akatshi wa Nkonoya Wedja

¹ Ndi akamenya ndjali kʼashi a lumu, a wema pesopeso uku talatala, watumba uma la tshina dia kiti ka diulelu ka Unyashungu la ka Ona-Okoko,

² lʼatei wʼosese ato. La wedi a ndjali kaki utamba a lumu, wakatokaka wehu dikumi la ehendi wʼelua. Vo wakatokaka elua la ngondo la ngondo: akatshi wʼutamba waki dia nkonoya wedja.

³ Nduku mananu kayuyala leko. Kiti ka diulelu ka Unyashungu la ka Ona-Okoko kayuyala loko. Ekambi andi wayôtemolaka.

⁴ Vo wayena elundji kandi. Lukumbu landi layuyala lu fumu yawo.

⁵ Huyala utshu leko. Vo hawuhumbi usasi wa tala kuyanga usasi wa unya, ne dia Khumadiondjo Unyashungu kayuwahetela. Vo wayulela pundju pundju.

“Lakitanyia Aui Weli lu Buku ne, Eko la Otshoko”

⁶ Ndi akamvutela ati: Aui ane weko wa kolamelu la wa mete. Khumadiondjo, Unyashungu a nyuma ya amvutshi, akatumi ondjelo andi dia menya ekambi andi akambu waya ka ndja.

⁷ Nyulungi, dimi layuya esadi. One latulamaka aui wʼakambu wahatayi wa lu buku ne eko la otshoko.

⁸ Dimi Joani kakuki, ndu kakenyi akambu ane. Ku lamʼakamuki, la lamʼakamenyi, dimi lakakhusama lʼekulu wa ondjelo wakamenya akambu ako, dia mbotemola.

⁹ Ku ndi akamvutela ati: Endi, tutshaki wuhu uku! Dimi leko ukambi uku we, ndu uku ananyo, amvutshi, ndu wane watulamaka aui wa lu buku ne. Otemole Unyashungu.

Diui DiʼEshilelu

¹⁰ Ndi akamvutela ati: Tufuleki aui wʼamvutshi weli lu buku ne, ne dia etena kaya suki.

¹¹ One leli kolo atshikali lu kolo kandi. Utshi wʼakambu wa sonyi atshikali lu akambu andi wa sonyi. One leli ololo atshikali lu ololo andi. One leli lʼekila atshikali lu ekila kandi.

Etsha la Difutu Diawo

¹² Nyulungi, dimi lundjayi esadi, leko lundjayi ndu la difutu diami dia nfuta untu tshe, uku eh etsha andi.

¹³ Dimi leko Alafa la Omenga, la ntundu ndu la ndjihelu, etatelu ndu ekumelu.

¹⁴ Wane wakotsha ekutu awo, dia vo ndjala la wulu wa ndja lʼutamba a lumu, la dia mboto lu asuku wʼusumba weko la otshoko.

¹⁵ Lʼandja wʼusumba keli fo, la akanga wʼaloka, la amunanyi, la andjakanyi, la atemodi wa dikishi, la One tshe latulangaka ndu latutaka kashi.

¹⁶ Dimi Jesu lakatumi ondjelo ami dia ndjunyutela akambu ane, dia nyu mvutela ekelizia. Dimi leko lukuno ndu kanula ya Davidi, sunga yoto ya ngaingai ya pindju.

Diui Dia Mbeta Antu

¹⁷ Nyuma la Utshukami wambuta vati: Yaka! One luka ati ati: Yaka! One leli la pusa ayi! One lalanga ose ashi a lumu wososa.

Diui Dia Mbewula Antu: “Taheki, Tahulaki!”

¹⁸ Dimi lambutela untu tshe luka aui wʼakambu wahatayi weli lu buku ne nti: Naka untu ayahe aui akina ladiku dia aui ako, Unyashungu ayuwahela asui wufundami lu buku ne;

¹⁹ ndu naka untu ayunya aui wʼakambu wahatayi wufundami lu buku ne, Unyashungu ayuwunyiya etenyi kandi uma lʼutamba a lumu, ndu uma lʼusumba wʼekila, wufundami lu buku ne.

Diui Dia Daka

²⁰ One lata aui ane kata ati: Ee, layuya esadi! Ayali osoku! Khumadiondjo Jesu, uyi!

Diui DiʼEtshokwelo

²¹ Ngandji ka mamba ka Khumadiondjo Jesu kayali la ekilami tshe! Ayali osoku!