Isabulin 2 - AKITUTUKET NAKITETET (NEPEPEKA ISABULIN KA AWARAGASIA)

Ejakait lo Eseut Akuju

¹ Kanuka inyo itemetemata akwapin ejie? Inyo itemetemiata itung'a nukarokok nu emam adumunet?

² Ijakaa luka akwap itemonokinosi; lukepugak irara nenipe aking'ere Lokapolon nepepe kalo inyonyoikit nesi.

³ Ebalasi kesi, “Kalomasi kotoma apugan kes,” “Kacakasi aunoi kes.”

⁴ Ng'olo lo iboe kotoma kuju ekwena; ekwenar Lokapolon kesi.

⁵ Kosodi nesi ejori ka kesi kotoma anyunyura keng', bobo itukuriani kesi ka adedeng'u keng'.

⁶ Ebala nesi, “Epiak eong' ejakait kang' Sayon, emoru kang' lokalaunan.”

⁷ “Alimori eong' nu atema Lokapolon: Abu nesi kolimok eong', ‘Irait ijo okoku kang'; lolo araun eong' papa kon.

⁸ Kilip eong', kasodi eong' ainakini ijo akwapin kere; kosodete esial ka akwapin araun nu kon.

⁹ Ibuni ijo akibil kesi kebela kaloka acumat; kosodi ijo aterar kesi bala amot naka adwat.’”

¹⁰ Kipokona kanuka ng'unu, okwai, ijakaa, kocoaka; kikwenyarite osi, okwai lukepugak ka akwap.

¹¹ Kijaanakisi Lokapolon ka akurianu;

¹² konuikisi akejene keng', kemam, enyouni anyunyura keng', kosodete osi atwakare atipet; naarai ebenene anyunyura keng' anokun. Erereng' ng'ulu kere lu elosete nama keng' akidario.