MATIUS 3 - SURAT TUHAN Dahun Kayan 1990

Yohanes aleng Meduh

¹ Tegu anan nyemau nah Yohanes aleng Meduh katuk daha' ha' tana ngahit alem daléh Yudea,

² ken na', “Ngelisah nah kenep kam avin keligem Surga hu'uh jeleng.”

³ Avin anih nah iha' aleng kurin nabi Yesaya, ken na', “Dahun kelunan aleng medéng ha' tana ngahit, Nemei nah alan Tuhan, dahin nutau nah avan Na' panau.”

⁴ Té' pah kanan Yohanes atih basung na' men bulun hulung unta dahin jet té' iung-u'ing na' anit, dahin ket na' kani paho' dahin nyihun hinget alem uro'.

⁵ Tegu atih musang nah kelunan huang daléh Yerusalem dahin lim daha' ha' tana Yudea dahin lim-lim daléh aleng sepipah hungei Yordan tei pala Yohanes,

⁶ daha' pah en na' duh alem hungei Yordan, alem daha' akun sala daha'.

⁷ Bi tegu iha' nyineng kahum men daha' Farisi dahin daha' Saduki pah ateng akei duh, iha' ha' kuma' men daha', “U kelo' anak nyipa', hi kah daha', “U kelo' anak nyipa', hi kah aleng katuk ikam nyihu ikam lap men unget aleng seng ateng?

⁸ En kelo' usang nah bua barik kelo' aleng bara kenep kelo' uh ngelisah.

⁹ Meng nah ikam ngio' alem kenep kam, kuma', ‘Abraham aleng taman tam,’ avin akui kuma' men ikam, Allah aleng ningan na anak-anak Abraham men bato'-bato' anih.

¹⁰ Kerei inih pah hu'uh té' nah kapek hu'uh en Na' lo' té' pa'un kayo'. Ha'ut-ha'ut kayo' aleng em ngebua aleng sayu atih nah seng en teveng, en sau alem apui.

¹¹ Lan pah akui meduh ikam té' ata' aleng bara ngelisah kenep, bi Iha' aleng nei ngebaya té' akui Iha' nah lalau dekaya' men'uh akui, ala kasut Na' pah akui em tekep. Iha' seng meduh ikam té' Belua' Ma'ang dahin té' apui.

¹² Tapan uh té' alem usu Na', Iha' seng ngem'ang ngavan Na' mahik, seng mepeng parei Na' dahin metei na' halem lepau, bi upéh Na' seng en Na' pahun alem apui aleng em deng tei parem.

Tuhan Yesus en Yohanes duh

¹³ Tegu atih nei nah Yesus men daléh Galilea, ateng ha' hungei Yordan ja Yohanes meduh Iha'.

¹⁴ Bi Yohanes mukin dahun Na', dahin kuma', “Akui ji'ek aleng tekep en duh té' Tuhan kui, beka' Tuhan kui nei pala akui.”

¹⁵ Bi Yesus nyu'ei iha', “Bei na' tua, avin tekep kah itam pela'ung lim hadui aleng teneng nunih.” Pelalau iha' mekoh.

¹⁶ Hu'uh Yesus en duh, ma'un nah Iha' pelalau men alem hungei atih, tegu atih pah langit nei neng'ap, pelalau Iha' nyineng Beluan Allah ngiléh awi ji manuk sepukun nei nelekep té' ujung Na'.

¹⁷ Pelalau nei ji daho' men langit, aleng kuma', “Anih nah Anak Kui aleng Ek nyalam, té' Iha' pah Akui melu.”