Ma̱te̱yo̱ 17 - Tennet

Utuhu Ye̱su̱ ele cinne

¹ Imma baling e̱de̱cca̱ nege i̱i̱nya̱ torkonom, uwe zin Ye̱su̱ ki nonno Peturu, Je̱mi̱s ki Jon gotoni Je̱mi̱si̱ rok bee ta̱dde̱na̱, kar ka̱vvu̱to̱ nege do̱.

² Utuhuwe zin ngu̱m cinne ngati acine nege do̱o̱k. Atalany ngu̱m cinne kiwagon koor, izeto ru̱u̱ma̱ni̱ ciginnek voore ne per kiwagon borowoci ci abadi.

³ Ataman niko, i̱ye̱ltta̱i̱ Musesi ki E̱li̱ja̱ kar kozozit ki Ye̱su̱.

⁴ Iizek zin Peturu Ye̱su̱ ne, “Manyi, abunna ming kaavtte ngatu. Ming orongi i̱nna̱, kadiman atidic ti̱te̱t ngatu, kadimani atin anna ti̱te̱t i̱i̱yo̱, co̱de̱ cunne, co̱de̱ ci Musesi, kar bo̱do̱k co̱de̱ ci E̱li̱ja̱.”

⁵ Imma baling ngen enne ozozi, i̱ki̱ya̱k zin nogo di̱i̱z ci voori, kar zin mului kize di̱i̱za̱ ne, “Een necu Ngeranni wa kirezi; katalne anna oroot ngatinne. Iziyyet zoz cinne.”

⁶ Baling iziyyet nuyaha zoz ci a̱kku̱ di̱i̱za̱ ko̱, o̱to̱ngo̱o̱ltte̱ zin nege oroot kar zin ku̱lu̱lle̱t o̱o̱tti̱.

⁷ I̱ki̱ya̱ zin Ye̱su̱ kar kozozek nogo. Ize ne, “Itingta je̱e̱na̱, ma ngen o̱ngo̱o̱li̱nnu̱.”

⁸ Baling ovvo nege acine, icinnet abarik ize Ye̱su̱ do̱ ci aave ki nogo.

⁹ Ma baling ovvo aluccai biya, i̱ti̱lo̱ zin Ye̱su̱ nogo, a̱nne̱k ne, “Ma a̱du̱wa̱kku̱ e̱e̱t imma zoz necu ming ngen Ngerrti E̱e̱to̱ kitinga daiza.”

¹⁰ I̱jji̱nne̱t zin nuyaha nonno, “Nya zin ming azi de̱me̱zzo̱wa̱ wak lo̱ti̱nno̱k wak Musesi ko̱ ne a̱kku̱ atin la̱du̱n a̱ri̱to̱i̱ti̱ ci een E̱li̱ja̱ arrak oowa ming ngen Ki̱ri̱sto̱ ki̱ki̱ya̱?”

¹¹ O̱bo̱de̱k zin Ye̱su̱ nogo, a̱nne̱k ne, “Een de̱de̱, uwantai atin enne oowa kar abunna ming okko E̱li̱ja̱ adiman kaal do̱o̱k ju̱rru̱m.

¹² Abarik ka̱du̱wa̱kku̱ng, i̱ki̱ya̱ bali E̱li̱ja̱, iróng zin ol ba̱li̱ye̱ a̱gga̱ nonno, ogonik nonno kaal cik orong nege. Okko atin Ngerrti E̱e̱to̱ apirna niko bu̱k azzine cigge̱k.”

¹³ Kar zin nuyaha ka̱gga̱c ming ozoz Ye̱su̱ zoz ci obod ki Jon Ba̱ti̱ti̱mo̱.

Angaru Ye̱su̱ do̱le̱c ci anyak kuulo

¹⁴ Baling i̱vi̱tta̱k nege ol, i̱ki̱ya̱k zin e̱e̱ti̱ imma Ye̱su̱ kar kakatek u̱zu̱ngti̱nne̱. Ize ne,

¹⁵ “Manyi, eela ngeranni, eci enne ippira morize ci een lohunuhunu oroot. A̱ju̱ke̱k gon morizi necu nonno gwo̱o̱ icima moro bu̱k.

¹⁶ Kanyahak ba̱li̱ye̱ anna nonno nuyak cigunnek, iróng nege uule kar kangaruwet nonno.”

