Isabulin 5 - AKITUTUKET NAKITETET (NEPEPEKA ISABULIN KA AWARAGASIA)

Akilipi naka akidario

Nama kalo epolokiit ekiruke: Ka aulerun. Ekiruke ka Daudi.

¹ Kopup akiro kang', Okwai Lokapolon, bobo kiira akimonyo kang'.

² Kiira akimony kang', ejakait kang' bobo Akuju kang', naarai ijo nesi elipit eong'.

³ Okwai Lokapolon, taparacu ipupuni ijo eporoto kang'; taparacu asubanakini eong' isubanit kanu kon kasodi eong' akiderit abong'okinet kon.

⁴ Mam ijo kirait Akuju lo italakarito asoma nukarokok; mam aronus kejaikin nama kon.

⁵ Mam luka epogi kebeikinete agwa kakonyen kon; ireit ijo luka arokusio kere.

⁶ Imudiari ijo iliokoisik kere; ereit Lokapolon itung'a lu eminasi aokot ka luce nepepe ka iliokoisik.

⁷ Konye kanuka amina kon na emam esial alomi eong', otogo kon; abuni eong' akimaa edirarit Otogo kon lokalaunan akuriana ijo.

⁸ Koyaite eong', Okwai Lokapolon kotoma adolite kon kanuka ipading'atin kang'; korua eroto kon kama kang'.

⁹ Naarai emam abeite kotoma akituke kes; itauon kes ileleba amudiaro, iporotoi kes eraito ates na eng'ara, ing'alaete ka ang'ajepa kes.

¹⁰ Koinak kesi kocamutu aronus kes, Okwai Akuju; kinyeki kesi kibirokinosi arokusio nu itemetemete kesi. Kireng'ia kesi koking'aren kon kanuka arokusio kes nu ipu, naarai ang'eroto kesi akipup ijo.

¹¹ Konye ng'ulu kere lu eng'opete kama kon, ebunete ajaus ka akilele; kinyek kesi ikaru kere kirukoto ka akilele; bobo mam akigang' kesi, tetere ng'ulu lu eminasi ekiror kon kiturete ijo.

¹² Isirereng' ijo ng'ulu lu edolito, Okwai Lokapolon; imukuori ijo nesi ka amina kon kwape ka ebuku.