Danyele 12 - La Bible en Otetela (Bible K'Ekila) 1991

Etena kʼEkumelu

¹ Lu Uena keso Mikaele, uwandji a wuki, ulami wʼasi wudja aye, ayunela. Pa kayuyala lʼetena kako, wuhu wahatayala lu wudja edja ndu etena kako. Keli lʼetena keso, asi wudja aye tshe, wufundami numbu lu buku, wayushimbamela.

² Efula ka waku wuladi djo lu ditshu dia kete, wayulo: amotshi utsha lu lumu la pundju, la akina utsha lu sonyi la wononyi wa pundju.

³ Akanga a yimba wayohetaka uku ngaingai kʼulungu. Ndu wane watukadimulaka antu efua utsha lu akambu wʼolola, wayohetaka ngaingai nshi tshe pundju uku toto.

⁴ Keli we Danyele, ushe aui ane, udihe buku la ematelu edja ndu lʼetena kʼekumelu Efula wayulawolawo lene la lene, ewu kayuyala efula.

⁵ Lamʼakamendaka, dimi Danyele, menyi ku antu ahendi akina ane, omotshi emadi lʼumamu wʼokedi wedi one, la ukina wedi ukina.

⁶ Omotshi akambula untu lakalotshi ahondo wa linene, laki la diku dia ashi wʼokedi, ati: Etena kakona kayushila akambu ane wa mamba?

⁷ Untu lakalotshi ahondo wa linene, laki la diku dia ashi wʼokedi, akeme lunya landi la pami ndu lunya landi la lomoso utsha lʼulungu Dimi lakawuki ndi atshiba one latulumbaka pundju ati: Akambu ane wayuyala etena kemotshi, tena pendi, la etenyi otoi ka hendi kʼetena. Lamʼayuwushidiya nanya wulu wa wudja wʼekila, akambu ane tshe wayushidiyama.

⁸ Dimi lakuki aui aso, keli dimi kunshihudia. Ku dimi lakawumbula nti: Khumemi li, ngandi ayuyala ekumelu kʼakambu aso?

⁹ Ku ndi akankaluya diui ati: Danyele, tshoka, ne dia aui wambushama, wambudihama ematelu edja ndu lu etena kʼekumelu.

¹⁰ Antu efula wayuyaedia, wayuyakidia, wayuyaete pudipudi. Antu wa kolo wayutshaka kolo, ku nduku otoi lʼatei wʼantu wa kolo ayushihudia akambu ane, keli waku weli la tumba wayashihudia.

¹¹ Umaka etena kayuwotola ulambu wa lutshumba wa la lushi la lushi, ndu kayuweme engo ka wononyi ka unanyishi, ayuyala nshi kinunu kama hyendi la akumi divwa.

¹² One layukunga, ndu layukuma lʼekumelu ka nshi kinunu kama shatu akumi asatu la tshanu, ayuyala la otshoko.

¹³ Keli we, okendakendaki lu mbuka kaye edja ndu lʼekumelu, ne dia we ayumuya ndu ayemala lu dinuli diave lu ekumelu ka nshi.