MATIUS 6 - SURAT TUHAN Dahun Kayan 1990

Marung masi kelunan, sebayang dahin pelien

¹ “Hituk nah sayu-sayu, meng nah ikam na lim barik sayu kam ha' unan kelunan tua, ngenep petula na' men daha' atih. Awi ha' nutih, nusi' nah ikam ala tibah men Taman kam aleng ha' Surga.

² “Avin atih, hiran ika' ma'uk ket men kelunan, meng im murah dengah atih hino'-hino' awi kelunan aleng dua' jela' atih na alem uma sebayang dahin té' iung alan, ja daha' ala hek té' kelunan. Dahuk lan men ikam, uh nah kelunan atih ala tibah daha'.

³ Bi ika' anih, hiran ika' ma'uk ket men kelunan, meng nah usu ulei ka' jam hadui usu ta'o ka',

⁴ ja meng nah ket im uk atih tula' bi Taman tam aleng jam ket aleng em tula atih, iha' nah aleng seng ngalui na' men ika'.

Marung sebayang

⁵ “Tegu ikam sebayang, meng nah ikam awi kelunan aleng dua' jela', avin daha' atih kaséh sebayang nekring alem uma sebayang dahin nekring té' hangat-hangat alan, ja daha' ha' béh nyineng daha'. Dahuk lan men ikam, uh nah daha' atih ala tibah daha'.

⁶ Bi ika', tegu ika' sebayang, tei nah im halem tilung, malen nah ba na', pelalau sebayang té' Tamam aleng alem ngavan aleng sihuk, Tamam aleng jam ket aleng sihuk atih pah seng nyu'ei ika'.

⁷ “Alem sebayang kam, meng kam ngelua' dahun kam awi daha' aleng alem adet ha' béh, avin kenep daha' pelemana' iha' daha' sebayang aru adang Tuhan kelenghi.

⁸ Meng nah ikam ngioh barik daha' atih, avin em payan kam akei, Tamam kam aleng ha' Surga atih pah uh jam humé' kam.

⁹ “Avin anan, nunih nah tekep ikam sebayang, U Amei aleng ha' Surga, ma'ang lelan nah aran Ka'.

¹⁰ Im nei nah keligem Ka', Im na ket aleng kenep Ka' ha' usun tana awi aleng ha' Surga.

¹¹ Uk nah men kamé' kanen amé' dau anih.

¹² Masi nah kamé' marung lim sala amé', awi kamé' uh masi daha' aleng té' sala dahin amé'.

¹³ Dahin meng mekoh kamé' tei ga' pesek, bi akau nah kamé' men iha' aleng ji'ek. Avin Ika' aleng hipun keligem, dahin tingan, dahin aren, pa'en-pa'en ateng-ateng baya. Amin.

¹⁴ Awi ikam masi daha' marung sala daha', adang Taman kam aleng ha' Surga pah seng masi ikam marung sala kam.

¹⁵ Bi iha' ikam em masi daha' marung sala daha' adang Taman kam aleng ha' Surga pah em masi ikam.

¹⁶ “Tegu ika' pelien meng nah im awi kelunan aleng dua' jela', dahin tungen neng ka', avin daha' atih masan jam neng daha' ja kelunan jam daha' pelien. Dahuk lan men ikam, uh nah daha' atih ala tibah daha'.

¹⁷ Bi ika' anih, tegu ika' pelien, ngenyu nah kahung ka' dahin mayau nah neng ka',

¹⁸ ja meng kelunan jam alem ika' pelien, bi Tamam aleng em tula atih; Tamam aleng jam ket aleng em tula atih, Iha' nah aleng seng ma'uk tibah men ika'.

Marung daven usun tana, lirui batung, ngetaman dua' la'ung

¹⁹ “Meng nah ikam mepeng daven kahum men ikam té' usun tana anih, ngavan agin dahin higen nasa', dahin ngavan kelunan nasa' uma dahin nakau.

²⁰ Bi sayu nah ikam mepeng daven men ikam ha' Surga, iha' tih ngavan agin dahin higen em deng nasa', dahin kelunan nakau em deng nasa' dahin nakau.

²¹ Avin hino'-hino' daven kam té', hinan pah kenep kam té' lahuh.

²² “Té' pah mata' atih iha' nah lirui batung; avin atih, awi matam sayu adang lim batung ka' pah malah lahuh.

²³ Bi awi matam ji'ek, lim batung ka' pah lidem tua. Avin atih, iha' alah aleng alem batung ka' atih hu'uh lidem, lidem uta' nah lidem atih.

²⁴ “Ji la'ung pah em deng ngetaman dua' la'ung. Adang iha' perah kenep té' ji dahin nyalam ji. Iha' em nunan, en na' ivit nah ji dahin muau ji. Nusi' kam deng ngetaman Allah dahin daven usun tana lahuh.

Meng kawah marung urip

²⁵ “Avin ha' nutih, Akui kuma' men ikam, meng nah ikam kawah marung hengan kam, marung nun-nun aleng seng kam kani dahin du'i, dahin marung batung kam pah lahuh, nun aleng seng kanan kam. Nusi' kah hengan kam lalau men'uh ket kam kani iah, dahin batung kam lalau men'uh kanan kam?

²⁶ Nyineng nah urip manuk aleng madang. Bareng daha' nuvuh nun-nun dahin ngelunau dahin mepeng alem lepau, bi Taman kam aleng ha' Surga pah aleng purip daha'. Nuno', nusi' kah ikam lalau men'uh manuk iah?

²⁷ Hi kah men hang kam aleng haman mi'at ji lepet hiko' té' urip na' avin iha' kawah?

²⁸ Ji pah la'an, avin nun ikam kawah marung kanan kam? Sek kelo' pelemana' pidang bunga', nuno' kah urip na'. Nusi' té' daha' nyadui dahin nusi' pah daha' nalé'.

²⁹ Bi Akui kuma' men kelo', lan Salomo alem lim-lim aren na' nusi' pah iha' kajau awi ji pidang bunga' atih.

³⁰ Lan, pah Allah uh nganan lim-lim bunga' nunan, aleng uh té' ngedau anih bi jima en daha' sau alem apui, lalau lan pah kanan kam kenan na' keta', u ikam aleng em nuno' nginah?

³¹ Avin anan, meng nah ikam kawah pelemana', ‘Ket nun en amé' kani?’ dahin pelemana', ‘Ket nun en amé' du'i?’ dahin ‘Ket nun en amé' té'?’

³² Lim-lim anih pah en kelunan aleng em nginah ilau. Avin Taman kam aleng ha' Surga uh jam ikam humé' marung lim-lim ket anih.

³³ Bi ilau nah keligem Na' una' dahin barik Na' aleng teneng, lim-lim ket atih pah seng en Na' mi'at men ikam.

³⁴ Avin anan meng nah ikam kawah marung jima, avin jima atih té' kah tuken aleng tulan jima. Ha'ut dau té' kah tuken na' sukup men ji dau atih.