使徒 3 - 客語聖經 – 現代臺灣客語譯本，新舊約全書客語聖經 – 漢字版

彼得㧯約翰醫好瘸腳个人

¹ 有一日，下晝三點鐘祈禱个時，彼得㧯約翰上聖殿去。

² 在該安到美門个所在，有一個出世就瘸腳个人，逐日被人扛來放在門口，對入聖殿个人討食。

³ 佢看到彼得㧯約翰愛入聖殿去，就求佢等救濟佢。

⁴ 佢等注神看佢；彼得講：「你看𠊎等！」

⁵ 佢就注意看佢等，希望會得到麼介東西。

⁶ 彼得對佢講：「金銀𠊎全部無，總係𠊎愛將𠊎所有个給你：𠊎奉拿撒勒人耶穌基督个名吩咐你，䟘起來行！」

⁷ 然後彼得牽等佢个右手，扶佢䟘起來。該人个腳㧯腳㬹骨黏時得到氣力，

⁸ 就跳起來，企等，開始行路。佢同佢等共下入去聖殿；佢緊行緊跳，頌讚上帝。

⁹ 眾人全部看到佢一片行，一片頌讚上帝；

¹⁰ 佢等一認出佢就係該坐在聖殿个美門口个乞食仔，就因為所發生个事感覺非常希奇。

彼得在聖殿肚傳福音

¹¹ 在所羅門廊下，該人牽等彼得㧯約翰；在場个人感覺盡奇怪，全部走去看。

¹² 彼得看到，就對佢等講：「以色列同胞啊，做麼介看這件事做奇怪呢？做麼介緊注目看𠊎等呢？你等恅到𠊎等係靠自家个能力抑係虔誠使這個人行路嗎？

¹³ 亞伯拉罕、以撒、雅各个上帝，就係𠊎等祖先个上帝，已經榮耀佢个僕人耶穌；這耶穌，你等將佢交給官府；彼拉多決定愛放佢，總係你等在彼拉多个面前卻棄絕佢。

¹⁴ 佢係聖潔公義个，你等卻棄絕佢，要求彼拉多透放一個㓾人个兇手給你等。

¹⁵ 恁樣，你等將生命个主害死；總係上帝使佢對死復活。𠊎等就係這件事个見證人。

¹⁶ 這瘸腳个人得到勇健，就係因為耶穌个名所發出个能力。這個人，你等識佢。你等所看到發生在佢身上个事，係因為佢信耶穌个名。因為信耶穌，佢正會完全好起來；這係你等親眼看到个。

¹⁷ 「這下，兄弟啊，𠊎知你等㧯你等个官長恁樣對待耶穌，係因為無了解。

¹⁸ 上帝早就通過眾先知預言基督的確會受苦；這預言已經實現。

¹⁹ 所以，你等愛悔改，轉向上帝，佢就會赦免你等个罪。

²⁰ 恁樣，主會賞賜你等靈力換新个日仔；該時，佢愛差遣耶穌降臨，就係佢為你等所選个基督。

²¹ 基督一定愛留在天頂，直到萬物復興个時節；這係上帝在古早通過佢个聖先知个嘴所宣佈个。

²² 摩西講過：『主 — 你等个上帝愛對你等个兄弟中為你等興起一個先知，像佢興起𠊎一樣 。佢對你等所講个話，你等全部愛聽。

²³ 毋聽從這先知个人，就愛對上帝个子民中除掉。』

²⁴ 所有講預言个先知，連撒母耳㧯在佢後背來个，全部有宣佈這兜日仔所愛發生个事情。

²⁵ 你等係先知个繼承人；你等承接上帝㧯你等个祖先所立个契約。上帝對亞伯拉罕講過：『𠊎愛通過你个後代賜福給地上个萬民。』

²⁶ 所以，上帝興起佢个僕人，先差佢到你等這位來，賜福給你等，使你等每一個人回頭，離開邪惡个道路。」