馬可 2 - 客語聖經 – 現代臺灣客語譯本，新舊約全書客語聖經 – 漢字版

耶穌醫好癱風病人

¹ 過無幾日，耶穌又轉到迦百農城；大家聽講佢在屋下个消息。

² 盡多人就聚集來，連門前也無空位。耶穌對佢等講道个時節，

³ 有四個人扛一個癱風病人來見耶穌。

⁴ 總係因為人盡多，佢等無法度將佢扛到耶穌面前。所以佢等就在耶穌停留个所在，對屋頂拆一隻孔仔；然後，將病人連佢所睡个草蓆，縋下去。

⁵ 耶穌看到這兜人个信心，就對癱風病人講：「細子啊，你个罪得到赦免了。」

⁶ 有幾個經學教師坐在該位，心中議論講：

⁷ 「這個人講話樣敢恁過份！佢講侮辱上帝个話！除了上帝以外，麼人有赦罪个權柄呢？」

⁸ 耶穌即時知佢等心中想麼介，就對佢等講：「你等樣般恁樣想呢？

⁹ 對這個癱風病人講：『你个罪得到赦免』容易呢？抑係講：『䟘起來，拿你个草蓆行轉去』較容易呢？

¹⁰ 這下𠊎愛對你等證明，人子在地上有赦罪个權柄。」就對癱風病人講：

¹¹ 「𠊎吩咐你䟘起來，拿你个草蓆轉去屋下！」

¹² 該人就䟘起來，拿起草蓆，在大家面前行出去。眾人就非常著驚，頌讚上帝講：「𠊎等從來吂識看到恁樣个事！」

耶穌呼召利未

¹³ 耶穌又倒轉加利利湖邊，一大群人去到佢該位，佢就教訓佢等。

¹⁴ 佢再向前行，看到一個稅務員，就係亞勒腓个孻仔利未，坐在稅關。耶穌對佢講：「來跈𠊎！」利未就䟘起來跈佢。

¹⁵ 後來耶穌在利未个屋下食飯，盡多稅務員㧯無守教規个人也跈等佢來，當中也有盡多同耶穌㧯厥學生共下食飯。

¹⁶ 有兜法利賽人中个經學教師看到耶穌同壞人㧯稅棍共下食飯，就質問厥學生講：「佢樣般同稅棍㧯壞人共下食飯呢？」

¹⁷ 耶穌聽到，就應講：「健康个人毋使醫生，有病个人正愛。𠊎來个目的毋係愛呼召義人，係愛呼召罪人。」

禁食个問題

¹⁸ 有一擺，施洗約翰个學生㧯法利賽人當在該位禁食，有人來問耶穌講：「施洗約翰个學生㧯法利賽人个學生禁食，你个學生無禁食，係為到麼介呢？」

¹⁹ 耶穌應講：「新郎還在婚姻个筵席中，人客敢愛使禁食？新郎同佢等共下个時，佢等就毋使禁食。

²⁰ 總係時間會到，新郎會被人對佢等當中帶走，該時佢等就愛禁食。

²¹ 「無人用新布補舊衫；若係恁樣，新補个布會扯裂舊衫，爛孔就還較大。

²² 也無人將新酒裝在舊皮袋肚；若係恁樣，新酒會脹裂皮袋，酒㧯皮袋全部會打喪掉。新酒愛裝在新皮袋肚正著！」

安息日个問題

²³ 有一個安息日，耶穌經過麥田，厥學生也同佢共下行；佢等一片行一片捋兜麥串。

²⁴ 法利賽人對耶穌講：「你看，你个學生樣般做安息日禁止做个事？」

²⁵ 耶穌應講：「大衛㧯跈佢个人欠缺又肚飢个時做麼介，你等無讀過係麼？

²⁶ 佢入去上帝个聖殿，食獻給上帝个餅。這個事發生在亞比亞他做大祭司个時節。照𠊎等个法律，只有祭司正做得食這個餅仔；總係大衛拿來食，又分給跈佢个人食。」

²⁷ 耶穌結論講：「安息日係為到人設个；人毋係為到安息日來存在个。

²⁸ 所以人子也係安息日个主。」