馬可 6 - 客語聖經 – 現代臺灣客語譯本，新舊約全書客語聖經 – 漢字版

拿撒勒人拒絕耶穌

¹ 耶穌離開該地方，倒轉去自家个家鄉；厥學生也跈等佢。

² 到安息日，佢在會堂教訓人。當多人聽到佢个話就盡奇怪，講：「這儕人對㖠位得到這個本事呢？麼人給佢這個智慧呢？無想到佢還會行神蹟噢！

³ 佢敢毋係木匠？佢毋係馬利亞个孻仔，雅各、約瑟、猶大㧯西門个阿哥嗎？佢該兜老妹毋係住在𠊎等這位嗎？」佢等就拒絕佢。

⁴ 耶穌對佢等講：「除了在自家个本鄉、本族、本家以外，先知全部受人尊敬。」

⁵ 恁樣，佢在該位就無法度行麼介神蹟，只有按手在一兜病人个身上，來醫好佢等。

⁶ 因為該兜人毋肯信，佢感覺非常奇怪。 耶穌繼續在附近逐個村莊教訓人。

耶穌差遣十二個學生

⁷ 佢喊十二個學生來，派佢等兩儕兩儕共下出去。佢賜佢等逐邪靈个權柄，

⁸ 又吩咐佢等講：「出外个時，除了一支柺棍仔，毋好帶麼介東西；毋好帶食物㧯旅行袋，衫袋肚也毋好帶錢；

⁹ 愛著鞋，總係毋好加帶一領內衫。」

¹⁰ 佢又對佢等講：「你等去到一個所在，㖠家人肯接待你等，就住在該位，直到你等離開該所在。

¹¹ 無論到麼介所在，若係該位个人毋接待你等，也毋聽你等个話，你等就離開該所在，也愛將腳項个泥粉蹬掉，來表示對佢等个警告。」

¹² 學生就出去傳道，勸人棄邪歸正。

¹³ 佢等也逐走盡多鬼，用油膏盡多病人，醫好佢等。

施洗約翰个過身

¹⁴ 關係耶穌个一切事，希律王全部有聽到，因為耶穌个名聲已經傳到逐所在。有人講：「佢係行洗禮个約翰返生，正會有行這兜神蹟个能力。」

¹⁵ 有人講：「佢係以利亞。」 也有人講：「佢係先知，像古時代个先知。」

¹⁶ 總係希律聽到這兜話，就講：「佢就係被𠊎斬頭个約翰返生了！」

¹⁷ 原來，希律識喊人去捉約翰，將佢䌈等，關在監獄肚。希律做這個事係愛給希羅底歡喜；希羅底係希律个兄弟腓力个𡜵娘，總係被佢佔來做𡜵娘。

¹⁸ 約翰再三責備希律講：「你佔兄弟个𡜵娘係違法个！」

¹⁹ 因為恁樣，希羅底心中怨恨佢，想愛害死佢，總係無機會；

²⁰ 因為希律知約翰係正直聖潔个人，所以就敬重保護佢。希律逐擺聽到約翰所講个話，心中就無平安，總係又盡歡喜聽佢講論。

²¹ 希羅底所等个機會到了。希律生日个時，舉行盛大个宴會，辦桌招待文武百官㧯加利利民間个領袖。

²² 筵席中，希羅底个妹仔 入來跳舞；希律㧯人客全部盡歡喜。所以王對細阿妹仔講：「由在你對𠊎要求麼介，𠊎一定會賞你。」

²³ 佢又發誓講：「無論你求麼介，就係𠊎个一半江山，𠊎也會給你！」

²⁴ 該細阿妹仔出去問厥姆，講：「𠊎愛求麼介正好呢？」 厥姆講：「施洗約翰个頭那。」

²⁵ 細阿妹仔黏時倒轉來見王，求講：「求王即時將施洗約翰个頭那放在盤肚給𠊎！」

²⁶ 王聽到這個請求，非常為難；總係佢已經在人客面前發誓，就無想愛拒絕細阿妹仔个請求。

²⁷ 所以，佢即時命令衛兵去拿約翰个頭那來。衛兵就去到監獄，斬約翰个頭那，

²⁸ 放在盤肚，㨮給細阿妹仔；姖就交給厥姆。

²⁹ 約翰个學生聽到這個消息，就來將約翰个身屍領走，葬在墳墓底背。

給五千人食飽

³⁰ 使徒倒轉來見耶穌，將佢等所做所傳个一切，全部對佢報告。

³¹ 因為來來去去个人盡多，耶穌㧯學生無閒到無時間好食飯，所以佢對佢等講：「你等跈𠊎來，𠊎等來去偏僻个所在休息一下。」

³² 佢等就坐船出發，恬恬仔去偏僻个所在。

³³ 總係，有盡多人看到佢等離開，黏時認到係佢等。眾人就對逐個城出來，相爭𢲾背趕去，比耶穌㧯學生先到該所在。

³⁴ 耶穌一上岸，看到這一大群人，就憐憫佢等，因為佢等像無牧人个羊群共樣；佢就教佢等盡多道理。

³⁵ 臨暗仔个時，學生來見耶穌，對佢講：「天暗囉，這位又係偏僻个所在，

³⁶ 請喊大家離開，好俾佢等去附近个村莊買東西食。」

³⁷ 總係耶穌應講：「你等給佢等食！」 佢等講：「你愛𠊎等用兩百隻銀錢 去買餅仔給佢等食係麼？」

³⁸ 耶穌㧯佢等講：「你等去尋看哪，總共有幾多餅仔？」 佢等尋倒轉來講：「只有五隻餅，兩尾魚。」

³⁹ 耶穌吩咐學生喊眾人分開坐在草坪頂。

⁴⁰ 眾人就坐下來，有兜一排一百儕，有兜五十儕。

⁴¹ 耶穌將五隻餅㧯兩尾魚拿起來，昂頭望天，感謝上帝，然後擘開餅仔，交給學生；學生就分給眾人。像恁樣，佢也將兩尾魚仔分給大家。

⁴² 大家全部食到飽；

⁴³ 學生將所賸个餅碎仔㧯魚碎仔拈起來，裝滿十二隻籃仔。

⁴⁴ 食餅仔个男人共有五千儕。

耶穌行水面

⁴⁵ 事後，耶穌黏時催厥學生上船，先去對面个伯賽大，等佢喊眾人轉去。

⁴⁶ 離開大家後，佢就上山去祈禱。

⁴⁷ 到暗晡頭个時，船已經撐到湖中，耶穌一儕還留在岸上。

⁴⁸ 佢看到學生撐船盡辛苦，因為船逆風行。天曚光个時，耶穌在湖面行等去學生該位，想愛對佢等旁邊過去 。

⁴⁹ 學生看到佢在湖面行，恅到係鬼，就喊起來；

⁵⁰ 因為佢等大家看到佢，也驚到會死。 耶穌即時對佢等講：「安心，係𠊎，毋使驚！」

⁵¹ 佢上去同佢等共下坐船，風就停下來。學生嚇到戇戇，

⁵² 因為佢等無了解分餅這件事个意思；佢等个頭腦盡鈍。

醫好革尼撒勒个病人

⁵³ 佢等過了湖，在革尼撒勒靠岸，將船䌈好。

⁵⁴ 佢等一下船，眾人就認出耶穌。

⁵⁵ 眾人行遍該所在，聽到耶穌在㖠位，佢等就將病人用草蓆扛到佢面前來。

⁵⁶ 無論耶穌去到鄉下、城肚、抑係村莊，眾人就將病人放在街路，求耶穌准病人單淨摸佢个衫尾；所有摸到个人全部得到醫好。