MATIUS 4 - SURAT TUHAN Dahun Kayan 1990

Tuhan Yesus en Iblis pesek

¹ Men'uh atih pelalau Yesus en Belua' geri ha' tana ngahit ja Iblis pesek Iha'.

² Yesus pelien pat-pulu dau pat-pulu malem dara na', men'uh anan la'o nah Iha'.

³ Nei nah iha' aleng pesek atih dahin kuma' men Iha', “Tana' Ika' Anak Allah lan, nyihu nah bato' anih balui luti.”

⁴ Bi Yesus nyu'ei dahin kuma', “Té' kah uh kalung, ‘Nusi' ha' kenan luti tua kelunan seng murip, té' pah kenan ha'ut li'ap daho' aleng musang men ba Allah.’ ”

⁵ Men'uh atih en Iblis geri nah Iha' ha' daléh aleng ma'ang, pelalau melo' Iha' ujung mubung Uma Allah,

⁶ dahin kuma' men Iha', “Tana' Ika' Anak Allah lan, nesau nah Im hida, avin té' kah uh kalung, ‘Iha' seng nyihu meliket Na' puboh Ika'.’ ‘Daha' seng nyidah usu daha' dahin meju ika', bahi kudek ka' netung té' bato'.’ ”

⁷ Nyu'ei nah Yesus iha', “Té' kah uh kalung lahuh, ‘Meng nah im pesek Tuhan aleng Allah ka'.’ ”

⁸ Ji hangun pah ngelua' Iblis geri Yesus hujung ji ngalang aleng kelalau bau, pelalau petula men Iha' lim keligem usun tana anih dahin lim-lim aren na',

⁹ dahin kuma' men Iha', “Lim-lim anih ek uk men Ika' iha' Ika' nyepukun sebayang té' akui.”

¹⁰ Pelalau Yesus kuma' men iha', “Lap nah im men inih, u Setan, avin té' kah uh kalung, ‘Sayu nah im nyepukun sebayang ha' unan Tuhan Allah ka', dahin nyepida té' Iha' telesen.’ ”

¹¹ Men'uh atih Iblis lap nah Iha', pelalau nei nah meliket masi Iha'.

Tuhan Yesus melo' ha' Kapernaum

¹² Tegu Yesus kelenghi marung Yohanes hu'uh en daha' apuh, uli nah Iha' tei ha' daléh Galilea.

¹³ Leka' nah Iha' men daléh Nazaret, pelalau tei nah Iha' melo' ha' Kapernaum aleng ha' benghé' bawang, aleng alem daléh Zebulun dahin Naftali,

¹⁴ ja ha' la'ung dahun Tuhan men ba nabi Yesaya, aleng dahun na',

¹⁵ “Tana Zebulun dahin tana Naftali alan aleng nevei banget atih, daléh aleng béh hungei Yordan atih, Galilea daléh daha' alem adet ha' béh,

¹⁶ daha' aleng melo' alem lidem hu'uh nyineng alah aleng kelalau malah, dahin men daha' aleng melo' halem daléh lingei patei uh nyemau nah alah.”

¹⁷ Tegu atih aring-aring Yesus matoh katuk Na', dahin kuma', “Ngelisah nah kenep kam, avin keligem Surga hu'uh jeleng.”

Aring-aring Yesus mili anak sekulah

¹⁸ Alem Yesus panau-panau benghé' bawang Galilea en Na' nyineng nah dawa' peharin, iha' atih Simon aleng en daha' kuma' Petrus lahuh dahin harin na' Andrias alem dawa' biving jala' té' bawang, avin dawa' anan kelunan aleng ngejala'.

¹⁹ Ken Yesus men dawa' atih, “Nei nah ngioh Akui, Akui seng na kua' ngejala' kelunan.”

²⁰ Pelalau dawa' atih melek jala' dawa', pelalau ngioh Iha'.

²¹ Alem Iha' panau men inan, en Na' nyineng nah ngelua' dawa' peharin, iha' atih Yakobus dawa' Yohanes harin na' aleng anak Zebedeus alem dalo' manyut jala' dalo' alem haruk. En Na' uvui nah dawa' atih,

²² pelalau dawa' melek haruk atih dahin taman dawa', pelalau ngioh Iha'.

Dengah Yesus putat avin hadui Na'

²³ Tei nah Yesus panau-panau alem lim daléh Galilea, katuk daha' alem uma sebayang, dahin pedengah dengah sayu marung keligem Allah atih. En Na' petagéh nah lim kelunan men ha'ut na'an perah daha'.

²⁴ Dengah Na' atih pah putat alem lim daléh Siria, lim-lim kelunan aleng té' perah aleng uh ga' kuri-kuri na'an perah dahin katé' en daha' geri pala iha', dahin kelunan aleng té' to' nilung pah, dahin kelunan belanen, dahin kelunan aleng perah matei uhat lahuh. Lim-lim daha' atih pah en na' petagéh.

²⁵ Té' pah kuri-kuri kelunan aleng ngioh Iha', iha' patih daha' men Galilea dahin men Dekapolis dahin Yerusalem dahin men Yudea dahin daha' men dipah hungei Yordan pah lahuh.