使徒 8 - 客語聖經 – 現代臺灣客語譯本，新舊約全書客語聖經 – 漢字版

¹ 殺害司提反這件事，掃羅盡贊成。 對該日開始，耶路撒冷个教會受到非常厲害个迫害。使徒以外，所有个信徒分散到猶太㧯撒馬利亞个各所在去。

掃羅迫害教會

² 有兜虔誠个人將司提反埋起來，為佢傷心大噭。

³ 這時，掃羅就進行迫害教會个工作；佢一家一家去搜查，捉男女信徒，拉去坐監。

福音傳到撒馬利亞

⁴ 該兜分散个信徒去到逐所在傳福音。

⁵ 腓利到撒馬利亞个一座城去，向該位个人傳基督个事。

⁶ 眾人全部認真聽腓利所講个話。佢等一片聽，一片看佢所行个神蹟。

⁷ 盡多邪靈大聲喊，對所附身个人底背出來；盡多癱風个、瘸腳个，也全部得到醫好。

⁸ 該城就充滿歡喜。

⁹ 有一個人，名安到西門，佢在該城行邪術，使撒馬利亞个人民盡希奇。佢恅到自家盡會；

¹⁰ 所有个人，無論大大細細，全部聽從佢，講：「這個人有上帝个能力，係『大能者』。」

¹¹ 因為佢行邪術迷惑佢等有盡久个時間，所以佢等聽從佢。

¹² 總係，到佢等相信腓利所傳關係上帝國个福音㧯耶穌基督个名，佢等無論男女就攏總領洗禮。

¹³ 西門自家也相信；佢領洗禮後，常常同腓利共下。佢看到腓利所行个神蹟㧯大奇事，就盡希奇。

¹⁴ 在耶路撒冷个使徒聽到撒馬利亞人接受上帝个道理，就派彼得㧯約翰到佢等該位去。

¹⁵ 兩個人一到，就為信徒祈禱，愛俾佢等領受聖靈，

¹⁶ 因為該時聖靈還吂臨到佢等當中任何一個人；佢等只有奉主耶穌个名接受洗禮定定。

¹⁷ 所以彼得㧯約翰為佢等按手，佢等就領受聖靈。

¹⁸ 西門看到使徒一按手，人就領受到聖靈，佢就拿錢給使徒，

¹⁹ 講：「請將這能力也給𠊎，使𠊎為麼人按手，麼人就會領受聖靈。」

²⁰ 總係彼得對佢講：「你同你个錢共下毀滅了！你樣會妄想上帝个恩賜做得用錢來買啊！

²¹ 𠊎等个工作你無份；因為在上帝个面前，你个心無正。

²² 所以你愛悔改，離開這個罪惡，並懇求主；或者你心中个意念會得到赦免。

²³ 𠊎看得出，你充滿嫉妒个艱苦，被罪惡捆綁。」

²⁴ 西門對彼得㧯約翰講：「求你等為𠊎向主祈禱，使你等所講个事，毋會發生在𠊎个身上。」

²⁵ 彼得㧯約翰在該位做見證，傳主个道理，然後倒轉去耶路撒冷。路上，佢等也在撒馬利亞个多多村莊傳福音。

腓利㧯衣索匹亞个太監

²⁶ 有主个一個天使㧯腓利講：「䟘起來，向南片行，到該條對耶路撒冷透到迦薩个路上去。」 (這條路已經無人行 。)

²⁷ 腓利就出發去。在該條路上，佢堵到一個太監，係衣索匹亞个大官，在衣索匹亞女王甘太基个手下管錢；佢已經上耶路撒冷去敬拜上帝，

²⁸ 該時愛轉去，坐在馬車頂讀先知以賽亞个書。

²⁹ 聖靈㧯腓利講：「你過去，在車仔堘頭行。」

³⁰ 腓利就走過去，聽到太監讀先知以賽亞个書，就問佢：「你所讀个，有明白麼？」

³¹ 佢應講：「無人教𠊎，樣會明白？」佢就請腓利上車，同佢共下坐。

³² 佢所讀該段聖經係： 佢像被人牽去㓾个羊仔， 又像被人剪毛个細羊仔恬恬； 佢也係恁樣，一句話毋講。

³³ 佢被人欺負； 無人代佢主持公義。 無人講得出佢个後代， 因為佢个生命已經被人對世間除掉。

³⁴ 太監問腓利講：「請問，先知這話係指麼人講个？係講佢自家，抑係別人？」

³⁵ 腓利就開口，對這段聖經開始，㧯佢講關係耶穌个福音。

³⁶ 佢等經過一個地方，路堘有水，太監講：「這位有水，𠊎領洗禮敢做毋得？」

³⁸ 太監就吩咐停車；腓利同佢共下落去水中，為佢行洗禮。

³⁹ 佢等對水中上來以後，主个靈將腓利忽然帶走；太監無再看到佢，就歡歡喜喜繼續趕路。

⁴⁰ 後來，有人在亞鎖都堵到腓利；佢行遍該一帶地方，在逐個鄉鎮傳福音，直到凱撒利亞。