¹⁷ O̱bo̱de̱k zin Ye̱su̱ nogo, a̱nne̱k ne, “Niga ol cik aditennung iina ko̱, iróng anyakku tu̱we̱ne̱t! Kabak atin anna ki i̱ge̱t rok atinga kar zin elemtta zoz ci Ta̱mu̱ta̱dde̱no̱? Anyaktang do̱le̱c ngatu.”

¹⁸ Itizik zin Ye̱su̱ kuuloc ci lo̱rye̱nto̱, kar kiyowa ngati do̱le̱co̱, kar zin enne kubunna i̱i̱ neci ele niko.

¹⁹ I̱vi̱tta̱k zin nuyaha Ye̱su̱ lo̱mu̱k kar ki̱jji̱nto̱, “Nya ming iróng naga kottoka kuuloc ko̱?”

^20-21 U̱du̱wa̱k zin Ye̱su̱ nogo, “Iróng niga anyakku tu̱we̱ne̱t ci eleno, ka̱du̱wa̱kku̱ng zin ming wo̱ye̱ anyakku tu̱we̱ne̱t cidicilim ki laziyenti, a̱nne̱k wo̱ye̱ i̱nna̱ bee cu ne, ‘Tinga ngatu, bit ngati,’ Ingazi de̱de̱. I̱llo̱i̱ gi̱i̱ imma ci ommogjung.”

A̱du̱wa̱ Ye̱su̱ bo̱do̱k zoz ci daiz cinne

²² Imma i̱i̱te̱n imma baling o̱bo̱dda̱k nege lo̱o̱c ci Ga̱li̱li̱, iizek zin Ye̱su̱ nuyak ciginnek ne, “Ovvo atin ol adawa Ngerrti E̱e̱to̱ kar ka̱gga̱mte̱k ol u̱gge̱.

²³ A̱ru̱k atin ol nonno ka̱da̱k, imma i̱i̱nya̱we̱ cik een i̱i̱yo̱ ingazi atin enne daiza.” Kar zin nuyaha komozte.

A̱ru̱k Ye̱su̱ o̱ro̱bi̱ya̱ Ce̱e̱ze̱ wa Ta̱mu̱ta̱dde̱no̱

²⁴ Baling a̱ra̱yya̱ nuyaha Kapernauma, i̱ki̱ya̱k e̱e̱ti̱ wa aluta ol o̱ro̱bi̱ya̱ cik Ce̱e̱z wa Ta̱mu̱ta̱dde̱no̱ ko̱ Peturu, kar zin ki̱jji̱n nonno, a̱nne̱k ne, “A̱ru̱k gon de̱me̱zo̱i̱ti̱ cinno̱ng o̱ro̱bi̱ya̱ Ce̱e̱ze̱ wa Ta̱mu̱ta̱dde̱no̱?”

²⁵ O̱bo̱de̱k zin Peturu nonno, azi ne, “I̱i̱ny, a̱ru̱k gon enne.” Baling i̱ki̱ya̱k Peturu ce̱e̱z, ozoz zin arrak Ye̱su̱ oowa. Azi ne, “I̱no̱ni̱ nya Si̱mo̱ne̱ zo̱ze̱ necu? Aluta alaata cik lo̱o̱tu̱ mucuru cigge̱k nga, aluta doolinne cigge̱k icima ngati ol u̱gge̱?”

²⁶ O̱bo̱de̱k zin Peturu Ye̱su̱, “A̱gga̱ma̱ nege o̱ro̱bi̱ya̱ ngati ol u̱gge̱.” Izek zin Ye̱su̱ nonno ne, “Abunna zin, iróng ol a̱gga̱ma̱ o̱ro̱bi̱ya̱ ngati ol cik ce̱e̱z cinne!

²⁷ Abarik, iróng zin naga korongnya kodomta nogo, luce zin i̱nna̱ bit nyatapara kar ju̱ke̱k agolo maam. Ming a̱gga̱mu̱ u̱lu̱gi̱t, oo utug ci u̱lu̱gi̱t neci a̱gga̱mi̱ i̱nna̱ oowa ko̱, aruba atidic i̱nna̱ o̱ro̱bi̱ya̱c wa a̱ddi̱ki̱re̱ een zi̱i̱t. Dima o̱ro̱bi̱ya̱c kar zin ru̱we̱k Ce̱e̱z wa Ta̱mu̱ta̱dde̱no̱ mucuru cigannik ki cigunnek.”