Isabulin 17 - AKITUTUKET NAKITETET (NEPEPEKA ISABULIN KA AWARAGASIA)

Akilip naka Itwan kani emam akiro

Akilip ka Daudi.

¹ Okwai Lokapolon, kiira alipasia kang' nuka akote adolite; kiira alipasia kang' nuka akote aking'arasit! Kiira alipasia kang' nuka amunokina.

² Ibuni ijo atubokin igang'it ijo eong', naarai ijeni ijo nu edolito.

³ Ijeni ijo etau kang'. Ibu ijo nama kang' kware; imoo ijo eong' cut, bobo mam ijo adumun nukarokok kama kang'.

⁴ Mam eong' kenere nukarokok kwape isomata ice; ayong' eong' acorasia kon, bobo mam eong' ketorit irotin luka ejie.

⁵ Etorit eong' ng'ini pak oroto kon bobo mam eong' apelem kapait koroto kang'olo.

⁶ Elipit eong' ijo, Okwai Akuju, naarai ipupenene ijo eong'; kanuka ng'un, kobong'u nama kang' bobo kopup akiro kang'.

⁷ Kitodia amina kon na emam esial naka aumokin bobo koyuune eong'; ajii eong' osiep kon akuit eong' kamaka ipading'atin kang'.

⁸ Kidar eong' kwape idaria ijo ecopoto ka akong'u kon kelope; kigwa eong' kotoma abenokoka kon

⁹ kigwaa eong' kasurwonokineta ka itung'a kalukarokok. Kegalikiito eong' ipading'atin lukaarak;

¹⁰ emam kesi akisoni, bobo inerasi kesi ejaasi ka epogi.

¹¹ Imanakiito kesi eong' kipokona, ng'ini alaro na ebong'i eong', ekotosi adumun apak naka akibirokin eong' kwap.

¹² Eraito kesi bala ing'atunyo, lu idarito eong' ekotosi anyilinyili eong'.

¹³ Lokapolon, kobuni! Kiriamakinosi ka ipading'atin kang' bobo kilanya kesi! Koyuune eong' kamaka lukarokok kekileng' kon kalo euja;

¹⁴ koyuune eong' kamaka ng'ulu kalu ejaatatar kang'in ibore ni ekotosi kesi kakijar kana. Kitisila kesi ka icani kalu king'adakiit ijo kesi; elipit eong' kojaasi icani lu ilesikina odwe kes bobo kideunosi ice kanuka itatai kes!

¹⁵ Konye anyun eong' ijo, naarai mam eong' kesomata aronus; bobo na anyouna eong', ilelebi ajaus kon eong' ailele.