AEfeso 2 - Takwane

Wooboliwa odheela mwa mahala

¹ Nyo mwaali ookweene mminebani mwaha woohiiwelela weenyu ni dhoothega dheenyu dheeddeliinyu.

² Mudhidhi olene mweeddela mukalelo wabure wona wa elabo ya vati; mweewelela muneba wootakala ole onalamula vadhulu va mineba dhaatedhene, oliye di mwene onawaang'anela ale ehinamwiiwelela Mulugu.

³ Wale hiyo aatene teto needda makalelo ayene. Needda wona mwa mukalelo wa emuthu yeehu, niiragana dhafuna mwiili ni tthottho dheehu. Mowindala, naali athu a mwiili wona amohiwa, mwaha wa ela Mulugu akala ootakaleliwa ni hiyo.

⁴ Mbwenye Mulugu dooreela mwa thagaraga, ononidhivela valubalevene. Mwaha wa ela

⁵ ohunivaha egumi mwa Kirixtu, nigalive ookweene mwa dhootakala dheehu. Nyo muli oovulumusiwa ni mahala a Mulugu.

⁶ Vowi nili vamohi ni Kirixtu, Mulugu ohunivenyiha muukwani mwaha wa Kirixtu, onikaraatiha ni Yesu Kirixtu mmamburoni a mudhulu-dhulu wi nilamulege ni oliye.

⁷ Mulugu ahiira nda wi mwa mudhidhi dhaatedhene dhinadha osogolo oonihe wuunnuwa woohupimeya wa mahala aaye, oonihaga odhivela waaye wa hiyo mwaha wa Yesu Kirixtu.

⁸ Nyo muli oovulumusiwa mwaha wa mahala oorumeedhiwa mwa nroromelo, ovulumusiwa kunadha wa nyoovo, eehi. Yoovaha ya Mulugu.

⁹ Ovulumusiwa kunadha mwa mabasa, mwaha wa ela kakalevo owiithukula.

¹⁰ Dhiinova hiyo nili oopaddusiwa axa a Mulugu, oosasanyiwa mwaha wookala muumohini ni Yesu Kirixtu wi niiregena meerelo apama, meerelo Mulugu yaasasanyiliiye wi nawiiregena.

Mulugu onowawaandaniha azhentiyu ni aZhudewu mwa Kirixtu

¹¹ Nyo, mwabaliwe mwa azhentiyu, mweethaniwa oohugwaddiwa ni ale yagwaddiwe, ogwaddiwa wula wa aZhudewu waali mweeddelo weeriwana ni madada a athu.

¹² Muubuwelege mwa mudhidhi ole mwahanninyuna Kirixtu, mwaali aleddo, amarala, oomwalanihiwa ni mulogo wa Ezarayeli. Kamweelengeliwe ni aZhudewu mwa mapangano ni Mulugu. Mwa mapangano alena Mulugu ohiirana yoojejihedha ni aliwa. Mbwenye mweedda mwihinna yoojejihedha, muhumunonile Mulugu.

¹³ Mbwenye dhiinova, mwa Yesu Kirixtu, nyo azhentiyu mwaali woolapela ni Mulugu muhaaddamelihiwa ni mwazi wa Kirixtu.

¹⁴ Oliye ohusasanya murenddele vaari va hiyo, oode ni aZhudewu, ohunigumaniha. Obwanyulavo wiiddana weehu waali wona cinga nanimwalaniha.

¹⁵ Ohaakwaneliha murenddele vaari va hiyo vookwa vamuraddini, ohumariha gano dha malamulo a aZhudewu. Yoofuna yaaye yaali wi mwa malogo ala meenddi apadduse nlogo nimohi nixa, muumohini ni oliye, mowindo ohusasanya murenddele vaari va ala meenddi.

¹⁶ Okwa wa Kirixtu vamuraddini ohubwanyula wiiddana waali vaari va malogo ala meenddi. Ni muraddi, oliye waagumaniha mwa mwiili mmohive, wawaandaniha mameenddeene ni Mulugu.

¹⁷ Ahidha wuulaleyelani murenddele wa nyo azhentiyu mwaali woolapela, waalaleyela murenddele aZhudewu yaali owaaddamela.

¹⁸ Mwa oliye, hiyo ni nyo, nihikanna waanda ofiya wa Babiihu, mwa Muneba mmohive.

¹⁹ Mwaha wa ela, dhiinova nyo kamuli amarala naari aleddo wa nlogo na Mulugu, dhiinova muli nlogo nimohive, muli emudhi ya Mulugu.

²⁰ Muli wona nyuba emagiwe vadhulu va arumiwi ni aliba ovuhulela, Yesu Kirixtu mwiinyeene, dili nibwe noohiddeela.

²¹ Mwa oliye dhaatedhene dhinoliba, mwa oliye nyuba enowunnuwa ofiyedha okala nyuba ya Nabwiya yuulubale.

²² Mwa oliye nyo azhentiyu teto munomagiwa vamohi ni oororomela amohiwa wi mukale nyuba eyene munakala Muneba Woweela wa Mulugu.