MATIUS 7 - SURAT TUHAN Dahun Kayan 1990

Marung tuk ngema' dahin kahi

¹ “Meng nah ikam ngema' kelunan, ja meng daha' ngema' ikam.

² Avin kenan kema' aleng en kam na ikam pah seng en daha' ngema' lahuh, dahin té' tebeng aleng ngavan kam nebeng men daha', té' tebeng anan pah ikam seng ala lahuh.

³ Na' nun ika' nyineng pelem aleng té' alem matan harim, beka' berit kayo' aleng alem matam dep nusi' nah ika' putau mebet na'?

⁴ Seng nuno' ika' deng kuma' men harim, ‘Bei nah akui muéh pelem anan men alem matam,’ alem ha' té' berit alem matam dep?

⁵ U ika' aleng dua' jela', usang nah una' berit aleng alem matam dep arin, men'uh anan uréh im nyineng teneng mebet pelem men alem matan harim atih.

⁶ “Meng nah ikam ma'uk ket aleng ma'ang men aso', dahin meng kam mesau bato' mutiara kam ha' unan uting, bahi daha' ngaja-ngaja na' té' kudek daha', dahin nekulah ngisin ika' lahuh.

Marung akei dahin lan-lan kenep

⁷ “Akei nah, ikam pah seng ala; ilau nah, ikam pah seng en Na' uk; negek nah, ketamen atih pah seng nei neng'ap men ikam.

⁸ Avin ha'ut la'ung aleng akei, iha' pah seng ala, dahin iha' aleng ilau, iha' pah seng pesuk, dahin aleng negek ketamen, ketamen pah seng eni neng'ap.

⁹ “Hi men hang kam awi anak na' kahi luti beka' iha' ma'uk bato' men iha'?

¹⁰ Awi iha' kahi masik, en uk nyipa' men iha' iah?

¹¹ Avin ha' nutih, iha' ikam aleng ji'ek anih jam ma'uk ket aleng sayu men anak kam, lalau lan nah Taman kam aleng ha' Surga seng ma'uk ket aleng sayu men daha' aleng kahi té' Iha'.

¹² “Ket nun aleng kaséh kam aleng en daha' na men ikam, tekep pah ikam na nunan lahuh men daha', avin nunan nah dahun surat tebara menuna' dahin dahun daha' nabi.

Marung tei halem keligem Surga

¹³ “Tei nah ikam halem men ketamen aleng da'uk, avin dekaya' lelan nah ketamen dahin layang lelan alan aleng tei halem tasa', dahin kahum lelan nah daha' aleng tei halem na' men inan.

¹⁴ Avin da'uk awang ketamen dahin pujen nah alan aleng tei ha' urip, kanya lelan nah daha' aleng pesuk na'.’

Marung bua urip

¹⁵ “Sayu nah kelo' mengan batung kelo' té' daha' nabi amoh, aleng nei pala ikam awi jam hulung duba, bi aleng lan na' daha' aleng sengangang aleng kelalau hatan.

¹⁶ Men bua daha' nah kelo' seng enlana' daha'. Nuno', té' daha' ala bua agun men kayo' aleng té' uleng, dahin bua a men kayo' sepirang iah?

¹⁷ Nunan pah ha'ut-ha'ut iung bua aleng sayu, iha' pah ngebua bua aleng sayu, bi iung kayo' aleng ji'ek ngebua bua aleng ji'ek.

¹⁸ Iung bua aleng sayu nusi' deng ngebua bua aleng ji'ek, nunan pah iung kayo' aleng ji'ek nusi' deng ngebua bua aleng sayu.

¹⁹ Ha'ut-ha'ut iung kayo' aleng em ngebua aleng sayu atih, en daha' teveng, en daha' sau alem apui.

²⁰ Avin ha' nunan, men bua daha' nah ikam seng nelana' daha'.

Marung daha' aleng nyadui bi em ngioh dahun Na'

²¹ “Daha' aleng ngetalau Akui, ‘Tuhan, Tuhan,’ bareng daha' lim seng tei halem keligem Surga, ketu na' nah kelunan aleng ngioh kenep Tamak aleng ha' Surga.

²² Tegu dau atih pah kahum kelunan aleng seng kuma' men Akui, ‘Tuhan, Tuhan, bi kamé' pah uh pekatuk daha' té' alem aran Ka' di keta', dahin mebet to' té' aran Ka', dahin té' aran ka' pah kamé' uh na kahum hadui aleng ngavan daha' ngeniheng lahuh di?’

²³ Tegu atih pah Akui seng bara daha' teneng, ‘Peletu-letu Akui em payan jam ikam; lap nah men Akui, u ikam aleng nyelalang hadui kam.’

Marung uma hujung bato' dahin hujung tana hit

²⁴ “Avin anan, ha'ut la'ung aleng kelenghi Dahuk anih dahin ngioh na', daha' nah awi ji la'ung aleng nyemugen aleng mejek uma na' hujung bato'.

²⁵ Nei nah usan dahin tana pah lepa, dahin bahui pah meté' uma anan, nusi' pah iha' payah avin ngavan jihé' na' bato'.

²⁶ Ha'ut la'ung aleng kelenghi Dahuk anih dahin em ngioh na', daha' nah awi ji la'ung aleng em nyemugen aleng mejek uma na' hujung hit.

²⁷ Nei nah usan dahin tana pah lepa, dahin bahui pah meté' uma anan, uma anan pah puva, kehuak lan nah uva na'.”

²⁸ Tegu Yesus uh na lim daho' atih, lim daha' ngahum atih pah ngeniheng lelan marung katuk Na' atih,

²⁹ avin Iha' katuk awi kelunan aleng té' tingan dih, dep lelan men'uh daha' aleng gem surat.