Isabulin 13 - AKITUTUKET NAKITETET (NEPEPEKA ISABULIN KA AWARAGASIA)

Akilip naka akote Aking'arasit

Namakalo epolokiit ekiruke. Ekiruke ka Daudi

¹ Lokapolon, apak na etia ai imuruokina ijo eong'? Ikaru kere? Apak na etia ai ing'opikina ijo eong'?

² Apak na etia ai ekanya eong' icani? Apak na etia ai ileleba icani otau kang' akwaare ka apaaran? Apak na etia ai ketelekarito eong' ipading'atin kang'?

³ Okwai Lokapolon Akuju kang', kong'olek eong' bobo kinyakakine eong'. Kinyaku agogong'u kang'; mam akinyekin eong' atwani.

⁴ Mam akinyekin ipading'atin kang' etemarete, “Elanyata siong' nesi.” Mam akinyekin kesi elakarosi kanuka akibiror kang'.

⁵ Amunokiit eong' amina na emam esial; alakara eong' naarai iyuuni ijo eong'.

⁶ Okwai Lokapolon, erukokini eong' ijo, naarai ijokuna ijo kama kang' noi.