AKolose 1 - Takwane

Madhu oolojela

^1-2 Wa oweela mirima, amudhi oororomeleya mwa Kirixtu a oKolose. Di miyo Pawulo, murumiwi a Yesu Kirixtu moofuna wa Mulugu, vamohi ni ddibilihu Timoteyo, ninowuulebelani kaarata ela. Mulugu Babiihu oovaheni mahala ni murenddele mmirimani mweenyu.

Otthettheela ni olobela

^3-4 Nihiiwa dha ororomela weenyu mwa Yesu Kirixtu ni odhivela weenyu winniinyuna wa oweela mirima aatene, mowindo naalobelaga nnomutthettheela Mulugu, Baabi a Nabwiya eehu Yesu Kirixtu, mwa nyo.

⁵ Muhukanna nroromelo ndda ni odhivela wula mwaha wi muhunona moohaanganyedha wi dhego dhapama dhinowuujejihani, dhilogoleliwe odhulu. Mwihiiwa wa dhedhi viiwiliinyu mutheenga wa ebaribari oli Muselu Wapama ofiyile wa nyo.

⁶ Mutheenga ola wahifiya teto elabo ya vati yaatene ovahaga furuuta wunnuwaga mwemo wona wunnuweliiwa mmirimani mweenyu wambeela nlabo neewiliinyu, mwahirumeedha mutheenga wa ebaribari oli mvahi wa mahala a Mulugu.

⁷ Nyo mwihiiwa mutheenga ola ni Epafora oodhivela. Nihilaba vamohi ni oliye wona adhaari a Mulugu, oliye di mwiimeleli a Kirixtu oororomeleya wa nyo.

⁸ Oliye ohunaaddela dha odhivela weenyu mwaakeliliinyu ni Muneba wa Mulugu.

⁹ Mowindo okuma nlabo veewiliihu dha nroromelo neenyu ni odhivela kanimaalile wuulobelelani, nlobaga wi mudhaalihiwe ni ononelamo wa ofuna wa Mulugu, nlobaga wi mukalena mukalelo waatene wa tthottho, nlobaga wi mwiiwelelegemo pama moobuwelelo a Mulugu.

¹⁰ Ginomuloba wi nyo mwaandege weedda ni mukalelo wofwaneelela mwa Nabwiya, mmudhivelihaga oliye mwa dhaatedhene, mwiiragana mukalelo dhaatedhene dha meerelo apama, munnuwaga moomunona Mulugu.

¹¹ Nnoloba wi Mulugu oolibihegenive ni owodha wa nthithimiho naaye nihinna omagomelo wi nyo munaholowe mwafwanyiwa makathamiho teto wi mukalegeve oovilela, oohagalala,

¹² mmutthettheelaga Baabi, wuwiirileni nlogo naaye wi mudhe mukalena mareeliho esasanyedheliwe oweela mirima mwa Omwene wowaara.

Yesu Kirixtu dili ookwaranya dhaatedhene

¹³ Baabi ohunivulumusa mwa omwene wa epipi, vano ohunitamihedha wuumweneni wa Mwaanaye oodhivela.

¹⁴ Mwa oliye nihikanna wooboliwa, oleveleliwa wa dhoothega.

¹⁵ Oliye nladdaniho na Mulugu oohooneya, yoofuneyesesa mwa dhoopaddusiwa dhaatedhene.

¹⁶ Vowi oliye dipaddusile dhego dhaatedhene, odhulu ni elabo, dhowooneya ni dhohooneya, naari ale enalamula, naari anamathonga, naari mamwene, naari aatene yinna owodha, dhego dhaatedhene dhedho dhipaddusiwe odheela mwa Yesu, teto dhipadduseliwe mwaha wa oliye.

¹⁷ Oliye daaliwo, dhego dhaatedhene dhihinakalewo, vano dhego dhaatedhene dhinalaba mwa othongi waaye.

¹⁸ Oliye dili muru wa mwiili, eli gerezha. Oliye dili wambeela. Daali owambeela ovenyihiwa vaari va anookwa, wi oliye akale mwa dhego dhaatedhene dhoofuneyesesa.

¹⁹ Vowi waali ofuna wa Mulugu wi mukalelo, owodha, kopolo dhaaye dhikale mwa Mwaana.

²⁰ Teto odheela mwa oliye, Mulugu awelihedhe waandana wa oliyeene dhego dhaatedhene, naari dha vati naari dha odhulu, eerihedhaga murenddele odheela mwazi wa vamuraddini wa Yesu.

²¹ Nyo wale mwaali oomwalanihiwa ni Mulugu, okala amwiiddani aaye mmoobuweloni mweenyu mwaha wowiira dhego dhabure,

²² mbwenye dhiinova Yesu ohuwelihedha waandana wula mmwiilini mwaaye odheela mwa okwa waaye wi owooneyiheni vameentoni va Mulugu, mwiiriwe oweela mirima, oohukanna yoothega, oohukanna yoosumululiwana,

²³ akala ebaribari munokalave ootibeleya, mooliba munroromeloni muhuthikeyaga moojejiha Muselu Wapama mwiiwiliinyu, oyene olaleyeliwe dhoopaddusiwa dhaatedhene dha elabo. Oyene miyo Pawulo, gisadduwiliimi okala mwiimeleli.

Mabasa a Pawulo a gerezha

²⁴ Dhiinova ginohagalala girabulaga wi guukamihedheni, ginorabula mwa dhaatedhene Kirixtu dhinalamuliiye wi girabule wi gikamihedhe gerezha yaaye, eyene eli wona mwiili waaye.

²⁵ Gihisadduwa okala mwiimeleli a gerezha odheela moothomiwa ni Mulugu, ohugivaha mabasa owusuuzihani mowaakwana madhu aaye,

²⁶ eli ya wipiini yalogohiwe okuma omambeelelo, okuma wale mbwenye dhiinova ohooneyihiwa wa oweela mirima aaye.

²⁷ Mulugu afuna anoonihe dhooreela dhoothithimiheya wa dhoorusa nde vaari va athu oode, oli Kirixtu mwa nyo, yoojejihedha ya nthithimiho.

²⁸ Nimvuwihaga oliye, nawaaddelihaga dhowoopiha athu aatene, naasuuzihaga athu aatene ni tthottho dhaatedhene, mwaha wi naande waanoniha athu aatene yunnuwege munroromeloni mwa Kirixtu.

²⁹ Mwaha wa efunelo ela ginowiilibihedha, giwanaga odheela owodha waaye onalaba ni kopolo wa miyo.