TITUS 1 - SURAT TUHAN Dahun Kayan 1990

Tabi' dahin sebayang

¹ Surat anih nei men Paulus, aleng panyin Allah dahin Sihu Yesus Kristus. Akui hu'en Na' mi'at kinah daha' aleng en Allah mili, dahin geri daha' nei jam marung aleng teneng aleng ngioh barik Tuhan.

² Té' pah itam nginah seng ala urip aleng pa'en, aleng uh en Allah jaji men em payam kelesing ket nun-nun, Allah pah em peletu deng pamoh.

³ Tegu jaka' Na', Iha' petula dahun Na' atih alem katuk aleng uh ek ala hu'en Allah Aleng Pekurip itam.

⁴ Surat anih tei ha' Titus aleng jadi' anak la'ung kui lan alem kinah tam lim. Sayu nah asi dahin dena' kenep aleng nei men Allah Taman tam dahin men Kristus Yesus Aleng Pekurip itam nei nyungei té' ika'.

Nyihu na kelunan aya'

⁵ Té' pah tavit na' akui melek ika' ha' busang Kreta, ja ika' petneng nun-nun aleng em payan teneng dahin petneng kelunan aya' aleng mayak sidang alem ha'ut-ha'ut daléh, awi aleng uh ek bara men ika' arei dih.

⁶ Tekep iha' ji la'ung aleng em té' tuten té' iha', dahin ji tua doh na', anak na' pah nginah, em miran dahin em nyelalang.

⁷ Avin kelunan aleng geri sidang pejoh hadui Allah anan, tekep iha' em té' tuten té' iha'. Meng iha' bau kenep, meng iha' melei bunget, meng iha' kelunan aleng mavuk, meng iha' kelunan aleng mukut, meng iha' ilau utung aleng masep.

⁸ Bi sayu iha' kaséh nyamah té' kelunan, kaséh ket aleng sayu, nyemugen, teneng, ma'ang kenep, haman pa'eng kenep na',

⁹ gem sayu-sayu daho' aleng teneng, aleng ngioh katuk tam, ja iha' deng nangen kelunan alem katuk aleng teneng dahin nyeluk daha' aleng nyakat.

Marung kelunan aleng pelingo'

¹⁰ Avin té ngahum kelunan aleng nyelalang aleng na daho' mipan em tuman-tuman, aleng peluvat daha'. Kelalau kah daha' aleng gem adet sunat aleng na nunan.

¹¹ Sayu nah itam madet dahun daha', avin daha' atih kelunan aleng nasa' lim huang uma, dahin katuk ket aleng em tekep, tavit ilau ligit tua.

¹² Ji la'ung men hang daha' atih, iha' tih ji nabi daha' dep, uh kuma', “Kelunan Kréta pa'en pamoh, tulan aleng hatan daha', kelunan aleng meling ba dahin lekoh.”

¹³ Teneng lan daho' anih. Avin atih, sayu im nebara daha' tangen-tangen, ja kinah daha' tei la'ung,

¹⁴ dahin meng daha' kelenghi tukit tung-tung daha' Yahudi dahin tebara kelunan aleng nelikun té' aleng teneng.

¹⁵ Men kelunan aleng ma'ang kenep, ha'ut-ha'ut ket nun-nun té' ma'ang, bi men kelunan aleng masep dahin aleng em nginah, ji nun-nun pah em té' aleng ma'ang, bi kenep daha' dahin henoh alem kenep daha' pah uh masep.

¹⁶ Daha' atih kuma' daha' jam Allah, bi alem hadui daha' daha' atih pamoh Iha', daha' kelalau lalé' ji'ek, daha' muau, daha' pah em kaséh na hadui aleng sayu.