YUDAS 1 - SURAT TUHAN Dahun Kayan 1990

Tabi' dahin atoh dahun na'

¹ Surat anih nei men Yahuda, panyin Yesus Kristus, dahin harin Yakobus, tei ha' ikam lim aleng uh ga' uvui aleng en Allah Taman tam nyalam dahin aleng en Na' puboh men Yesus Kristus.

² Sayu nah asi dahin dena' dahin halam lahuh nei pi'at-pi'at men ikam.

Tebara nyihu nyarang daha' aleng pelingo'

³ U kelo' aleng ek nyalam, akui tangen kenep ngenep ngalung men ikam marung tuk urip tam ngavan tam peji anih. Alem ha' nunan nusi' kui deng em nangen ikam nyihu ikam nengayet peté' ja puboh kinah tam aleng uh en Allah uk ji hangun tua men daha' anak Tuhan.

⁴ Avin té' kelunan aleng na ji'ek aleng muau Allah uh nei nyilem té' hang tam. Daha' anan aleng pekehurang tua bara marung tuk asi Allah tam kuma' ha' masep, daha' na nutih ja daha' deng ngioh kivah kenep daha' tua. Uh menuna' nah surat Tuhan bara ukum adang té' temei men daha' aleng na nutih, avin daha' pamoh Iha' aleng Telun beluan tam, iha' tih Tuhan tam Yesus Kristus.

⁵ Lan pah ikam uh jam lim daho' anih dahin jam na' lelan, bi akui ngenep pehituk ikam la'an marung Tuhan pekurip ji na'an kelunan men daléh Mesir menuna', bi men'uh atih la'an Iha' nasa' daha' aleng em nginah.

⁶ Té' pah daha' meliket lahuh aleng em pelemana' aran daha', aleng melek ngavan daha' aleng tekep. Daha' atih en Na' eng nah alem kaput aleng pa'en dahin alem lidem ateng Iha' mukum daha' tegu dau aleng dau aya' atih.

⁷ Nurei pah lahuh daha' ha' Sodom dahin Gomora dahin lim daléh aleng teliling na' atih, daha' ma'uk batung daha' men hadui nuyang dahin ngioh kivah kenep aleng selap, daha' pah uh ga' katé' té' apui aleng pa'en atih, daha' pah jadi' ji katah aleng nebara itam.

⁸ Lan pah ukum uh té' nunan, sa' iha' daha' aleng kelarau kenep nutih na sala ngemasep batung daha', daha' meté' nuten tingan Allah dahin peji'ek lim ket aleng maren ha' Surga tih.

⁹ Bi Mikhael, meliket aleng dekaya' aya' atih pah em makang naka' Iblis dahin peji'ek iha' tegu iha' pehagen pehilé' dahin Iblis marung tuk patei Musa, bi iha' kuma', “Bei nah Tuhan mano' ika'.”

¹⁰ Bi kelunan anan makang peji'ek ket nun-nun aleng em kitan daha', nurei kah ket aleng uh kitan daha' lahuh. Aleng lan na', daha' awi jam tuk tulan aleng em té' kenep, bi ket nutih nah aleng petasa' daha'.

¹¹ Asi-asi nah kelunan atih! Avin daha' uh ngioh hadui Kain, daha' mesau batung daha' alem sala aleng en Bileam na avin tavit iha' ilau tibah, daha' pah nyakat awi jam tuk Korah aleng nyakat lahuh, daha' pah tei tasa' awi jam tuk Korah aleng uh tasa' lahuh.

¹² Kelunan aleng nunan nusi' peletu daha' jam ha'éh, daha' awi ji asep té' hang kam tegu ikam peharin na pahlung, daha' atih pelemana' batung daha' dep tua. Daha' awi lidem usan aleng em legak lan aleng en bahui u'ing tua. Daha' awi iung bua aleng jalo', awi tuvuh aleng en ta' nubit aleng em sebaya' nei murip la'an.

¹³ Daha' atih awi jam lupak aya' aleng ngaju, hadui daha' aleng ji'ek nei tula awi lurek na' tula. Daha' awi kelawing aleng pasan-pasan, men daha' anan nah Allah uh petneng ji ngavan aleng atek lidem lelan aleng té' pa'en-pa'en.

¹⁴ Henokh, iha' nah ketusu tebin aleng leka' men Adam, iha' aleng uh na daho' pekuna' bara marung tuk kelunan anih, iha' kuma', “Nyineng nah! Tuhan uh ateng dahin libu'-libu' tua meliket Na' aleng ma'ang atih nei dahin Na',

¹⁵ Iha' nei petneng lim kelunan dahin megak ukum té' kelunan aleng muau Allah, dahin aleng na hadui selalang dahin aleng na daho' ji'ek aleng ngavan daha' nuten Iha'.

¹⁶ Daha' atih meté' ngelebeng dahin pesala kelunan ha' béh, daha' na daho' mipan em tuman-tuman, daha' ngioh kivah daha' tua', daha' mahek-mahek batung daha' dep dahin masuk-masuk ladung té' kelunan avin daha' ngenep ala utung.

¹⁷ Bi ikam, u ikam aleng ek nyalam, hituk nah té' daho' aleng uh en daha' sihu Tuhan Yesus Kristus tam bara men ikam,

¹⁸ uh kuma' kah daha' men ikam di, “Té' dau baya seng nei nah kelunan aleng nuten-nuten, aleng kelalau muau Allah tei ngioh kivah kenep daha' dep.

¹⁹ Kelunan aleng nunan nah aleng na kelunan tei peken'an tua, iha' tih kelunan aleng ngioh kivah daha' tua, avin nusi' té' Belua' Ma'ang alem daha'.

Tebara nyihu nageng kinah daha'

²⁰ Bi ikam, u ikam aleng ek nyalam, nengayet nah ikam petangen pepjen pedeng kam té' alem kinah kam aleng ma'ang atih, dahin sebayang alem Belua' Ma'ang.

²¹ Puboh nah batung kam té' alem halam Allah, dahin penga dau Tuhan Yesus Kristus tam aleng alem asi Na' seng ma'uk urip aleng pa'en atih.

²² Sayu nah ikam masi daha' aleng kua'-kua' kenep.

²³ Sayu nah ikam pekurip kelunan nyekalet daha' men alem apui, sayu ikam masi daha' ha' béh dahin takut lahuh, dahin gi'uk té' kanan daha' aleng uh masep kenan barik usun tana aleng sala.

Iha' mahek Allah

²⁴ Men Iha' nah aleng ningan puboh ikam ja ikam em legak dahin nekring ikam atek ma'ang dahin melu lelan alem kenep kam ha' unan aren Na',

²⁵ iha' tih men Allah aleng Ji Aleng Pekurip itam té' alem Yesus Kristus Tuhan tam, men Iha' nah té' aren dahin aran aleng kelalau bau, dahin keligem hujung lim-lim, dahin tingan, men em payan té' nun-nun, dahin men kerei inih, dahin ateng-ateng baya. Amin. 1