Filimoni 1 - Takwane

Pawulo ni Timoteyo enomulojela Filimoni

^1-2 Wa we Filimoni, mukwiihu oodhivela oli mmabasani mamohive ni hiyo. Di miyo Pawulo, oofugeliwa mwaha wa Yesu Kirixtu, vamohi ni ddibilihu Timoteyo. Nnowuulebela kaarata ela we vamohi ni murogorihu Afiya, ni Arikipu, onalaba ni hiyo, ni gerezha enatugumana ni weevo vaade vaawo.

³ Mulugu Babiihu ni Nabwiya Yesu Kirixtu yuuvaheni mahala ni murenddele mmirimani mweenyu.

Pawulo onomulobelela Filimoni

⁴ Goolobelelaga we ginomutthettheela Mulugu

⁵ mwaha wi ginowiiwa odhivela winniiwena ni oweela mirima aatene, ni nroromelo ninniiwena ni Nabwiya Yesu.

⁶ Ohunona dhapama dhaatedhene Mulugu dhanivahiliiye mwaha wa omohi weehu ni Kirixtu. Ginolobela vowi ohunona dhedhi, waandana waawo ni aKirixtu amohi omwadheye.

⁷ Odhivela waawo onogivaha ohagalala wuulubale ni ogilibiha murima, mwaha wi we, ddibila aaga, onovivihedha mirima dha athu oweela mirima.

Pawulo onomuloba Filimoni wi amwaakele Onezimu

⁸ Mowindo, gihikanna owodha mwa Kirixtu wi guulamule wi wiirena dhifwaneeliiwe wiirana,

⁹ mbwenye ni odhivela winnimina ni we, ginafuna wi giire wuuloba, baahi. Miyo, Pawulo, kalaba teto oomagiwa mwaha wa Yesu Kirixtu,

¹⁰ ginowuukokomeza mwaha wa Onezimu, orugunuwe akala mwaana aaga mwa Kirixtu ngali mukaambura.

¹¹ Wale Onezimu kaavaha mpurelo wa we, mbwenye dhiinova onovaha mpurelo wa we ni wa miyo.

¹² Miyo ginomuwelihedha Onezimu mundduli wona ginarumiha murima waaga.

¹³ Gahifuna wi akalege ni miyo agikamihedhege vamburoni vaawo veva giliimi oomagiwa mwaha wa Muselu Wapama.

¹⁴ Mbwenye kagafunile wiirana yego ohugirumeedhihe wi opama waawo ohukale wowuuwaddihedha mbwenye mwa ofuna waawo.

¹⁵ Kaahi Onezimu ahimwalanihiwa ni we mudhidhi vang'ono wi okalena oliye okala ni okala,

¹⁶ ahili wona mudhaari, mbwenye oomukwaranya mudhaari. Okalena oliye wona ddibilihu oodhivela. Miyo ginomudhivela vajinji, mbwenye omudhivela waawo oneere okwaranya omudhivela waaga. Oneerege omudhivela mwaha wi oliye muthu teto mwaha wi di ddibilo mwa Nabwiya.

¹⁷ Vano akala onogiira mukwaawo a mmabasani, omwaakele Onezimu wona onagaakela miyo.

¹⁸ Akala oliye ohuuthegela naari ohuufiyaari yego, olebele dhuufiyaariliiye mu ndina naaga.

¹⁹ Miyo Pawulo ni madada aaga-aaga ginoleba nda: Miyo ginoliva dhaatedhene. Kaginawoge wi we onogifiyaari egumi yaawo-yaawo.

²⁰ Mwaha wa Nabwiya, ddibilaga, ogiirele dhedho ginalobiimi. Ovivihedhe murima waaga mwa Kirixtu!

²¹ Ginowuulebela moororomela wi weevo oneere ogiiwelela, ginonaga wi oneere wiirana dhookwaranya vajinji dhedho dhinoolobiimi.

Malojelo oogomihedha

²² Ginowuuloba teto wi ogisasanyedhe suubi aaga, vowi ginojejiha wi Mulugu oneere waakula malobelo eenyu vano agihiye wi gidhe wa nyo.

²³ Epafora, ofugeliwe ni miyo mwaha wa Yesu Kirixtu, onowuurumihedha malojelo.

²⁴ Maruku, Arixtariku, Dema ni Luka, enalaba ni miyo teto enowuulojela.

²⁵ Mahala a Nabwiya Yesu Kirixtu ekale ni mineba dheenyu.