2 Timoti 1 - AKITUTUKET NAKITETET (NEPEPEKA ISABULIN KA AWARAGASIA)

¹ Eong' Paulo ekiyakia ka Yesu Kristo atupa ka apedor ka Akuju, lo ijukuute akisiarasiara kuju ka akijar kanaka asumunet kana ejaasi ka oni kakimorikikina ka Yesu Kristo.

² Egirakiit eong' ijo Timoti, esapat kang' lominat. Elipit eong' Akuju Papa kiton Yesu Kristo Lokapolon wok koinak ijo asianut, akitim kiton aipuc.

Akiyalama kiton atitinyu

³ Eyalamikiit eong' Akuju lo ejaanakini eong' ka awomowomosia kanu idereete, kwape kisomaata luka asonya kang'. Eyalamikiit eong' Akuju, ng'ini pak eituni eong' osi kalipasia kang' akwaare ka apaaran.

⁴ Eituuti eong' akiyo kon, kanuka ng'un akote eong' noi anyun ijo tetere alakari eong' noi.

⁵ Eituuti eong' amunokina naka abeite na ijaatatar ka ijo, amunokina na ajaasi ka tata kon Lois kiton toto kon Yunis. Amunokiit eong' ijaasi ijo de ka amunokina kang'ini.

⁶ Kanuka nu, kesitokini eong' ijo ebe kisinepu idutat ni abu Akuju koinaki ijo apak na edokokina eong' ijo akanin kang'.

⁷ Naarai Emoyo lo kiinakini Akuju oni, mam kerait lo einakiit oni akurianu. Konye erait nesi Emoyo lo einakini oni agogong', amina ka ayaite ilepe.

⁸ Kanuka ng'un mam asilikiite akitodianar kuju ka Lokapolon wok; kere de siri kianyu asilut kanu kang', lo eyenite kanuka Kristo. Konye, konyama ican kanuka akisiarasiara Akiro Nukajokak ka apedor kana einakini Akuju ijo asoma ng'un.

⁹ Ayuuni nesi oni konyarauni oni araus itung'a keng', mere be kanu esomata oni konye kanu kitemitemitere nesi asoma nu sek. Kebuu nesi sek koinaki oni asianut na itorit namaka Kristo,

¹⁰ konye kona, abunere ka eyuunan wok Yesu Kristo nes etodia asianut ng'ini kama wok. Adau nesi apedor naka atwanare bobo ayau nesi akijar na emam esial akitoro Akiro Nukalaunak.

¹¹ Aseu Akuju eong' kwape ka ekiyakia kiton lokesisianakinan akisiarasiara Akiro Nukajokak.

¹² Kanuka ng'un, na nes atenikina ecanare eong' kona. Konye aring'a eong' ajaasi ka amunokina naarai ajeni eong' nesi lo amunoki eong'. Bobo amunokiit eong' ebe ejaasi nesi ka apedor naka akidar kotenan ibore ni ainaki nesi eong' akitodol apaaran ng'ini.

¹³ Koricite baaba akiro nuka abeite nu esisianakini eong' ijo, kwape ka aputo kana itemokina osi atupite. Bobo kideun kamunokiite Kristo kiton amina wok kakimorikikina kiton Yesu Kristo.

¹⁴ Koricakiitete abeite na ainaki Emoyo Lokalaunan lo iboe kotoma wok ijo.

¹⁵ Ijeni ijo ebe ng'in itung'anan ko oprofinsi kaloko Asia enyeki eong' atikere Figelus de kiton Amogenes.

¹⁶ Elipit eong' Lokapolon kisoni etogo ka Onesifor naarai abu nesi kitalakaa eong' irwana ipu. Amam nesi asilikin kanuka ajaus kang' aenis,

¹⁷ konye nape adoluna nesi Roma, kogeuni nesi akote eong' akitodol na adumuna nesi eong'.

¹⁸ Elipit eong' kitim Lokapolon nesi ka apaaran kang'in kanaka atubonokino! Ijeni ijo kojokan nu ipu nu abu nesi kisomaki eong' ko Efeso.