MATIUS 28 - SURAT TUHAN Dahun Kayan 1990

Tuhan Yesus peju men patei. Dahun Na' aleng baya loh

¹ Lepek nah Dau Kelarah daha' atih, tegu dau uh pebekat jihima té' dau aleng una'(*) alem hang migu anan, te nah Maria Magdalena dahin Maria aleng ha' béh atih, ngenep nyineng tanem atih.

² Beka' nyeman tua tana megilik aya'-aya', avin ji meliket Tuhan nei ngiléh men Surga, pelalau nei muvin bato' atih, dahin melo' hujung na'.

³ Jam na' awi bekilet, dahin kanan na' puti piah usan leju.

⁴ Kelunan aelng menga atih pah ngetiwet tua takut, dahin balui awi kelunan matei tua.

⁵ Bi meliket atih kuma' men dawa' doh atih, “Meng kua' takut. Kitak kah kua' ilau Yesus aleng uh daha' selepang arei dih.

⁶ Nusi' té' Iha' tinih la'an, avin Iha' uh nei murip, awi aleng uh dahun Na' arei di. Nei nah kua' nyineng ngavan Na' uh miri.

⁷ Uh anan tei nah kua' salet bara men dalo' anak sekulah Na' dih, bara', ‘Iha' uh nei peju murip. Iha' seng tei una' té' kelo' tei ha' Galilea; hinan nah kelo' seng jam Iha',’ ken kua'. Nunan nah Dahuk men kua'.”

⁸ Pelalau timah lelan nah dawa' tei uli men tanem atih dahin takut dahin sayu lan kenep dawa' lahuh, pelalau tepurung nah dawa' salet-salet tei bara men dalo' anak sekulah.

⁹ Alem nunan dih, beka' nyeman-nyeman pah Yesus pepsuk dahin dawa', dahin kuma', “Sayu kah men kua'.” Pelalau tei nah dawa' gem kudek Na' dahin nyepukun sebayang ha' unan Na'.

¹⁰ Pelalau ken Yesus men dawa', “Meng kua' takut, tei nah kua' bara men dalo' Harik, nyihu nah dalo' tei ha' Galilea. Hitih nah dalo' seng nyineng Akui.”

¹¹ Alem dawa' atih tei, lun tei pah kuri-kuri la'ung dalo' aleng menga tanem atih tei ha' daléh bara men dalo' imam aya' lim-lim ket aleng uh jadi' atih.

¹² Lun pepeng nah dalo' imam aya' dahin lim kelunan aya' na ji pakat, uh anan en daha' uk nah ligit pirek kahum men daha' seladu atih,

¹³ dahin kuma', “Sayu kelo' bara, ‘Daha' anak sekulah Na' aleng nei ala Iha' tegu malem dahin nakau Iha' alem kalo' tudu,’ ken kelo'.

¹⁴ Tana' daho' anih tula té' gabnur adang tei kah kamé' nyeluk iha', dahin mahuk kelo'.”

¹⁵ Pelalau en dalo ala nah ligit atih dahin bara awi aleng putat té' hang daha' Yahudi ateng dau anih.

Dahun Yesus aleng baya loh

¹⁶ Té' pah dalo' pulu-ji' anak sekulah Na' atih, te dalo' lim ha' Galilea ha' ji ngalang aleng en Tuhan petneng men dalo'.

¹⁷ Kitan dalo' nah Iha', pelalau dalo' ngelu'ep sebayang ha' unan Na', bi té' pah balei aleng kawah.

¹⁸ Nei nah Yesus pala dalo', pelalau tengaran dahin dalo', ken Na', “Lim-lim tingan ha' Surga dahin ha' usun tana uh en Allah uk men Akui.

¹⁹ Avin anan, tei nah kelo', na lim-lim na'an kelunan jadi' anak sekulah Kui, dahin meduh daha' halem Aran Taman tam, dahin Anak, dahin Belua' Ma'ang,

²⁰ dahin katuk daha' ngioh lim-lim ket nun-nun aleng uh Ek nyihu kelo'. Hituk nah lahuh, Akui anih nah aleng lengep kelo' pa'en-pa'en ateng ka'uh lim ket nun-nun.”