MATIUS 5 - SURAT TUHAN Dahun Kayan 1990

Katuk Tuhan Yesus hujung ngalang

¹ Tegu Iha' nyineng daha' kahum atih, pelalau tei nah Iha' hujung ji ngalang. Tegu Iha' melo', daha' anak sekulah Na' pah nei ha' Iha',

² pelalau Iha' katuk daha' dahin kuma',

³ “Sayu lan nah men kelunan aleng liva kenep, avin daha' nah aleng hipun keligem Surga.

⁴ “Sayu lan nah men kelunan aleng pasi, avin daha' nah aleng seng jam halau.

⁵ “Sayu lan nah men kelunan aleng pehuwa kenep, avin daha' nah aleng seng hipun usun tana anih.

⁶ “Sayu lan nah men kelunan aleng la'o dahin megang ba ilau ket aleng teneng, avin daha' nah aleng seng besoh.

⁷ “Sayu lan nah men kelunan aleng masi, avin daha' nah aleng seng ala asi.

⁸ “Sayu lan nah men kelunan aleng ma'ang kenep, avin daha' nah aleng seng nyineng Allah.

⁹ “Sayu lan nah men kelunan aleng petmei kelunan, avin daha' nah aleng seng en daha' kuma' anak Allah.

¹⁰ “Sayu lan nah men kelunan aleng ga' katé' tavit aleng teneng, avin daha' nah aleng hipun keligem Surga.

¹¹ “Sayu lan nah men ikam tegu daha' peji'ek ikam, dahin pekaté' ikam, dahin ngeji'ek ikam té' daho' aleng pamoh avin tavit Akui.

¹² Petenglu nah ikam dahin sayu lan kenep, avin dekaya' tibah kam ha' Surga; avin nunan kah daha' nabi aleng una' té' ikam uh ga' katé' kenan daha' lahuh.

Hia' dahin alah

¹³ “Ikam anih nah hia' usun tana. Awi hia' tei beléh, té' nun ngavan na na' mih la'an? Avin nusi' nah té' bang na' la'an, bi en daha' sua hida tua nah, en daha' ngaja tung-tung.

¹⁴ Té' pah ikam anih alah usun tana. Uma aleng hujung ngalang pah, nusi' ha' deng sihuk.

¹⁵ Nusi' daha' nyavet lirui dahin mahuk na' hida gatang, bi en daha' tei nah té' kudek lirui ja ha' malah men lim daha' alem amin.

¹⁶ Nunan pah tekep alah kam malah ha' unan kelunan, ja daha' nyineng hadui kam aleng sayu dahin meju Taman kam aleng ha' Surga.

Dahun Tuhan Yesus marung tebara menuna'

¹⁷ “Meng nah ikam ngio' Akui nei anih ja sneg mebet tebara menuna' dahin surat nabi. Nusi' Kui nei seng mebet anan, té' pah Akui nei ja pela'ung na'.

¹⁸ Dahuk lelan men ikam, em payan langit dahin tana tei pata ji titih dahin ji nun pah em té' aleng padé' men alem surat tebara menuna', ateng lim-lim na' uh la'ung.

¹⁹ Avin anan, hi-hi aleng ngurang ji tebara aleng da'uk lan men tebara anih dahin katuk na' nunan tua men kelunan, kelunan anan nah aleng seng da'uk aleng ngioh tebara anih dahin katuk na', aran na' nah aleng seng dekaya' alem keligem Surga.

²⁰ Té' pah Akui kuma' men ikam, iha' ikam em lalau teneng men'uh daha' aleng gem surat tebara dahin kelunan Farisi, nusi' peletu ikam deng tei halem keligem Surga.

Marung kelunan aleng bunget

²¹ “Ikam uh kelenghi daho' men daha' menuna', iha' atih, ‘Meng kam lematei kelunan; hi-hi aleng lematei kelunan, tekep iha' seng ga' ukum,’

²² bi Akui kuma' men ikam, ha'ut-ha'ut kelunan aleng bunget harin na', iha' em té' tavit na', tekep iha' seng ga' ukum. Hi aleng kuma' men harin na', ‘Ma'u ka',’ ken na', tekep nah iha' lavat lahuh, bahi iha' ga' daho' daha' kemiti. Hi-hi aleng kuma', ‘Hapat urip ka',’ ken na', tekep nah iha' seng tei alem apui neraka.

²³ “Avin ha' nutih, tana' ika' tei ma'uk ket im uk men Tuhan ha' avo' avan pahun laluh, beka' hituk nah ika' té' harim aleng heléh té' ika',

²⁴ im lek nah ket anan ha' avo' avan laluh anan arin, nepulet nah im dahin na sayu una' dahin harim, uh anan tei nah ngelua' ma'uk ket anan aleng in uk men Tuhan.

