NAHUM 1 - SURAT TUHAN Dahun Kayan 1990

Atoh na'

¹ Nunih nah dahun Tuhan marung Niniwe. Anih nah surat en Nahum kelunan Elkos atih na, petira marung ket aleng nei tula kitan batung na'.

Unget Tuhan té' Niniwe

² Tuhan atih Iha' nah aleng Allah, aleng heléh dahin aleng nyulei, Tuhan aleng nyulei dahin kelalau lalé' bunget. Tuhan aleng nyulei daha' aleng muau Iha', dahin mi'en té' daha' aleng bunu-bunu Na'.

³ Tuhan aleng kelalau aru kenep dahin aleng kelalau ningan, bi nusi' peletu Iha' seng em ma'uk ukum men kelunan aleng na sala. Iha' panau alem nyivung kevut dahin alem bahui muhang, pup kudek Na' tua nah avun-avun ha' kelekawah.

⁴ Iha' singéh na banget dahin pekté' na', ketu-ketu hungei pah en Na' na keté' pah-pah. Basyan dahin Karmel pah munguh tua urun-urun na', dahin pidang-pidang Libanon pah kelubei tua.

⁵ Ngalang-ngalang pah ngetiwet tua ha' unan Na', nurei pah kela'ung-kela'ung tei lenyoh tua lahuh. Usun tana anih tei henung seng-seng té' unan Na', nusi' nah té' ji nun-nun aleng seng murip té' usun tana anih la'an.

⁶ Hi aleng seng deng nekring nyura' unget Na'? Dahin hi aleng deng pet'en nyakat unget Na' aleng awi ngelat dih tua atih? Hengan unget Na' nei muak awi apui dih, ngalang-ngalang bato' pah puva, nei kahem ha' unan Na'.

⁷ Tuhan nah aleng sayu, Iha' nah aleng ngavan nyingen tegu jaka' tusah, Iha' nelana' kelunan-kelunan aleng tei nyingau té' Iha'.

⁸ Bi hi-hi aleng melawan Iha', en Na' na nah lepa aya' lemisa' daha', habung nei lidem pah dau té' daha' aleng bunu-bunu Na' atih lahuh.

⁹ Na' nun kam ngenep melawan Tuhan nunan du? Adang Iha' seng lemvah ikam tua, nusi' tusah Ha' menei katé' dua' hangun!

¹⁰ Tei tutung tua kah daha' na'a awi uleng aleng pekelukung dih, en apui kani, awi nutung jemé' aleng megang.

¹¹ Nusi' ha' em men hang kam iah ji kelunan nei peju, nei pela'ung ket aleng ji'ek té' Tuhan, dahin katuk hadui aleng geri daha' tasa' tua?

¹² Nunih nah dahun Tuhan, “Lan pah daha' ngepu'an melen tua kahum daha' nunan, bi daha' seng levah burah tua matei. Lan pah Akui uh pekaté' ika' men'a, bi nusi' Kui pekaté' ika' la'an.

¹³ Lan, kerei inih Akui seng merung lasen daha' aleng ngebahat ika' atih, dahin seng netek pesung-pesung aleng en daha' habeng té' ika' atih.”

¹⁴ Marung ika' anih, nunih nah dahun Tuhan, “Nusi' nah seng té' aran pahu ka' la'an. Akui seng madé' hudo' aleng en kam na men kayo', dahin aleng en kam nyelung-nyelung atih, men alem uma hudo' kam. Liang ka' seng Ek nemei patem avin ika' kelalau ji'ek.”

¹⁵ Nyineng nah, té' kelunan nei panau men ujung ngalang-ngalang, nei geri dengah, iha' nei pedengah dengah aleng kelalau sayu, dengah aleng kelalau dena'. Na nah lim-lim dau aya' ka', u Yehuda, uk nah ket aleng seng en kam uk men Tuhan, avin nusi' nah té' kelunan aleng kelesé' atih nei ngayau ika' la'an, hu'uh pah levah nah daha' anan.