Éburu ńba 1 - Ɩsɔ́ɔ-dɛ́ɛ Tɔ́m Tákaraɖá

Lɛlɛɛɖɔ́ Ɩsɔ́ɔ waaŋmatɩná ɖáa na Ibiyaalʊ́

¹ Ɖoo nɛ́, Ɩsɔ́ɔ waalaaná anɖébiwá banáa yáásɩ́wá ndɩ‑ndɩ-daá ɩŋmatɩná ɖájaájaanáa.

² Amá, lɛlɛɛɖɔ́, wɛ́ kɛdɛɛzɩya ńná ana adaá nɛ́, waaŋmatɩná ɖáa na Ibiyaalʊ́. Biyaalʊ́ʊ ɩmʊ́ gɛ Ɩsɔ́ɔ waabaná ɩlá ɖúúlínya, ɩnáábɩ́lɛ́ weejéle bɩrɩ́ŋa sɩsɩ bɩ́bɩsɩ ɩdɛ́ɛ ńbɩ.

³ Biyaalʊ́ʊ ɩmʊ́ ɩrɔ gɛ bánnáa Ɩsɔ́ɔ-dɛ́ɛ ásícé, wenbí ɩjɔɔ́ɔ nɛ́, bɩlɛ́ nɔ́ɔ́ ɖʊɖɔ gɛ Ɩsɔ́ɔ cɔɔ́ɔ. Ɩnɔɔ́-daá tɔ́m wɛná yíko gɛ, bɩka tɩnáábɩ́lɛ́ ɩɖɔ́kɩná na ɖúúlínya. Waayáálɩ ɩráa bɛdɛ́ɛ alaháácɩ́wá, ɩlá wɛ ɖacɩrɩ‑cɩrɩ bɩtɛ́ nɛ́, waagba ɩsɔ́ɔ́dáá ɩcɔ́ɔ yíko-dʊ́ʊ-dɛ́ɛ kíɖiiwú-rɔ.

⁴ Biiyéle wɛɛjɛzɩ́ malááyɩ́kawá, ngɛ Ɩsɔ́ɔ waava yɩ yɩ́ɖɛ ɖɩɩgɩ́lɩ bɛdɛ́ɛ ńɖɛ nɛ́.

⁵ Káma, malááyɩ́kawá-daá, weení gɛ kɛtɛngɛrɛ Ɩsɔ́ɔ wɔɔdɔ́ sɩsɩ: «Nyɔ́ɔ́ gɛ Mebiyaalʊ́, kpɔɔná sinje, mɔ́ɔ́ gɛ Njaa.» Malááyɩ́kawá-daá weení gɛ kɛtɛngɛrɛ wɔɔdɔ́tɔḿ ɖʊɖɔ sɩsɩ: «Mánbɩsɩ́ yɩ Caáwʊ, bɩka ɩmʊ́ ɩbɩ́sɩ ma Biyaalʊ́ʊ.»

⁶ Amá, sáátɩ wenkí sɩ ɩkɔ́gɔ́ná Biyaalʊ́ʊ kaɖaa ńnɩ́ ɖúúlínya-daá nɛ́, wɔɔdɔ́ gɛ sɩsɩ: «Ɩsɔ́ɔ-dɛ́ɛ malááyɩ́kawá rɩ́ŋa íkuu yɩ tɛ́ɛ́dɩ.»

⁷ Amá, Ɩsɔ́ɔ wánŋmatɩ́ malááyɩ́kawá-dɛ́ɛ tɔ́m nɛ́, wɔɔdɔ́ gɛ sɩsɩ: «Wánlanáa ɩdɛ́ɛ malááyɩ́kawá nyazɩ fefelimá, bɩka wánlanáa ɩdɛ́ɛ bɔwʊtá-dɩnáa nyazɩ nimidʊlʊʊ́.»

⁸ Amá, wánŋmatɩ́ Biyaalʊ́ʊ-dɛ́ɛ tɔ́m nɛ́, wɔɔdɔ́ gɛ sɩsɩ: «Ɩsɔ́ɔ, nyógowúrɔ́ɔ fɛ́yɩ́na tɛ́m kɛtɛngɛrɛ. Nyɛ́dɛ́ɛ kowúrátɩ ɖíi-daá, wenbí bɩzɩɩzɛ́ɛ nɛ́ gɛ nyánlám.

⁹ Nyɔ́zɔɔlɛ́ɛ wenbí bɩzɩɩzɛ́ɛ nɛ́, bɩka ńdánjaa kidaavééníti; Ɩsɔ́ɔ, bʊrɔ gɛ nyɛ́dɛ́ɛ Ɩsɔ́ɔ waada ɩlɩzɩ́ nya, ɩtáa nyágʊjʊʊ́ jíńgáárɩ́ núm, ngɛ wɔɔzɔ́ɔ́lɩ nyɔ́dɔ́m bɩkɩ́lɩ nɖɔndɩnáa.»

¹⁰ Wɔɔdɔ́ ɖʊɖɔ sɩsɩ: «Mádʊ́ʊ Ɩsɔ́ɔ, ɖoo bɩgabaazɩya, nyɔ́ɔ́ nyóózúu ná ɖúúlínya; nyáálá ná ɩsɔ́ɔ́dáá.

¹¹ Bɩlɛ́ bɩrɩ́ŋa ɖɔ́ bɩ́ngɔnɩ́ bɩtɛlɛ́ŋ; amá, nyɔ́ɔ́ nyɔ́wɛ gɛ. Ńŋɩnáa tóko wánzɩ́m nɛ́, bɩlɛ́ gɛ bɩrɩ́ŋa sɩ bɩkɔ́nɩ bɩsɩ́.

¹² Ńŋɩnáa bóngoodí baramáásʊ́ nɛ́, bɩlɛ́ gɛ sɩ ngóódi bɩ; bɩrɩ́ŋa bɩ́ngɔnɩ́ bɩkɛ́ɛ ńŋɩnáa bɛ́ngɛɛ́ tóko nɛ́. Amá, nyɔ́ɔ́, wenbí nyɔ́jɔɔ́ɔ nɛ́, bɩlɛ́ gɛ sɩ njɔ́ɔ, bɩka nyéweezuú fɛ́yɩ́ kɩ́ndɛ́m kɛtɛngɛrɛ.»

¹³ Kɛtɛngɛrɛ malááyɩ́kawá-daá, weení gɛ Ɩsɔ́ɔ wɔɔdɔ́ sɩsɩ: «Cɔɔ mégíɖíiwú-rɔ, hálɩ maɖʊ nbáɖaanáa nyɔ́nʊvɔ́-dɛ.»

¹⁴ Malááyɩ́kawá nɛ́, we gɛ bɛgɛ́ɛ. Bɩdɛkɛ́ɛ Ɩsɔ́ɔ-dɛ́ɛ tɩndɩnáa bádánnáa wɛ, bɩka bánlám Ɩsɔ́ɔ bɔwʊtá nɛ́ gɛ bɛgɛ́ɛ? Ɩsɔ́ɔ wéndiríi wɛ gɛ bɛ́nɖɛɛ́ bángazɩnáa wenbá bɩmɔɔ́na boyuú lɛ́ɛ́dɩ nɛ́.