AEfeso 3 - Takwane

Mulugu ahimuruma Pawulo waalaleyela azhentiyu

¹ Mwaha wi Mulugu ohaagumaniha malogo ala meenddi miyo, Pawulo, ginowuulobelelani. Gili oofugeliwa mukaambura mwaha wa mabasa Yesu Kirixtu egivahiliiye ohidda wuulaleyelani azhentiyu.

² Gihikalana ebaribari wi mwihiiwa dha mabasa ayene ginkeleliwiimi mwa mahala a Mulugu, mabasa owuukamihedhani nyoovo.

³ Mulugu ohugivuhulela dhoomaruwela dhaaye wona guulebeliimini mwa madhu oogwaddela,

⁴ ayene mwaweelengaga, muneerege wiiwelelamo nde dhineewelela miyo wa yoomaruwela ya Mulugu, oli Kirixtu.

⁵ Wale Mulugu kaavuhulele yoomaruwela eyo wa ababiihu, mbwenye vano, Muneba ohuvuhulela eyo wa arumiwi oweela mirima ni aliba ovuhulela.

⁶ Yoomaruwela eyo si ela, azhentiyu eneere yaakele mareeliho mamohive ni aZhudewu, malogo meenddi ala ehisadduwa okala mwiili mmohive. Meenddi ala, muumohini ni Yesu Kirixtu, enowaakela dhoororomeliha dha Mulugu. Ola bu Muselu Wapama.

⁷ Mwa mahala aaye, Mulugu ohugivaha mabasa oolaleya Muselu Wapama ola, ohugisasanyedha ni owodha wa kopolo dhaaye.

⁸ Naari ngalive ooyeva mwa aKirixtu aatene, ohugivaha mahala ala owaalaleyela azhentiyu Muselu Wapama wa dhooreela dhoohupimeya dha Kirixtu.

⁹ Teto Mulugu ohugivaha mabasa owawaaddela athu aatene wona mwemo munaakwanelihiiye omaruwela waaye. Okuma omambeelelo vapaddusiliiye dhaatene, ofiyedha peeno, kavuhulele wa muthu yoomaruwela ela.

¹⁰ Yoofuna yaaye yaali yowi dhiinova avuhulele wa angero aatene ni mineba dhabure dhaatedhene wi oliye da tthottho mwa dhaatedhene. Makuru meenddi ala eneere yoone nda yawoonaga aZhudewu ni azhentiyu muumohini mwa nikuru nimohive.

¹¹ Ela yaali yoomaruwela yaaye okuma elabo ehinapaddusiwe. Dhiinova ohaakwaneliha yoomaruwela ela odheela dhedho dhiirile Yesu Kirixtu Nabwiya eehu.

¹² Mwaha wi nnomuroromela Kirixtu, mwaha wi nili muumohini ni oliye, nnowaanda ofiya vameentoni va Mulugu, nihoovaga.

¹³ Mwaha wa dhaatedhene dhedho dhuwaaddeliimini dha yoomaruwela ya Mulugu, ginowuulobani wi muhukukumuwe mwaha woorabula waaga mukaambura. Gili va mwaha wowuulaleyelani. Moohiyaniha, mukale owiithukula.

Pawulo onowaalobelela aEfeso

¹⁴ Mwaha wa dhaatedhene Mulugu dhiiriliiye, ginookokora moolobela vameentoni va Babiihu,

¹⁵ oyene opaddusile, athoma emudhi yaatene ya odhulu ni ya vati.

¹⁶ Ginolobela wi Muneba Woweela wuulibiheni ni owodha mmirimani mweenyu ni mareeliho majinji mwa Muneba.

¹⁷ Ginolobela Kirixtu akale mmirimani mweenyu, mwaha woomuroromela oliye. Ginolobela wi misisi dheenyu, milongothi dheenyu dhitibeleye mwa odhivela.

¹⁸ Mowindo, ginolobela wi nyo mwiiwelelegemo, vamohi ni athu a Mulugu aatene, dha orambalala, olapa, otaama, oddiiha wa odhivela wa Kirixtu.

¹⁹ Ginolobela wi mudidele odhivela wula wi onokwaranya ononelamo wa athu wi makalelo eenyu efiyedhe okala wona makalelo a Mulugu.

²⁰ Nimutamaale Mulugu odheela mwa owodha waaye onalaba mwa hiyo, vowi onowaanda wiirana dhijinji okwaranya dhinamulobiihu, naari dhinoobuweliihu dhinowaanda wiireya.

²¹ Ootamaaliwa akale Mulugu mwaha wowunnuwa waaye onooneyihiwa mwa aKirixtu, onooneyihiwa mwa Yesu Kirixtu. Anamabaliwelamo aatene a mudhidhi dhaatedhene enoodha, emutamaalege Mulugu. Ameni!