²⁵ “Salet nah im na sayu dahin kelunan aleng heléh dahim, alem ika' peji dahin na' té' alan, bahi iha' ma'uk ika' men hakim, dahin hakim la'an ma'uk ika' men pulis, pelalau ika' en na' sau alem jin.

²⁶ Dahuk lan men ika', peletu-letu ika' em deng musang men inan iha' ika' em payan bayen utang ka' pah-pah.

Marung petuyang

²⁷ “Ikam uh kelenghi daho' anih, ‘Meng nah im nuyang.’

²⁸ Bi Akui kuma' men ikam, ha'ut la'ung aleng nyineng dahin ngivah ji doh, hu'uh nah iha' nuyang dahin na' alem kenep na'.

²⁹ “Iha' mata' ta'o ka' geri ika' na sala, en ngikei nah iha', en sau, avin pulang sayu im madé' ji matam men'uh lim batung ka' seng en sau alem neraka.

³⁰ Iha' usu ta'o ka' pah geri ika' na sala, en munang nah, en sau, avin pulang sayu madé' ji usu ka' men'uh lim batung ka' seng en sau alem neraka.

Marung puli

³¹ “Uh té' daho' lahuh, ‘Hi aleng puli men doh na', tekep nah ma'uk surat puli men iha'.’

³² Bi Akui kuma' men ikam, hi-hi aleng puli dahin doh na' avin tavit dep men'uh petuyang iha' na doh atih petuyang atih, dahin hi aleng ngehawa' doh aleng uh puli, iha' pah petuyang lahuh.

Marung tevah

³³ “Té' pah la'an ikam uh kelenghi daho' men daha' menuna', ‘Meng nah im na tevah aleng pamoh, tekep ka' ngioh dahun tevah ka' anan ha' unan Tuhan.’

³⁴ Bi Akui kuma' men ikam, meng peletu ikam tevah marung Surga avin iha' atih ladung aren Allah,

³⁵ marung usun tana pah meng, avin iha' atih hamak kudek Na', nunan pah tana Yerusalem, avin iha' tih daléh Laja' aleng kelalau dekaya'.

³⁶ Meng tevah té' kahung ka' lahuh, avin ji irah buk ka' pah nusi' ka' haman na na' puti dahin pitem.

³⁷ Bi tut nah dahum, ‘I' té' ket aleng i dahin ‘Nusi',’ té' ket aleng nusi'; lalau men'uh atih pa'un na' men iha' aleng ji'ek atih.

Marung nyulei hadui aleng ji'ek

³⁸ “Ikam hu'uh kelenghi daho' anih, ‘Mata' ngalui mata', dahin ipa' ngalui ipa',’

³⁹ bi Akui kuma' men ikam, meng nyakat kelunan aleng na ji'ek dahim. Awi ji kelunan nebip pingah ta'o ka', uk nah men iha' pingah bah ji la'an.

⁴⁰ Té' pah awi ji la'ung ngenep geri ika' besara', seng ala basung ka', bei nah iha' api basung aru ka' lahuh.

⁴¹ Ji pah la'an, awi ji la'ung ngepden ika' panau ji bato' su na', tei nah dahin na' dua' bato'.

⁴² Uk nah men kelunan aleng kahi té' ika', meng mukin kenep kelunan aleng ngenep mujam ket anum.

Marung nyalam daha' bunu

⁴³ “Ikam uh kelenghi daho' anih lahuh, ‘Tekep nah ika' nyalam kelunan aleng ha' béh dahin perah kenep té' bunu ka',’

⁴⁴ bi aleng Dahuk men ikam, tekep nah ikam nyalam bunu kam, dahin sebayang men daha' aleng pekaté' ikam,

⁴⁵ ja ikam deng anak Taman kam aleng ha' Surga, avin Iha' na matan dau men daha' aleng ji'ek dahin aleng sayu lahuh, dahin menei usan men daha' aleng teneng dahin daha' aleng em teneng.

⁴⁶ Iha' ikam nyalam kelunan aleng nyalam ikam tua, nun aleng tibah kam? Seng nusi' kelunan aleng mepeng sukei atih haman pah na nunan lahuh iah?

⁴⁷ Iha' ikam japa' harin kam tua, nun aleng kam na lalau men'uh daha' ha' béh? Nusi' daha' alem adet ha' béh na nunan lahuh iah?

⁴⁸ Avin anan, tekep nah ikam kelalau lalé' teneng, awi Taman kam aleng ha' Surga aleng kelalau lalé' teneng.